У сярэдзіне лета ў паўночным Правансе квітнее лаванда. Лавандавыя палі — візітная картка Францыі. Сюды прыязджаюць турысты, каб натхніцца прыгажосцю і неверагодным пахам раслін, едуць тысячы людзей, гатовыя плаціць сотні еўра проста за магчымасць зрабіць сэлфі або зладзіць фотасесію на фоне прыгожых кветак.
Сёння можна перанесціся ў Праванс і без «шэнгена» у пашпарце. Лавандавыя палі вырошчваюць ужо каторы год у самых розных кутках Беларусі
Спрадвеку лаванду вырошчваюць для нарыхтоўкі лекаў, запраў. Сёння фіялетавая кветка таксама актыўна выкарыстоўваецца чалавекам, але яна стала дадаткова несці дэкаратыўную мэту – у лавандавых палях усё часцей арганізоўваюць сямейныя, дзіцячыя фотаздымкі і love story. Давайце даведаемся, дзе ў нашай краіне мы можам скарыстацца магчымасцю, каб убачыць гэты цуд на ўласныя вочы.
LavandaMia — гэта невялікая сямейная майстэрня, ферма ў 30 км. ад Пінска і інтэрнэт-крама сухаколернай фларыстыкі і тавараў з лаванды. Ганна Мацвеева і Віталь Кавалевіч ужо некалькі гадоў вырошчваюць пышную, прыгожую, яркую лаванду. Сямейная пара стварае букеты, а падчас квітнення рэдкай для Беларусі расліны з задавальненнем прымаюць гасцей, гатовых фатаграфавацца ў фіялетавым полі.
Свой Праванс ёсць пад Гомелем (Рудня-Споніцкая, Веткаўскі раён, Гомельская вобласць). Велізарныя лавандавыя палі дазваляюць адначасова знаходзіцца адразу некалькім сем'ям. Для фотасесіі ўсё прадумана: можна ўзяць у арэнду паветраныя сукенкі, кошыкі, саламяныя капялюшыкі. Гаспадары просяць папярэдне патэлефанаваць і папярэдзіць аб прыездзе. А пасля фотасесіі тут можна набыць букет свежай лаванды — каштуе ён зусім танна.\
Маладое і невялікае лавандавае поле знаходзіцца ўсяго за 80 км. ад Мінска і за 20 км. ад Маладзечна (Мінская вобласць, Вілейскі раён, в. Дуровічы). Парадаваць сябе і сваіх каханых букетам духмянай лаванды тут прапануюць круглы год, а ў ліпені з радасцю складуць букет са свежазрэзанай лаванды. Падчас квітнення расліны госці змогуць зрабіць фота ў лавандавым полі.
Віла «Лаванда Лепей» размясцілася на беразе возера ў Лепельскім раёне. Прыехаўшы сюды, вы сапраўды будзеце забяспечаны прыгожымі відамі: з аднаго боку — ціхая вада, з другога — квітнеючая лаванда. Правесці фотасесію тут можна ў ліпені. Потым лаванду будуць збіраць на букеты і выкарыстоўваць у кулінарыі.
Гродзенская вобласць, аграгарадок Луцкаўляны. На гэтым лавандавым полі кожны зможа адчуць сябе мастаком, а цудоўны лавандавы водар будзе толькі садзейнічаць пошуку натхнення для творчасці як у кадры, так і за ім. Для гэтага ёсць спецыяльны рэквізіт — мальберт. Трэба ўзяць з сабой адпаведнае адзенне і настрой, тады здымкі сапраўды будуць радаваць шмат гадоў. Тут таксама можна набыць сухацветы, букетыкі лаванды і гідралат.
Lubeckaya_lavanda — гэта лавандавае поле, якое ўвасобілі ў жыццё тры сястры. Кветкі растуць на тэрыторыі векавой сядзібы ў вёсцы Любкі Вілейскага раёна. Красаванне лаванды — добрая нагода наведаць месца, якое захавала дух традыцыйнай культуры. Таксама тут можна натхняцца народнай культурай Беларусі.
https://bel.24health.by/legendy-kosava-cikavyya-fakty-pra-palac-puslouskix-muzej-syadzibu-tadevusha-kascyushki/
