Выстаўка жывапісу, скульптуры ці графікі — папулярны від мастацкіх мерапрыемтваў у нашай краіне. Але часам хочацца пазнаёміцца з іншымі творчымі жанрамі, даведацца цікавыя факты пра розныя напрамкі.
Так, напрыклад, на мінулым тыдні ў прасторы ZAL #2 адкрылі выстаўку сучаснага ляўкасу «Сувязі», якая стала прыемным сюрпрызам для аматараў мастацтва.
«Ляўкас» — слова грэцкае, якое пазначае «белы», «светлы». Калі перавесці старажытную назву сталіцы Кіпра — Лефкасія — літаральна, то атрымаецца «белы горад». Наогул, ляўкас — гэта белы грунт (мел з клеем, замешаны на льняным алеі), якім іканапісцы пакрывалі дошку, перад тым як пачаць пісаць абраз.
Ляўкас дазваляе фарбе і перш за ўсё золату, якое выкарыстоўваюць для фону, моцна трымацца на дошцы. Наносіцца ён тонкімі пластамі і старанна шліфуецца. Тэхніка ляўкаса можа адрознівацца, але асноўнымі складнікамі з'яўляюцца мел, клей, ільняны алей. Пласты ляўкасу робяць тонкімі, і кожны пласт добра прасушваецца, што можна вызначыць па колеры.
Выстаўка сучаснага ляўкаса «Сувязі» прэзентуе найбольш актуальных аўтараў, якія працуюць у гэтай тэхніцы, гэта Maya Impression, Юрый Алісіевіч, Анастасія Каліноўская, Лізавета Кобер, Паліна Корзун-Фомчанка, Вольга Мельнік, Крысціна Мельнік-Субцэльная, Таццяна Савік, Антон Шапо, Тамара Шэлест, Наталля Шкраба, Андрэй Якубаў, Лізавета Янкова і Аляксандр Яноўскі.
У сваіх работах мастакі даследуюць баланс паміж палямі колеру і формы, які перадае найбольш дакладныя адчуванні ад таго ці іншага ландшафту. Важную ролю ў стварэнні абстрактных кампазіцый, надзвычай складаных па структуры, але ў той жа час мінімалістычных і непазнавальных, адыгрывае святло. Калі ляўкас паліруюць асабліва старанна, яно у канцы работы, пасля нанясення фарбаў, мякка свеціцца, ствараючы эфект лёгкага ззяння.
Выстаўка атрымалася, безумоўна, унікальная, таму і ўвага да яе вялікая. Беларускі аўтары змаглі прафесійна адлюстраваць не толькі тэхніку, але і сэнс сваіх работ. Завітаўшы ў выставачную прастору, вы паглыбіцеся ў сапраўдныя мастацкія эмоцыі і адчуеце неверагодную энергію аўтараў, якая літаральна прабіваецца праз іх творчасць.
https://bel.24health.by/shto-za-dudzinka-takaya-ramantyka-belaruskaj-pryrody-u-pejzazhax-georgiya-mixejchyka/