З ініцыятывай Heart team летась выступіў Гродзенскі абласны клінічны кардыялагічны цэнтр, а таксама Галоўнае ўпраўленне аховы здароўя Гродзенскага аблвыканкама. Для пачатку планшэтамі са спецыяльным дадаткам і падключанымі SIM-картамі А1 абсталявалі 17 медыцынскіх брыгад. Сёлета пры падтрымцы кампаніі працуюць ужо 32 брыгады.
Новаўвядзенне дазволіла забяспечыць аператыўную сувязь з кардыяцэнтрам, куды дастаўляюць большасць пацыентаў у тых выпадках, калі неабходная экстранная шпіталізацыя. Тры планшэты знаходзяцца ў стацыянары: адзін у дзяжурнага кардыёлага ў прыёмным пакоі, другі – у рэаніматолага, трэці – у хірурга.
Як гэта працуе?
Яшчэ пры аглядзе дома брыгада хуткай дапамогі запаўняе на планшэце спецыяльную форму ў мабільным дадатку. Медработнік указвае пол, узрост, стан пацыента і ступень яго цяжару, паказчыкі электракарыяграмы, дату і час паступлення скаргаў. Гэтая інфармацыя адразу ж трапляе ў стацыянар, што дапамагае эканоміць час і аказаць меддапамогу максімальна хутка. Пакуль брыгада знаходзіцца ў дарозе, ужо рыхтуецца прыёмны пакой і аперацыйная.
Аляксандр Чарняк, рэнтгена-эндаваскулярны хірург Гродзенскага абласнога клінічнага кардыялагічнага цэнтра:
– Наш цэнтр выкарыстоўвае гэтую праграму з 2019 года. Змены ў працы значныя. Для пацыентаў, якія да нас трапляюць, адзін з найбольш крытычных паказчыкаў – час, які яны праводзяць у цяжкім стане. Дзякуючы праекту Heart team нам удаецца яго скарачаць і ў патрэбны момант аднаўляць нармальную работу сэрца. Планшэтамі для абмену дадзенымі аснашчаныя ўжо практычна ўсе брыгады хуткай дапамогі, якія абслугоўваюць Гродна і Гродзенскі раён, і цяпер гэта асабліва важна, бо ў перыяд пандэміі своечасова атрыманая інфармацыя можа не толькі дапамагчы пацыентам, але і абараніць урачоў.
На планшэтах Heart team устаноўлена праграмнае забеспячэнне Salutis, якое працуе на аснове SIM-карт з падключаным пакетам безлімітнай 3G-сувязі ад A1. Неабмежаваны кругласутачны доступ да сеткі дазваляе медыкам абменьвацца любым аб'ёмам дадзеных.