Раней такое печыва можна было знайсці ў любой школьнай сталовай і яно часта прадавалася ў прадуктовых крамах. Кольцы гатуюцца з пясочнага цеста, таму яны атрымліваюцца вельмі рассыпістыя. Прыгатаваць іх проста, выпечка будзе вельмі прыемным дэсертам да гарбаты.
Пакрокавы рэцэпт арахісавых кольцаў прапануе блогер і гаспадыня харчэўні ў Тураве Алена Браніславаўна.
Інгрэдыенты
- Мука — 350 гр.
- Мяккае сметанковае масла — 180 гр.
- Цукровая пудра — 120 гр.
- Разрыхляльнік — 1 ч.л
- Соль — дробка
- Яйка — адно невялікае
- Для змазкі — 1 яйка
- Для ўпрыгожвання — арахіс
Спосаб прыгатавання
Масла і цукровую пудру ўзбіць да атрымання белай паветранай масы.
Дадаць яйка і яшчэ раз узбіць.
У муку дадаць разрыхляльнік і соль, добра перамяшаць.
Дадаць муку ў масляную сумесь і замясіць цеста.
Цеста атрымаецца мяккае і падатлівае.
Накрыць цеста ручніком і пакінуць у холадзе на 30 хвілін.
Арахіс здрабніць, але не вельмі дробна.
Цеста раскатаць таўшчынёй 0,5 см.
Вырубкамі большага і меньшага дыяметру выразаць кольцы.
Кожнае кальцо змазаць узбітым яйкам, абсыпаць арахісам.
Выпякаць 15 хвілін пры 180 градусах.
Смачна есці.