1. Ці патрэбна сталым людзям спажываць семачкі?
А. Вось толькі семачак ім і не хапала! Хіба гэта добра для страўніка?!
Б. Толькі калі вельмі рэдка і калі вельмі хочацца.
В. Так, абавязкова! Герантолагі нават раяць.
Правільны адказ – В.
«Для таго, каб вырабляць дастаткова міеліну, арганізму неабходны цынк, – тлумачаць герантолагі Андрэй Ільніцкі і Кірыл Прашчаеў. – А ён утрымліваецца ў тых самых семачках – гарбузовых альбо сланечнікавых. У дзень чалавеку патрабуецца 10 міліграмаў цынку, такая колькасць утрымліваецца ў 100 грамах семачак. Так што мы раім сталым людзям ужываць у ежу семачкі. Да таго ж, сам працэс іх ачысткі – трэніроўка дробнай маторыкі кісцяў рук, што таксама станоўчым чынам уплывае на вышэйшую нервовую дзейнасць».
Больш падрабязна – тут.
2. Чаму нашыя продкі радаваліся, калі на Дабравешчанне згледжвалі бусла ў палёце?
А. Значыць, ураджай чакаецца багатым.
Б. Ногі балець не будуць увесь год! І справы будуць у парадку.
В. У сям’і чакаецца папаўненне.
Правільны адказ – Б.
Дарэчы, а ці ведаеце вы, што згледзець бусла на Дабравешчанне – сапраўды добрая прыкмета?! Асабліва – птушку ў палёце. Лічылася, што тады і справы будуць у парадку цэлы год, і ногі ў таго, хто ўбачыць, балець не будуць. А калі пабачыць першы раз у годзе бусла, які стаіць… Так што лепей няхай лётаюць, няхай кружаць над намі! Гэта такое захапляльнае відовішча!
Больш падрабязна – тут.
3. Ці варта хлусіць свайму Хатніку… 14 красавіка?
А. Калі ён усё ж існуе (а я ў гэтым сумняваюся), дык лепей яго не гнявіць хлуснёй.
В. А чаму толькі 14 красавіка?! Хлусіць дык хлусіць! Усіх падманваем раз-пораз… Чаму б і не Хатніка? J
С. 14 красавіка – дзень абуджэння Хатніка. І хлусіць яму людзі дасведчаныя раяць!
Правільны адказ – С.
Паводле некаторых даследчыкаў, 14 красавіка даволі цікавае… Свята – не свята… Скажам так: дзень цікавы. Абуджэнне Хатніка (Дамавіка). І, маўляў, трэба хлусіць, каб яго заблытаць. А вось навошта, не ведаю. Здаецца, Хатнік – такі мілы дух... Прынамсі, такім мы яго ўяўляем па шматлікіх малюнках, мультфільмах, казках. Калі не злаваць яго, вядома ж, а ўлагоджваць, частаваць, дарыць падарункі… А памятаеце дамавёнка Кузю?! Мілата ж!
Больш падрабязна – тут.
4. Ці варта давяраць «амерыканскім урачам з місіяй у Сірыі» ў сацыяльных сетках?
А. Мне здаецца, што давяраць можна любым урачам, у тым ліку і гэтым…
В. Ні ў якім разе! Бо гэта (100%!) вам пішуць скамеры, махляры! І хутка вы можаце пазбавіцца сваіх грошай…
С. Нельга, бо метады амерыканскіх урачоў не падыходзяць беларусам…
Правільны адказ – В.
Сапраўды, размова ідзе пра махляроў, якія ў большасці сваёй называюцца аднатыпна: «амерыканскія палкоўнікі» альбо «амерыканскія ўрачы з Сірыі». Хаця не маюць адносінаў ні да тых, ні да другіх.
Мілыя спадарыні, калі да вас «стукаецца» ў сеціве прывабны мужчына з замежжа, не палянуйцеся зайсці да яго на старонку. Што павінна насцярожыць? Ніводнага сябра. Адзін альбо пару фотаздымкаў. Практычна пустая стужка. Зразумела, што акаунт новы. І прычына накшталт: «Я развёўся пяць гадоў таму (варыянт – мая жонка памерла) і з таго часу не быў у сацыяльных сетках» тут не каціць зусім.
Больш падрабязна (а хто прапусціў, дык і вельмі раю!) – тут.
5. Ці можна спажываць якімсьці чынам каштанавыя свечкі (кветкі)?
А. Так, можна! Самае простае – запарыць гарбату, карысна!
В. Не, што вы! Яна абсалютна не ядомыя і нават шкодныя!
С. Ну толькі калі ў букет паставіць, а для народнай медыцыны яны бескарысныя.
Правільны адказ – А.
Увогуле, свечкі каштана ўтрымліваюць прыродныя біяфлаваноіды, якія не толькі падтрымліваюць імунітэт, але і амалоджваюць арганізм. Для лячэння можна выкарыстоўваць як свежыя, так і высушаныя кветкі.
Што тычыцца настоек, якія раяць рабіць з выкарыстаннем гарэлкі і затым пэўную колькасць кропель прымаць унутр… Я нават не ведаю. І такога раіць дакладна не буду. А вось прымяняць настойку вонкава… Можна і паспрабаваць.
Зразумела, што рэцэптаў у сеціве – шмат. Толькі хочацца нагадаць, што з урачом (па магчымасці) параіцца ўсё ж трэба.
А мяне вось гарбата зацікавіла. Так-так! Лекавая гарбата з каштанавых свечак. Тым больш, што адна з яе ўласцівасцяў – танізуючая. А то ўжо надакучыла ў гэты сезон дажджоў, які, прынамсі, абрынуўся на наш горад у маі, хадзіць соннай мухай…
Больш падрабязна – тут.
6. Колькі цукру ў дзень раіць спажываць Сусветная арганізацыя аховы здароўя (СААЗ)?
А. Палову кілаграма, калі п’яце 5 разоў на дзень каву ці гарбату.
В. Не больш за 12 чайных лыжачак.
С. Лепей не спажываць цукар у чыстым выглядзе зусім, але калі хочацца, дык не больш за 1 ст.л.
Правільны адказ – В.
Але, па меркаванні нашых шаноўных беларуска-расійскіх герантолагаў Андрэя Ільніцкага і Кірыла Прашчаева, цукар лепей бы не спажываць увогуле ў чыстым выглядзе. Як і соль. СААЗ жа сапраўды раіць: не больш за 12 чайных лыжачак у дзень.
Больш падрабязна – тут.
7. Ці праўда, што палепшыць памяць дапаможа… Піфагор?
А. Гэта ў якім сэнсе? Яго партрэт да галавы прыкладваць?! 🙂
В. Так, калі выкарыстоўваць яго методыку – прыгадваць увесь свой дзень перад сном.
С. Не-не-не, я тэарэмы не люблю са школы! І не ўзгадвайце мне пра Піфагора!
Правільны адказ – В.
Калі вы сапраўды ўважліва чытаеце мой блог і адчуваеце, што з памяццю ўжо не ўсё добра, дык, можа, паспрабавалі прымяніць гэтую методыку? Якую прыпісваюць, ва ўсялякім разе, Піфагору? З аднаго боку, ён нескладаны, а з іншага… Можна хутка заснуць, не ўзгадаўшы падзеі нават і за палову дня. Таксама ж карысць!
Больш падрабязна – тут.
Ну, а цяпер – падлічваем свае балы, шаноўныя сябры!
ВЫНІКІ
6-7 балаў. Оо-о-о, дык вы сапраўды мой адданы чытач! Вельмі прыемна! А напішыце, калі ласка, у каменце ў нашых групах колькі слоў пра сябе. Хочацца пабольш ведаць пра сваіх чытачоў. І чаму чытаеце «Думкі ўслых»…
3-5 балаў. Час ад часу заходзіце «ў госці»? Але таго самага часу на чытанне не стае з-за ўласнай працы і будзённых спраў? Разумею. І не ў крыўдзе. Але ж, бывае, штосьці і карыснае сустракаецца, праўда? Так што заходзьце часцей! Заўсёды рада!
1-2 балы. Чытаеце толькі пару разоў у месяц? А раптам прапусціце сапраўды штосьці карыснае і важнае? Што вам вельмі-вельмі патрэбна ў пэўны момант?!
0 балаў. А вы ў нас першы раз?! Шчыра вітаем! Усе допісы ў блогу «Думкі ўслых» – тут. Выбірайце, што даспадобы…