Зараз хіміятэрапія пухлінаў з'яўляецца адным з самых распаўсюджаных метадаў лячэння анкалагічных захворванняў. Але, на жаль, гэты метад лячэння выклікае розныя пабочныя эфекты, якія ўносяць пэўны дыскамфорт у паўсядзённае жыццё. Спалучаючы правільна падабраную хіміятэрапію і лепшае, што могуць прапанаваць дыетолагі ў пытаннях харчавання, вы зможаце даць свайму арганізму энергію, неабходную для лячэння і аднаўлення.
Я раскажу пра найбольш распаўсюджаныя пабочныя эфекты і пра тое, як з гэтымі праблемамі можна справіцца пры дапамозе правільнага рэжыму харчавання.
Пры запорах
Запор вельмі часта развіваецца на фоне лячэння супрацьпухліннымі прэпаратамі. Калі ўрач, які лечыць, парэкамендаваў вам звярнуцца да слабіцельных медыкаментаў, прытрымлівайцеся гэтай парады. Але запор лягчэй прадухіліць, чым лячыць яго пасля ўзнікнення.
Акрамя гэтага, харчаванне можа стаць вашым саюзнікам у прафілактыцы і рэабілітацыі. Паступова павялічвайце спажыванне прадуктаў з высокім утрыманнем клятчаткі, уключаючы іх у штодзённы рацыён і перакусы. Добрай крыніцай клятчаткі з'яўляюцца суцэльназерневыя прадукты і вотруб'е.
Гэта хлебабулачныя вырабы, аўсяная каша, але не са шматкоў «Геркулес», а з аўсянага зерня, карычневы рыс, свежыя садавіна, агародніна, бабовыя, гарох і сачавіца, а таксама арэхі і насенне. Піце шмат вадкасці, калі гэта не супрацьпаказана па медыцынскіх паказаннях, але памятайце, што неабходна сачыць і лічыць усе вадкія прадукты, напоі і ваду ў вашым рацыёне.
Імкніцеся звесці спажыванне агульнай колькасці вадкасці да 30 мл на 1 кг вашай вагі. Абавязкова пракансультуйцеся з вашым урачом пры прыёме розных харчовых дабавак.
Калі мучыць млоснасць
Млоснасць і ваніты – гэта медыцынская праблема, якую нярэдка даводзіцца вырашаць з дапамогай медыцынскіх прэпаратаў. Аднак, калі вы адчуваеце млоснасць з невялікімі ванітамі ці без іх, правільнае харчаванне ў правільны час можа дапамагчы.
Разбіце ваш рацыён на максімальна магчымую колькасць прыёмаў ежы: як правіла, не менш за шэсць разоў на дзень. Неабходна, каб ваш страўнік быў пастаянна напоўнены невялікай колькасцю ежы.
Ужывайце натуральныя прадукты для зніжэння прыступаў млоснасці і ванітавальнага рэфлексу, напрыклад, імбір.
Не ешце ежу гарачай, дайце ёй астыць да пакаёвай тэмпературы. Пазбягайце тлустага і смажанага. Ваду неабходна піць не падчас ежы, а паміж яе прыёмамі.
Пазбягайце рэзкіх пахаў і прадуктаў з моцным водарам. Паспрабуйце падчас гатавання ежы знаходзіцца ў кухні як мага радзей.
Пры ўзнікненні дыярэі
Падчас моцнай дыярэі вам спатрэбіцца прыём лекаў. Але і харчаванне ў гэты перыяд дапаможа справіцца з такім непрыемным момантам. Зноў-такі, прымайце свой сутачны рацыён, разбіўшы яго не менш чым на шэсць прыёмаў. Пры моцных паносах арганізм губляе шмат вадкасці і мінералаў. Для папаўнення водна-солевага балансу ўключыце ў рацыён пэўную колькасць салёных прадуктаў: крэкераў, сухарыкаў ды іншага. Заўсёды майце з сабой запас пітной вады або напояў, але не газаваных і без кафеіну. Піце ваду патроху, маленькімі глыткамі, паміж прыёмамі асноўных страў.
Некаторыя хіміятэрапеўтычныя прэпараты могуць выклікаць боль у горле і сухасць у роце. Калі ваш урач выпіша вам прэпараты, якія дапамогуць пазбавіцца ад такіх пабочных эфектаў, прымайце іх, але не забывайцеся, што з дапамогай дыеты можна паменшыць сімптомы раздражнення ў ротавай поласці.
Паспрабуйце ўключаць у свой рацыён мяккія і вадкія прадукты, такія, як смузі, цёплыя супы, вадкую аўсяную кашу, ёгурт, яйкі ўсмятку, пудынгі і запяканкі, бульбяное пюрэ і кансерваваную садавіну. Гатуйце ежу з даданнем малака, вяршкоў, смятаны і іншых мяккіх соусаў. Піце чай без утрымання кафеіну.
Знізіць эфект сухасці ў роце дапаможа замарожаная садавіна: вінаград, кавалачкі персіка або абрыкоса, кавуна. Пазбягайце ўжывання кіслых прадуктаў і напояў, цытрусавых, сухіх і хрумсткіх вырабаў, гарачай кавы, алкаголю і прадуктаў з пасыпкай насеннем і арэхамі.
Пры зніжэнні апетыту
Як правіла, падчас прыёму хіміяпрэпаратаў зніжаецца апетыт. Гэта можа перашкодзіць вам атрымліваць неабходнае паўнавартаснае харчаванне пры лячэнні анкалагічных захворванняў. Калі вам не хочацца есці, паспрабуйце наступнае: разбіце свой рацыён на невялікія порцыі, трымайце розныя віды перакусу пад рукой.
Спантаннае ўзнікненне апетыту на непрацяглы час характэрнае для гэтага этапу вашага лячэння. Старайцеся гатаваць толькі тыя стравы, якія вы больш за ўсё любіце, няхай і ў невялікай колькасці, і ў любы час дня і ночы.
Паменшыце ў сваім рацыёне прадукты, багатыя на клятчатку, бо яна спрыяе хуткаму пачуццю насычэння і падаўлення апетыту. Піце абястлушчаныя малако і кісламалочныя прадукты.
Карысны і натуральны 100% сок.
Выключыце нізкакаларыйныя прадукты і напоі, такія як кава і чай.
Пры рэзкім наборы вагі
З іншага боку, хіміятэрапія можа выклікаць і імклівае павелічэнне масы цела. Асабліва гэта звязана з «заяданнем» стрэсу ці пачуцця трывогі, якія чалавек атрымлівае пры паведамленні пра сваё анкалагічнае захворванне.
Пры перакусах выбірайце нізкакаларыйныя прадукты з высокім утрыманнем вітамінаў і мінеральных рэчываў – садавіну і агародніну. У гэтым выпадку неабходна прытрымлівацца ўсіх правілаў рацыянальнага, здаровага харчавання. І варта звярнуцца да псіхатэрапеўта – для лячэння стрэсу і зняцця сімптомаў трывожнасці.
Існуе цэлы комплекс мерапрыемстваў – кансультацыі ў спецыялістаў, групы падтрымкі, арт-тэрапія, масаж, водныя працэдуры.
Варта мець стасункі са сваімі блізкімі, роднымі і сябрамі. Не трэба замыкацца ў сабе. Актыўны лад жыцця, лёгкая хада, прагулкі з'яўляюцца лепшым рэцэптам ад стомы і дапамогуць падтрымліваць здаровую вагу.
Дзякуючы цеснаму кантакту з вашым анколагам і камбінацыі медыцынскага і дыеталагічнага кіравання пабочнымі эфектамі вы зможаце кантраляваць большасць негатыўных сімптомаў пры хіміятэрапіі.
