Хочацца ўжо свежай бульбы, хаця і не рызыкуеш пакуль набываць яе, прывезеную з замежных краінаў. Таму ямо старую. І разумеем, што яна зноўку застаецца. Летась паспрабавалі рабіць з яе свой крухмал. Здаецца, і атрымлівалася, але... Малавата прадукту на выхадзе. Не каштуе тых намаганняў.
Таму даводзіцца прыгадваць, куды яшчэ бульбу можна прыстроіць, каб рэшткі не выкідваць. І насамрэч варыянтаў хапае. У тым ліку – на карысць здароўю. Напрыклад, у касметалогіі выкарыстоўваюць разнастайныя маскі для твару і валасоў, дзе бульба – асноўны кампанент.
Рэцэптаў у сеціве мора!
Можна падабраць для свайго тыпу скуры, зыходзячы з наяўнасці кампанентаў і ўвогуле – тое, што ляжа да сэрца.
Бульба таксама выкарыстоўваецца ў рэцэптах догляду за рукамі і пяткамі, з яе дапамогай можна выдаляць мазалі на ступнях... Словам, абкладваемся сырой надзёртай бульбай з ног да галавы – і не патрэбныя нам ніякія заморскія маскі! 🙂
Самае лёгкае і простае – паловай сырой бульбіны працерці праблемныя зоны на скуры твару. Праз пару хвілін апаласнуць твар і выцерці ручніком. Зразумела, з першага разу відавочнага эфекту не будзе. Трэба рэгулярна паўтараць.
І нават пасля гэтага запасы агародніны ніяк не заканчваюцца?!
Бяром клубень, разразаем папалам, ідзём да любімай пары туфель і... націраем – замест крэму! Спачатку абутак зробіцца цьмяным. Але калі праз 5 хвілін працерці яго мяккай тканінай... Заблішчыць!
А можа, менавіта зараз самы час вымыць вокны, шкло ў аўтамабілі, пачысціць акуляры?! І зноўку бульба! У той жа паслядоўнасці. Разразаем, націраем, пасля высыхання праціраем сухой анучкай. Бляск гарантаваны! І ніякай хіміі. Аўтары ідэі сцвярджаюць, што акуляры атрымліваюць бонус – не туманяцца пры перападах тэмператур.
У вас яшчэ ёсць у хаце ці кватэры звычайная лямпачка ў люстры ці свяцільніку?! А бывае, што яна лопаецца і з патрона тырчаць вострыя парэшткі?
Бяром сырую бульбіну, устаўляем у рэшткі і акуратна паварочваем. Праблема вырашальная!
А вось што прыдумалі нашы продкі – даўным-даўно, калі карысталіся яшчэ сярэбранымі манетамі. Іх чысцілі, паклаўшы ў ваду, у якой варылася бульба! Сцвярджаюць, што зараз такім чынам можна без усялякіх намаганняў пачысціць сталовае срэбра. Проста апусціць туды на 20-30 хвілін. Асабіста я збіраюся пайсці яшчэ далей – высветліць, ці гэтак жа падзейнічае вада з-пад адваранай бульбы на сярэбраны ланцужок, бранзалет альбо пярсцёнак. Бо чысціць іх зубным парашком – значыць, забрудзіць ім усё вакол.
З асабістага вопыту прыгадваю, як даўней перасоўвалі канапу і шафу з месца на месца. Пад ножкі падкладвалі разрэзаныя бульбіны. І няблага слізгалі, скажу я вам! Да таго часу, пакуль ні трэскаліся пад цяжарам мэблі! J А калі яна да месца яшчэ не «даехала», даводзілася замяняць бульбяныя паловы.
А хто памятае, як у дзяцінстве пры прастудзе мамы прапаноўвалі нам падыхаць над каструлькай са зваранай бульбай, накрыўшыся ручніком альбо коўдрай?! Тады ж не было сучасных прыбораў – інгалятараў... А інгаляцыі рабілі вось такім чынам.
А яшчэ кажуць, што ў бульбяных клубнях нядрэнна прарастаюць чаранкі ружаў, якія бяруць адтуль для ўласнага сілкавання карысныя рэчывы. Трэба будзе пры выпадку праверыць.
Ведаеце іншыя спосабы «нямэтавага» прызначэння бульбы?! Падзяліцеся, калі ласка, з намі. А то яшчэ ў падвале гэтай агародніны хапае...