Брэкеты: сімвал клопату пра сябе і… спосаб выйсці замуж (+відэа)

Святлана Стахоўская

6 гадоў ago

Больш за 20 дзяўчын, якія праходзілі лячэнне ў артадонта Аляксандра Сакадынца, паспяхова выйшлі замуж альбо ў працэсе лячэння, альбо адразу пасля таго, як яно было скончана. Нават жарт з'явіўся сярод калег: «Хочаш знайсці мужа – выпраўляйся па брэкеты да Аляксандра Алегавіча». У чым сакрэт? «У набытай упэўненасці ў сабе», – перакананы доктар.

Брэкеты даўно ўжо выклікаюць асацыяцыі не з Кацяй Пушкаровай, а са статусам і клопатам пра сябе. Яскравы прыклад гэтаму – грылзы, якія многія хіп-хоп выканаўцы пачалі насіць для ўпрыгожвання на канцэрты і вечарыны. А ў Дубаі, напрыклад, дзе артаданічная дапамога казачна дарагая, багатыя людзі спецыяльна купляюць фальшывыя брэкеты і носяць іх, як сапраўдныя, каб намякнуць пра свой дабрабыт.

У беларускіх рэаліях прадузятасці з нагоды брэкетаў таксама сыходзяць. Яны робяцца моднымі. Як правіла, рашаюцца на ўстаноўку брэкет-сістэмы, у асноўным, жанчыны. Па словах стаматолага-артадонта Аляксандра Сакадынца 90% яго пацыентаў – прадстаўніцы прыгожага полу. Самай старэйшай – 67 гадоў. А вось мужчыны да гэтага часу саромеюцца.

Якія брэкеты існуюць?

Металічныя;
эстэтычныя (керамічныя, сапфіравыя, кампазітныя);
унутраныя (моўныя, лінгвальныя). Устанаўліваюцца на ўнутраным баку зубоў і зусім не бачныя;
з каштоўных металаў (у Беларусі такіх няма).

З якога ўзросту можна выкарыстоўваць брэкеты?

Усё залежыць ад методыкі пастаноўкі брэкет-сістэмы.

Класічны спосаб. Ужываецца пераважна ў пастаянным прыкусе. Старт можа быць з 12-13 гадоў і да глыбокай старасці. Пры ўмове, што няма спадарожных цяжкіх паталогій з боку касцяной тканкі (астэапарозу, генералізаванага парадантыту і г.д.).
Методыка 4.2. Яе прымяняюць у пацыентаў 7-8 гадоў. Пры гэтым брэкеты ўстанаўліваюцца толькі на 4 пярэднія пастаянныя зубы. Такі спосаб дазваляе своечасова стварыць месца для зубоў, якія яшчэ не прарэзаліся. Дасведчаны артадонт ужо бачыць, што для іх ёсць дэфіцыт месца.

Каму патрэбныя брэкеты?

Аляксандр Сакадынец

Стаматолаг-артадонт, дацэнт кафедры артадантыі БДМУ, канд.мед.навук

Спіс паказанняў да ўстаноўкі брэкет-сістэмы вельмі вялікі. Ад нязначнага павароту зуба, калі пацыенту проста не падабаецца яго знешні выгляд падчас усмешкі, да найцяжэйшых паталогій, звязаных з прыроджанымі расколінамі, траўмамі і г.д. Асноўны кантынгент пацыентаў – моладзь да 30 гадоў. Але ў апошні час да нас пачалі часцей трапляць людзі больш сталага ўзросту, якія маюць патрэбу ў пратэзаванні зубоў. І перад гэтай працэдурай артадонты накіроўваюць іх да нас. Бо за жыццё ў чалавека адбываецца пастаянная міграцыя зубоў. Іх перасоўванне залежыць ад характару прыёму ежы, заняткаў спортам, наяўнасці скаліятычнай дэфармацыі пазваночніка і г.д.

— Часта да артадонтаў звяртаюцца дзіцячыя стаматолагі. І гэта не можа не радаваць. Калі зубасківічныя анамаліі выяўленыя на ранніх тэрмінах, дык і лячэнне можа стаць менш доўгім і балючым. Самае галоўнае перад устаноўкай брэкет-сістэмы – каб усе зубы пацыента былі цалкам здаровымі, поласць рота саніраваная. Прынамсі, каб не было вострых працэсаў. Бо любы ўстаноўлены на эмаль зуба брэкет з'яўляецца рэтэнцыённым пунктам, г.зн. месцам, дзе будзе пастаянна назапашвацца ежа. Гэтыя ўчасткі будуць схільныя да атакі з боку патагенных мікраарганізмаў і іх вылучэнняў. Таму неабходна старанна клапаціцца пра гігіену поласці рота. Для гэтага ёсць спецыяльныя прыстасаванні. Акрамя звычайнай зубной шчоткі, існуюць ёршыкі, ірыгатары, зубныя ніткі, апаласквальнікі, пасты, монапучковыя шчоткі і г.д. Асартымент у Беларусі прадстаўлены вельмі шырокі. Таму праблем у правільным доглядзе поласці рота пры лячэнні з дапамогай брэкет-сістэмы абсалютна ніякіх няма.

Эстэтычныя брэкеты – якія яны?

Як правіла, гэта такія брэкеты, якія менш прыкметныя, па колеры зліваюцца з колерам зубоў і не так моцна кідаюцца ў вочы.

Існуюць і такія брэкеты, якія ўстанаўліваюцца за зубамі і цалкам не бачныя. Аднак выкарыстоўваюць іх урачы вельмі рэдка. Чаму?

Аляксандр Сакадынец

Стаматолаг-артадонт, дацэнт кафедры артадантыі БДМУ, канд.мед.навук

Эстэтычныя брэкеты лічацца менш прыкметнымі. Але дуга, якая знаходзіцца паміж імі, усё роўна мае металічны колер. Ёсць такія, якія пакрытыя тэфлонам. Па першым часе гэта стварае ілюзію нябачнасці. Але ў далейшым тэфлонавая дуга драпаецца і набывае той жа металічны выгляд.

— Што тычыцца лінгвальных брэкетаў, дык яны ўжываюцца надзвычай рэдка з-за супрацьпаказанняў, першапачатковай іх дарагоўлі і абсалютна іншай методыкі ўстаноўкі. Калі ў поласці рота з'яўляюцца такія брэкеты, гэта можа пацягнуць за сабой траўматызацыю языка. Ёсць метады па яе прадухіленні, але гэта ўсё атрыбутыка, якая патрабуе дадатковых выдаткаў часу і грошай. У Беларусі лінгвальныя брэкеты шырокага распаўсюджвання не атрымалі.

Брэкеты і скаліёз. Сувязь ёсць!

Перад устаноўкай брэкет-сістэмы не лішнім будзе расказаць артадонту пра свае хваробы. Гэтая інфармацыя можа ўнесці карэктывы ў праграму лячэння.

Напрыклад, пры наяўнасці скаліёзу патрэбны ўрачэбны тандэм з артапедам-вертэбролагам.

Рэкамендацыі пацыентам пасля ўстаноўкі брэкет-сістэмы

Строга забараняецца піць гарачыя і халодныя напоі. Уздзеянне розных тэмператур можа прывесці да адрыву брэкетаў ад зуба.
Неабходна захоўваць мяккую дыету. Тое, што можа сабе дазволіць маленькае дзіця, у якога толькі-толькі прарэзаліся зубы, падыходзіць для чалавека пасля ўстаноўкі брэкет-сістэмы. Супы-пюрэ, здробненае мяса, рыба і г.д.

Брэкеты – гэта балюча?

Пры адказе на гэтае пытанне ўрачы адзначаюць, што часцяком пры ўстаноўцы сістэмы пацыенты засынаюць прама ў крэсле.

Аляксандр Сакадынец

Стаматолаг-артадонт, дацэнт кафедры артадантыі БДМУ, канд.мед.навук

Працэдура ўстаноўкі праводзіцца без усялякай анестэзіі. Гэта абсалютна не балюча. Першыя некалькі дзён галаўным мозгам будзе апрацоўвацца інфармацыя пра тое, што адбываецца ў поласці рота. Да гэтага зубы былі паасобку, пасля ўстаноўкі дугі брэкет-сістэма дыктуе, куды ім ісці. Гэта можа адчувацца як дыскамфорт. Але толькі адзін з прыкладна ста пацыентаў мае патрэбу ў гэты час у абязбольвальнай таблетцы. Пасля замены дуг, якая адбываецца ў залежнасці ад сістэмы кожныя 4 тыдні ці кожныя 2 месяцы, сімптомы могуць паўтарацца. Але чалавек ужо разумее, што гэта нармальна. Асноўныя страхі ўзнікаюць з-за недахопу інфармацыі пра тое, што адбываецца.

Як доўга трэба насіць брэкеты?

Усё індывідуальна. Сярэднія тэрміны ў залежнасці ад паталогіі – ад 12 да 36 месяцаў. Бываюць выключэнні. Напрыклад, калі жанчына цяжарная, кальцый сыходзіць у плод. Костка робіцца больш мяккай, перамяшчэнне зубоў больш хуткім. Бывае, што атрымліваецца дамагчыся патрэбнага выніку і праз 6 месяцаў.

Вынік гарантаваны. Але ёсць нюансы

Урачы могуць дамагчыся выпраўлення зуба, групы зубоў і г.д. Але гэты вынік неабходна ўтрымліваць. І займацца гэтым усё сваё жыццё. Для многіх людзей, якія лічылі, што здыманнем брэкетаў усё і скончыцца, такая інфармацыя становіцца шокам.

Аляксандр Сакадынец

Стаматолаг-артадонт, дацэнт кафедры артадантыі БДМУ, канд.мед.навук

Пасля таго, як здымаюцца брэкеты, неабходна пажыццёва насіць рэтэйнеры. Яны бываюць здымныя (у выглядзе празрыстых кап, пласцінак) і няздымныя (дроцік, які падклейваецца на зубы знутры). У ідэале трэба выкарыстоўваць і тыя, і другія. Гэта гарантуе, што зубы застануцца ў тым становішчы, у якім вы ўбачылі іх пасля зняцця брэкетаў. Калі рэжым нашэння кап парушаецца, зубы спрабуюць вярнуцца ў сваё зыходнае становішча, таму што ў іх ёсць «памяць».

Роўныя зубы і прыгожая ўсмешка – тое, што ніколі не выйдзе з моды. Гэта можа стаць галоўным козырам у заваяванні прыхільнасці любога суразмоўцы і падмуркам упэўненасці ў сабе. Але для рэалізацыі такой магчымасці часам, бывае, трэба папрацаваць. Самае галоўнае – вывучыць нюансы, а затым рашыцца і пачаць. А яшчэ – знайсці свайго доктара. Наш эксперт раіць звярнуцца да 2-3 спецыялістаў, перш чым прыняць рашэнне па выбары ўрача.

Відэа – Генадзь Сукач, Святлана Стахоўская.