Нашы баскетбалісткі правялі другі матч у рамках адбору на Еўрабаскет-2019. На хатнім паркеце падапечныя Наталлі Трафімавай упэўнена ўзялі верх над эстонкамі – 80:63.
Вікторыя Гаспер атрымала прыз лепшага гульца каманды зборнай Беларусі (20 ачкоў, 4 падбору).
Такім чынам, беларускі дабіліся стопрацэнтнага выніку ў лістападаўскіх гульнях кваліфікацыі і размясціліся ўверсе пула «Б», тым самым забяспечыўшы сабе выдатныя перспектывы для выхаду ў фінальную частку кантынентальнага першынства.
Наступныя матчы наша зборная правядзе 10 і 14 лютага 2018 года супраць Турцыі і Польшчы адпаведна. Абедзве сустрэчы адбудуцца ў Мінску.
Наталля Трафімава
Галоўны трэнер зборнай Беларусі
У першую чаргу хачу павіншаваць каманду з дзвюма перамогамі ў двух матчах і сказаць дзякуй заўзятарам за падтрымку. У цэлым задаволеная гульнёй дзяўчынак, але ўсё ж такі лічу, што крыху не хапіла сабранасці ў абароне. Несумнеўны плюс сённяшняга матчу ў тым, што маладыя баскетбалісткі атрымалі магчымасць згуляць на такім узроўні, а для некаторых гэта і зусім быў дэбют у складзе галоўнай каманды краіны.