Больш за 300 дызайнераў, 40 фатографаў і дзясяткі мадэляў са 115 навучальных устаноў Беларусі ўзялі ўдзел у конкурсе «Млын моды», які даў магчымасць маладым дызайнерам не толькі паказаць уласныя ўменні, але і пераняць вопыт у старэйшых калег.
Эксперты з Масквы, Санкт-Пецярбурга, Іванава і Алматы падчас конкурсу правялі для ўдзельнікаў адукацыйныя семінары: расказалі, як прасоўваць калекцыі з дапамогай выставак, пазнаёмілі са сваімі традыцыямі і праектамі. Выстаўку фіналістаў XXXIII Рэспубліканскага фестывалю-конкурсу моды і фота прадставілі 3 чэрвеня ў Нацыянальным мастацкім музеі Беларусі.
Падчас адкрыцця выстаўкі яе ўдзельнікі прагаласавалі за лепшую работу. Прыз сімпатый гледачоў выйграла студэнтка Віцебскага дзяржаўнага тэхналагічнага універсітэта Дар'я Нагавіцына з работай «Цудоўная намітка».
Падчас стварэння фота аўтар натхнялася беларускім сімвалам жаночай прыгажосці: наміткамі, якія ў кожным рэгіёне былі асаблівымі і мелі свой сакральны сэнс.
Яны маглі мець розную форму або арнамент у залежнасці ад рэгіёна. Узоры, якія Дар’я выкарыстоўвала на фатаграфіях, захоўваюцца ў музеі ВДТУ на кафедры дызайну і моды.
—Увасаблялася мая ідэя досыць хутка, таму што мне дапамагалі мой кіраўнік, аднагрупніца і маці, — патлумачыла аўтар. — Я ўдзельнічаю ў конкурсе першы раз, і для мяне гэта вельмі цікавы і вялікі вопыт.
Праект «Мой Мінск. Праз мастацтва і моду» Ксеніі Хаджынавай з Цэнтра дадатковай адукацыі дзяцей і моладзі «Светач» Мінска натхнёны работамі, прадстаўленымі ў Нацыянальным мастацкім музеі. На фатаграфіі можна ўбачыць дзяўчыну, якая стаіць на Нямізе. Яна апранута ў сукенку з карціны Мая Данцыга «Мой Мінск». Уся ідэя праекта заключалася ў тым, каб паказаць, як моцна змянілася архітэктура Мінска і як у яе ўпісаліся класічныя беларускія карціны. Сукенку створана з паперы.
Кіраўнік узорнай студыі «Ледзі дасканаласць» Цэнтра творчасці дзяцей і моладзі Барысаўскага раёна Вольга Вярбіцкая расказала, што работа «Векавыя традыцыі праз прызму сучаснасці» гаворыць аб сувязі мінулага і будучыні, а таксама прадстаўляе іх родны горад.
5 чэрвеня былі падведзены вынікі фестываля. У намінацыі «Школа моды» лепшай прызнана калекцыя адзення для дзяцей «Мода з камоды» Святланы Жардзецкай і Дзмітрыя Папаўца з Віцебскага дзяржаўнага індустрыяльна-тэхналагічнага каледжа. Аўтарамі лепшай калекцыі адзення для падлеткаў прызнаны Святлана Івашына і Анжэла Аляксеева-Салашэнка з Мінскага дзяржаўнага каледжа лёгкай прамысловасці і комплекснай лагістыкі (калекцыя «Абрадvея»). Лепшай мужчынскай калекцыяй прызнана серыя «Fata Morgana», аўтар якой — Надзея Нікуліна з Гомельскага дзяржаўнага каледжа бытавога абслугоўвання. Аўтарам лепшай жаночай калекцыі пад назвай «Трансгенерацыя» стала Дыяна Касцюк (Беларуская дзяржаўная акадэмія мастацтваў).
Пераможцай у намінацыі «Майстар моды» прызнана Алена Пагірніцкая з калекцыяй «OLD Look». У намінацыі фота выйграла студэнтка Віцебскага дзяржаўнага тэхналагічнага ўніверсітэта Дар'я Нагавіцына з работай «Цудоўная намітка».
