Першае адукацыйнае мерапрыемства «ТатаPro» у фармаце оўпэн-класаў пройдзе ў Мінску 15 верасня. У гэты дзень паверхі ГЦ «Gallerea Minsk» ператворацца ў... пакоі тыповай кватэры. Наведаўшы іх, таты змогуць атрымаць адказы на ўсе пытанні, якія тычацца выхавання, догляду, харчавання і бяспекі дзіцяці. Сярод спікераў – вядучыя эксперты ў галіне аховы здароўя, а таксама вядомыя артысты і спартсмены, якія падзеляцца вопытам бацькоўства, раскажуць пра свае перажыванні і страхі. Дарэчы, арганізатары запрашаюць да ўдзелу ў оўпэн-класе не толькі тат, але і тых мужчын, якія толькі рыхтуюцца стаць імі.
«ТатаPro» стаў лагічным працягам маштабнага рэспубліканскага кангрэса «МамаPro», які стартаваў у Беларусі ў леташнім кастрычніку і пабываў у кожным абласным цэнтры нашай краіны.
Праграма мерапрыемства будзе падзелена на некалькі пляцовак (пакояў). Як распавяла кіраўнік праекта «Pro», акушэр-гінеколаг Дыяна Мардас, на «Кухні» выступяць спецыялісты па харчаванні, раскажуць пра ўвядзенне прыкорму, харчаванне падчас планавання цяжарнасці і падчас чакання малога. Параяць, якія прадукты лепш, калі цяжарнасць праходзіць з адхіленнямі ад нормы. Тут жа пройдуць кулінарныя бітвы блогераў, адбудзецца дэгустацыя прыгатаваных страў.
У «Дзіцячым пакоі» эксперты раскажуць пра навыкі догляду малога, нюансы купання, шпацыраў, падбору правільнага адзення і мыцця. Параяць, як трэба падбіраць бяспечную для дзіцяці касметыку. На пытанні тат адкажуць педыятры, алерголагі, спецыялісты па харчаванні, траўматолагі, стаматолагі і іншыя эксперты.
Акрамя гэтага, таты змогуць наведаць «Гараж». У гэтым упадабаным месцы многіх мужчын спецыялісты ахопяць тэмы, якія тычацца бяспекі дзяцей, падзеляцца нюансамі перавозкі малых у аўтамабілях, на роварах і г.д.
У тым, што такія мерапрыемствы неабходны для мужчын, упэўнены і галоўны пазаштатны спецыяліст па ўралогіі і андралогіі Міністэрства аховы здароўя, доктар медыцынскіх навук Дзмітрый Ніткін.
Акрамя гэтага, дадаў эксперт, не можа не радаваць сучасная тэндэнцыя, калі мужчыны пачынаюць загадзя клапаціцца пра сваё здароўе і будучыню, а не наведваць уролага толькі калі ўзнікае праблема ці з падачы сваёй другой паловы.
Марына Арцёменка, намеснік начальніка аддзела народанасельніцтва, гендарнай і сямейнай палітыкі Міністэрства працы і сацыяльнай абароны, адзначыла, што такія праекты, як «ТатаPro», «арганічна дапаўняюць намаганні дзяржавы па павышэнні захопленасці бацькоў у развіцці і выхаванні дзяцей».
Узмацніць ролю бацькоў у выхаванні дзяцей закліканы і змены ў Працоўным кодэксе, якія былі ўнесены па ініцыятыве міністэрства. Яны ўжо прыняты ў першым чытанні Палаты прадстаўнікоў Нацыянальнага сходу Беларусі. У дакуменце ўтрымліваецца шэраг навін. У прыватнасці, прадастаўленне бацьку на працягу першых шасці месяцаў пасля нараджэння дзіцяці кароткачасовага 2-х тыднёвага адпачынку для догляду немаўляці сумесна з мамай.
Дарэчы, на ідэю стварэння оўпэн-класаў для тат каманду «Pro» падштурхнула менавіта размова з бацькамі ў рамках шасці кангрэсаў «МамаPro».
Пачатак «вучобы» на оўпэн-класах у 12.00 15 верасня.
Матэрыялы на сайце slushna.by носяць інфармацыйны характар і прызначаныя для адукацыйных мэтаў. Інфармацыя не павінна выкарыстоўвацца ў якасці медыцынскіх рэкамендацый. Ставіць дыягназ і прызначае лячэнне толькі ваш урач. Рэдакцыя сайта не нясе адказнасці за магчымыя негатыўныя наступствы, якія ўзніклі ў выніку выкарыстання інфармацыі, размешчанай на сайце slushna.by
