Site icon Слушна

Урослы пазногаць, або 5 эфектыўных спосабаў прадухілення аніхакрыптозу

  • Аксана Жураўлёва
    • Урослы пазногаць (аніхакрыптоз)

    Урастанне пазногця ў скуру (аніхакрыптоз) можа зрабіць жыццё любога чалавека невыносным. Хадзіць робіцца балюча, гнайнік, які ўтвараецца на пазногцевым валіку, можа выклікаць непрыемныя адчуванні не толькі пры хадзе, але і падчас начнога сну. Балючай робіцца і сама працэдура гігіены ног.

    Аніхакрыптоз патрабуе неадкладнага звароту да спецыяліста для прадухілення развіцця цяжкіх ускладненняў.

    Урослы пазногаць

    Прычыны ўрастання пазногця

    Часцей за ўсё ўрастанне пазногця адбываецца на вялікіх пальцах ног.

    Нашэнне цеснага абутку – адна з прычын з'яўлення дадзенай праблемы. Асабліва гэта тычыцца прадстаўніц прыгожага полу, якія ў пагоні за модай часта забываюцца на сваё здароўе.

     
    Ірына Глумава
    Вядучы спецыяліст «Цэнтра па догляду ступні», майстар апаратнага педыкюру
    У выніку сціскання пальцаў нагі пазногаць уціскаецца ў пазногцевы валік, пры гэтым траўміруючы скуру.

    Варта памятаць, што форма і даўжыня пазногцевых пласцінаў на нагах павінны вызначацца не эстэтычнымі меркаваннямі, а такімі фактарамі, як пастаянная нагрузка на ніжнія канечнасці і нашэнне пераважна закрытага абутку.

     
    Ірына Глумава
    Вядучы спецыяліст «Цэнтра па догляду ступні», майстар апаратнага педыкюру
    Правільная форма пазногцевай пласціны – гэта квадрат са злёгку закругленымі бакамі. Лепей за ўсё падстрыгаць пазногці не нажніцамі, а індывідуальнымі кніпстэрамі або абцужкамі з памерам рабочага палатна, які адпавядае памерам пазногцевай пласціны чалавека, якому пазногці стрыгуць. Калі дзіцяці – з маленькім рабочым палатном. Стрыгчы пазногці дзецям трэба раз у паўтары-два тыдні, бо ў іх хуткасць росту вышэйшая, чым у дарослых. А дарослым – раз у два-тры тыдні. Узімку пазногці растуць больш павольна, улетку – хутчэй, і гэта таксама трэба ўлічваць.

    Правілы падстрыгання пазногцяў

    1. Пазногці заўсёды павінны мець вольны край.

    2. Падстрыгаць на адлегласці 1-2 мм ад пазногцевага ложа..

    3. Лінія зрэзу павінна быць прамой.

    4. Вострыя вуглы неабходна акругліць абцугамі.

    5. Вольны край пазногця варта чысціць ад назапашанага скурнага адлучэння і валокнаў драўлянай або пластмасавай палачкай, толькі не глыбока.

    6. У завяршэнні працэдуры апрацаваць пазногці антысептыкам і касметычным алеем.

     
    Ірына Глумава
    Вядучы спецыяліст «Цэнтра па догляду ступні», майстар апаратнага педыкюру
    У пазногця павінен застацца вольны край. Цалкам яго прыбіраць не трэба. Потым можна трошкі падпілаваць (калі гэта робіцца ў хатніх умовах), але толькі не металічнымі пілкамі, бо яны спрыяюць расслаенню пазногця. Працэдуру абавязкова праводзіць насуха. Вільготныя ці мокрыя пазногці павялічваюць верагоднасць таго, што вы пакароціце больш пазногцевай пласціны, чым неабходна. Пазногці, убіраючы 80% вільгаці, робяцца друзлымі і порыстымі. За кошт гэтага можна памыліцца і ў правільнай даўжыні зрэзу.

    Асаблівасці будовы пазногця таксама могуць быць прычынай яго ўрастання. Калі ў вас шырокі друзлы каляпазногцевы валік і тонкая пазногцевая пласціна – гэта падстава надаваць больш увагі сваім пазногцям. Пры правільным падборы абутку і своечасовым педыкюры праблем з урастаннем пазногця можна пазбегнуць.

    Траўміраванне пазногцевай пласціны можа прывесці да парушэння натуральнага напрамку росту пазногця і стаць прычынай, акрамя аніхакрыптозу, шматлікіх іншых праблем. Любая рана, нават самая маленькая, уяўляе сабой рызыку заражэння герпесам, грыбковымі і бактэрыяльнымі інфекцыямі. Грыбковая патагенная флора можа пранікаць і ў дзіцячую скуру, таму абавязкова трэба аглядаць ногі на прадмет цэласнасці скурных пакроваў і пазногцевай пласціны.

    Пры грыбковых захворваннях пазногці наогул дэфармуюцца. Сфармаваныя нарасты прыводзяць да зруху мяккіх тканак і, як вынік, да аніхакрыптозу.

    У 90% насельніцтва ёсць праблема плоскаступнёвасці, і гэта таксама можа быць адной з прычын урастання пазногця.

     
    Ірына Глумава
    Вядучы спецыяліст «Цэнтра па догляду ступні», майстар апаратнага педыкюру
    Пры дэфармацыі ступні яе зводы апускаюцца, а нага пашыраецца. У гэты момант пры нагрузцы на ступню пазногаць можа ўціскацца ў скуру. Паколькі людзі мяняюць абутак не кожныя два гады, як гэта трэба, пры плоскаступнёвасці, што ўтварылася, і нашэнні старога абутку адбываецца яшчэ большае павелічэнне ціску на нагу.

    Яшчэ адной прычынай дэфармацыі пазногця могуць стаць лішняя вага і ацёкі.

    Пры цукровым дыябеце педыкюр – гэта жыццёва неабходная працэдура, асабліва пры развіцці такога цяжкага ўскладнення захворвання, як дыябетычная ступня.

    У гэтым выпадку догляд ног лепей даверыць прафесійнаму майстру па педыкюры. Гэта дасць магчымасць выключыць нават мінімальныя рызыкі атрымання траўмы, якія могуць пагоршыць стан ступняў.

    Як пазбегнуць урастання пазногця?

    • Падбірайце зручны абутак.
    • Падстрыгайте пазногці правільна.
    • Сачыце за масай цела: вага павінна адпавядаць росту.
    • Пастарайцеся пазбягаць траўміравання.
    • Не дапускайце інфіцыравання пазногцевай пласціны.

    Не забывайцеся сачыць за сваім здароўем і прыслухоўвацца да парадаў прафесіяналаў. Выконвайце ўсе правілы і хаця б раз на месяц наведвайце спецыяліста па педыкюры. Гэта дапаможа пазбегнуць праблемы ўрастання пазногця і забяспечыць здароўе і прыгажосць вашых ног.

    https://bel.24health.by/parady-pa-doglyadze-nog-u-stalym-uzrosce/

     

    Exit mobile version