Site icon Слушна

Не злоўлены на слове – не абавязаны. Чаму мужчыны пазбягаюць размоў пра адносіны?

  • Святлана Стахоўская

    • Што паміж намі адбываецца? Мы проста знаёмыя ці ўжо афіцыйная пара? Толькі сустракаемся і прыглядаемся або збіраемся ствараць сям'ю? Гэтыя пытанні ў той ці іншы момант, як правіла, імкнецца высветліць жанчына. А вось мужчыны такіх размоў часта пазбягаюць і нават баяцца. Чаму?

    Высвятляем з Канстанцінам Пятровым, псіхолагам рэабілітацыйнага аддзялення Мінскага гарадскога клінічнага наркадыспансера, сертыфікаваным гештальт-тэрапеўтам, супервізарам Маскоўскага Гештальт Інстытута.

    Ці трэба запытвацца ў мужчыны пра адносіны?

    Што раяць жанчыны адна адной? Ні ў якім разе не задаваць такіх «крамольных» пытанняў. Трымацца спакойна, і нават калі дзяўчына суткамі чакае доўгачаканага званка, то ні ў якім разе не падаваць выгляду, што яна зацікаўлена. Чакаць ініцыятывы і ўсіх неабходных слоў ад мужчыны.

    Што пра гэта думаюць мужчыны?

    Такіх слоў можна не дачакацца ніколі і прабавіць у марах доўгі час. Бо ўсё тое, што не патлумачылі і не абмеркавалі, адводзіць нас у свет фантазій, які з рэчаіснасцю можа не супадаць. Яна пасля «прывітанне» ужо ў думках нарадзіла яму траіх дзяцей, а ён толькі каву папіць разам хацеў.

     
    Канстанцін Пятроў
    Сертыфікаваны гештальт-тэрапеўт, супервізар Маскоўскага Гештальт Інстытута
    У нас няма правільнай культуры паведамленняў. Нас не вучаць прамаўляць, якіх адносін я ад цябе хачу. З-за гэтага ўзнікае вялікая колькасць фантазій. І шмат напружання. Таму што здагадкі могуць адпавядаць рэальнасці, а могуць і не. Мужчына можа маўчаць і паведамляць пра свае пачуцці праз падарункі. Але ў яго выпадку яны, напрыклад, проста намякаюць на тое, што дзяўчына падабаецца. А яна інакш тлумачыць: «напэўна, ён хоча сур'ёзных адносін.

    Чаму мужчына баіцца?

    Чаму мужчына баіцца размаўляць пра адносіны?

    Сфера пачуццяў для беларускага мужчыны - нязведаная тэрыторыя. З дзяцінства яго вучылі гэтыя самыя пачуцці душыць: «хлопчыкі не баяцца, не плачуць і г. д.», а зараз раптам высвятляецца, што пра гэта ўсё трэба падрабязна размаўляць. А як? Мужчына і сам часам не можа зразумець, што з ім. Апісаць жа гэты стан яму і зусім не пад сілу.

    Бывае такое і з жанчынамі. Не ў сілах вытрымліваць напружанне блізкасці, людзі часта імкнуцца сэксуалізаваць кантакт. Настолькі страшна наблізіцца да рэальнага чалавека, адкрыцца самому. Значна прасцей, перайшоўшы ўсё бар'еры адразу, кінуцца ў ложак. А там ужо як-небудзь разбярэмся.

     
    Канстанцін Пятроў
    Сертыфікаваны гештальт-тэрапеўт, супервізар Маскоўскага Гештальт Інстытута
    Калі людзі толькі пачынаюць сустракацца, то заўсёды знаходзяцца ў нявызначанасці. «Ты мне можаш падабацца. Але я пакуль не ведаю, чаго ад цябе хачу». Вядома гэта можна адразу сэксуалізаваць, але тады гаворка ідзе не пра адносіны, а пра пазбяганне іх. Мне настолькі страшна цябе ўбачыць, што давай адразу пяройдзем да сэксу. Калі казаць пра рэальную сустрэчу, то мы першапачаткова адзін аднаго пазнаем і толькі потым разумеем, чаго хочам. Калі ёсць толькі ўзаемнае жаданне сэксу, праблемы няма. Але калі хаця б у аднаго чалавека існуе патрэба ў нечым большым, то трэба тлумачыць. Мужчынам гэта не менш важна, чым жанчынам. Проста яны часта могуць не разумець, што адчуваюць... А яшчэ не любяць слоў, калі ў іх не вельмі ўпэўненыя. Калі я прамаўляю штосьці, значыць, як мужчына нейкую частку адказнасці на сябе бяру. Пакуль я гэта не кажу ўслых, можна сустракацца. Многія ад такіх пытанняў упадаюць у ступар. Іх гэта палохае. У нас жа сацыяльна на гэтыя тэмы казаць нельга. Гэта сорамна, забаронена. І тут жанчына: «У якіх мы адносінах? У палюбоўніцы мяне хочаш запісаць?». А ёсць і мужчыны, якія самі прапануюць: «давай пагутарым».

    Калі трэба растлумачваць?

    Хоць і кажуць, што пасля пэўнага ўзросту спатканні часцей за ўсё нагадваюць сумоўі, усё ж лепш даць адзін аднаму час для таго, каб прыгледзецца. Калі прад'явіць мужчыну свой спіс пытанняў і патрабаванняў пасля некалькіх сустрэч, што ні да чаго не абавязваюць, у яго можа проста ўключыцца сігнал «трывогі». Гатовыя тэрміны пазначыць складана. Хутчэй, трэба вывучаць і партнёра і сваю гатоўнасць да размовы.

     
    Канстанцін Пятроў
    Сертыфікаваны гештальт-тэрапеўт, супервізар Маскоўскага Гештальт Інстытута
    Усё індывідуальна. Ёсць няпісаны стандарт – 3 спатканні. Але ў кожнага яны могуць расцягнуцца на доўгі час. Калі кіруе фізіялогія, то ўсё можа адбыцца хутка. Калі спачатку ўзровень чалавек-чалавек, то патрабуецца час. Асабліва калі людзі закрытыя, інтравертыўныя. Яны будуць вельмі павольна адзін да аднаго набліжацца, пужацца, уцякаць. Пераасэнсоўваць. Зноў прыходзіць. Тады гэта будзе доўгі працэс. А калі чалавек здольны быць адкрытым і не баіцца параніцца пры блізкасці і сустракае такога ж партнёра, то кантакт ідзе нашмат хутчэй. І там можна хутчэй задаць прамое пытанне.

    Як лепш казаць пра адносіны?

    • Я-паведамленнямі
     
    Канстанцін Пятроў
    Сертыфікаваны гештальт-тэрапеўт, супервізар Маскоўскага Гештальт Інстытута
    Часта жанчына хоча гутаркі, але не можа гаварыць пра сябе. Перакладае размову ў «ты-паведамленні»: «Ты мне падарункаў не дорыш. Ты дрэнны». Лепш выкарыстоўваць «я-паведамленні»: «Мне ад цябе не хапае ўвагі. Я разумею, што атрымліваю яе, калі мне дораць падарункі, калі на 8 сакавіка я атрымліваю кветкі, калі мне кажуць, якая я добрая.
    • Тлумачыць, якія словы і ўчынкі важныя менавіта для вас

    Часам мужчына не разумее, якія менавіта знакі ўвагі для жанчыны, штосьці абазначаюць. Пра гэта трэба сказаць.

     
    Канстанцін Пятроў
    Сертыфікаваны гештальт-тэрапеўт, супервізар Маскоўскага Гештальт Інстытута
    Жанчына кліча мужчыну на каву, а сама чакае прызнання. Мужчына ж можа гэтага не разумець. «Хацеў проста кавы папіць, а яна мне сказала, што я пра яе не клапачуся». Ёй хочацца, каб сказаў, што яна рыхтуе смачную каву, што добрая гаспадыня. А ён і не думаў пра такія высокія матэрыі. Проста каву піў. Яму трэба растлумачыць: «Калі п'еш каву і табе яна падабаецца – скажы пра гэта. Тады я разумею, што табе важная я і тое, што я раблю. І гэта прызнанне мяне як каштоўнага для цябе чалавека». Ён вядома ўразіцца, але зразумее. Калі не зразумее, то ўсё дрэнна.
    • Быць гатовай да адказу

    Перш чым задаць пытанне, лепш пераканацца ў тым, што вы гатовыя да адказу. Традыцыйна лічыцца, што мужчыну прасцей вытрымаць адмову. Пачуў не – пайшоў знаёміцца і сустракацца далей. Ці яшчэ горш раззлаваўся і стаў дамагацца ўвагі яшчэ больш старанна. Для дзяўчыны пачуць «не» – вельмі жорсткі ўдар па самаацэнцы. На самай справе адмову па-рознаму могуць перажываць людзі незалежна ад полу. Але ў сумленным адказе «не» значна больш плюсаў, чым у падманлівым «так». Бо тады вы маеце сапраўдную карціну сітуацыі і можаце не губляць час на бясплодныя мары і чаканні.

    Растлумачваць статус адносін ці не? Наш адказ «так». Але з дапаўненнямі. Казаць пра гэта трэба далікатна, пры дапамозе «я-паведамленняў», адчуваць настрой і гатоўнасць партнёра і пры гэтым быць гатовым пачуць адказ.

    Exit mobile version