Агульнавядомы навуковы факт — зносіны з жывёламі зніжаюць узровень стрэсу і зараджаюць станоўчымі эмоцыямі. У Беларусі ёсць нямала месцаў, дзе за звярамі можна не проста паназіраць, але і пагладзіць, і пакарміць іх
«Слушна» прапануе карысную падборку паркаў з жывёламі, дзе вы зможаце адпачыць усей сям’ёй і атрымаць незабыўныя эмоцыі.
да зместуАгратурыстычны комплекс «Гарадзенскi маёнтак «Каробчыцы»
Гродзенскі раён, в. Каробчыцы
«Гарадзецкi маёнтак «Каробчыцы» — гэта старажытная шляхецкая сядзіба ў стылі 19 стагоддзя. Тэрыторыя комплексу займае 54 гектары. Вялікая частка маёнтка — запаведнік, таму патрапіць туды можна толькі на брычцы, фаэтоне або дыліжансе.
Комплекс уключае 5 вадаёмаў, кожны з якіх заселены рыбай. А вакол — масткі, альтанкі, клумбы. На тэрыторыі комплексу жыве шмат жывёл. Частка з іх жыве ў міні-заапарку, а частка знаходзіцца ўнутры запаведнай тэрыторыі на вольным выпасе.
У самым цэнтры маёнтка свабодна гуляюць алені, казулі, лані, камерунскія козы, які і кабаны. А ў вальерах міні-заапарка жывуць больш экзатычныя жывёлы і птушкі: вярблюдзіца, кенгуру ды іншыя. Некаторых звяркоў дазваляецца пагладзіць і нават пакарміць, але толькі кормам, набытым на тэрыторыі комплексу.
да зместуПарк-гатэль «Версаль»
Мінская вобл., Пухавіцкі рённ, аг. Сяргеевічы
На тэрыторыі гатэля раскінуты французскі парк у 25 гектараў са святломузычным фантанам і міні-заапаркам з вялікай колькасцю цікавых і рэдкіх жывёл.
У заасадзе жывуць паўночныя і плямістыя алені, белыя паўліны, рысі, яноты-паласкуны, венцаносныя жураўлі, дагестанскія туры, палярныя совы, ваўкі і яшчэ шмат іншых жывёл і птушак. Звяроў тут можна карміць, але толькі кормам, набытым на рэсэпшэне гатэля. Адпраўляючыся на шпацыр у заапарк, удакладніце на сайце парк-гатэля ці не будзе зачынена яго тэрыторыя для правядзення пэўных мерапрыемстваў.
да зместуГродзенскі заапарк
Па-першае, уражвае дата стварэння заапарка — 1927-й год. Па-другое, доўгія гады гэта было адзінае месца ў краіне, дзе можна было ўбачыць дзікіх жывёл накшталт леапардаў і тыграў.
А пачыналася ўсё з завуголка пры мужчынскай гімназіі ў Гродне. Там налічвалася ўсяго 17 відаў жывёл. А самым першым жыхаром лічыцца звычайны бабёр, якога асабіста прывёз ініцыятар стварэння заапарка ў Гродне Ян Каханоўскі. Па легендзе, ён атрымаў тэлеграму аб параненай жывёле. І, па сутнасці, выратаваў бабра ад немінучай смерці.
Цяпер у Гродзенскім заапарку налічваецца больш за тры тысячы жывёл – дробныя і буйныя драпежнікі, капытныя, рэптыліі, птушкі…
да зместуАграсядзібны комплекс «Дукорскі маёнтак»
Пухавіцкі раён, а/г Дукора, вул. Школьная, 15
«Дукорскі маёнтак» — старажытнае месца, якім некалі валодалі вядомыя ўсім Сапегі і Агінскія. На тэрыторыі комплексу аўтэнтычных майстэрняў знаходзяцца гамарня, заапарк і, вядома, знакаміты перавернуты дом.
У сядзібе ёсць заасад, які налічвае каля паўсотні жыхароў. Тут можна ўбачыць не толькі жывёл сельскага двара — гусей, свіней, курэй, коз, авечак, аслоў, трусоў, але і экзатычныя віды - вярблюда, страусаў, паўлінаў, якаў, аленяў, ваўкоў, лань. Жывёл можна карміць.
да зместуЦэнтр экалагічнага турызму «Станькава»
1,5 км. ад в. Станькава, Дзяржынскага раёна, Мінскай вобласці (дарога Самахвалавічы — Негарэлае)
Цэнтр уключае ў сябе вялікі комплекс тэматычных пляцовак: заасад, канеферму, ваенна-гістарычны комплекс «Партызанскі лагер», гасцявыя домікі, кафэ і многае іншае.
У заасадзе прадстаўлена звыш 40 відаў птушак і млекакормячых. Тут можна ўбачыць страусаў, фазанаў, паўлінаў, больш за 15 відаў курэй, ліс, янотаў, зуброў, якаў, высакародных і плямістых аленяў, лам, муфлонаў, тыграў, рысь, льва, а таксама неверагодных сябровак мядзведзіцу Васілісу і сабачку Анфісу.
Усе жывёлы размешчаны ў сваіх прасторных асобных вальерах.
да зместуАграсядзіба «NatUrlich»
Брэсцкая вобл., Баранавіцкі раён, в. Дэколы, вул. Бярозавая, д. 4
«NatUrlich» — унікальнае месца, аналагаў якому ў Беларусі цяжка і ўзгадаць. Аграсядзіба належыць сямейнай пары. Акрамя заасада на тэрыторыі сядзібы ёсць дом са спальным пакоем і кухняй з усёй неабходнай тэхнікай.
Для таго, каб пазнаёміцца з насельнікамі заапарка, не абавязкова арандаваць жыллё. Сюды можна прыехаць на некалькі гадзін і ўдосталь пагуляць са звяркамі. У вальерах жыве каля 40 жывёл: авечкі, козы, фазаны, гусі, куры, яноты, лісы. У заапарку ёсць і экзатычныя звяры: афрыканскія страўсы, поні, альпакі, насухі, рысі, ваўкі, яноты, дзікабразы і нават тыгр.
У «NatUrlich» са звяркамі можна не толькі пакарміць, але і сфатаграфавацца з імі, пагуляць, пагладзіць. У якасці пачастунка для жывёл пойдзе чыстая, пажадана, парэзаная гародніна і садавіна, батон, хлеб. А калі захочаце пакарміць рысь, ліс, ваўкоў, куніцу, харкоў ці насух, падыдзе грам 100 любога мяса без косткі. Бярыце з сабой смачнасці і прыязджайце.
да зместуЛясны заапарк у Бярэзінскім біясферным запаведніку
Сюды варта зазірнуць хаця б таму, што гэта максімальна набліжанае да натуральнага асяроддзе пасялення жывёл. Толькі ўявіце: запаведнымі гэтыя мясціны сталі яшчэ ў 20-я гады мінулага стагоддзя!
Як гаворыцца ў апісанні, прыродаахоўная ўстанова «Бярэзінскі біясферны запаведнік» займае тэрыторыю больш за 108 гектараў, 12 з іх выдзелілі заапарку.
Насельнікаў тут адносна няшмат: 22 дзікіх звяроў, шэсць птушак і 75 хатніх жывёл. Таксама на гэтай тэрыторыі жывуць алень, лань, дзік, казуля, ліса і янотападобны сабака.
да зместуАграэкасядзіба «Хутар Ёдзішкі»
Віцебская вобл., Браслаўскі р-н, х. Ядзішкі
«Хутар Ёдзішкі» — унікальны праект, аналагаў якому няма ва ўсім СНД. Гэта сямейная арганічная ферма з гісторыяй. Тут у гасцей ёсць магчымасць цалкам пагрузіцца ў вясковае жыццё: паспрабаваць сябе ў ролі сапраўднага фермера, а таксама атрымаць асалоду ад смаку натуральных экалагічна чыстых прадуктаў.
На ферме шмат розных жывёл. Некаторыя з іх знаходзяцца на вольным выпасе. Козы, авечкі, трусы свабодна разгульваюць па хутары і часта праяўляюць да гасцей вялікую цікаўнасць. Іх можна пагладзіць і пакарміць. Экскурсія па ферме не з'яўляецца асобнай паслугай, а ўваходзіць у агульную праграму адпачынку на «Хутару Едзішкі».
Аднак, па папярэдняй дамоўленасці гасцінныя гаспадары з радасцю правядуць адмысловую экскурсію, нават калі вы не плануеце арандаваць домік. Дадайце да гэтага шпацыр па прыгожых месцах і неверагодна смачную вячэру ў сямейным рэстаране вясковай кухні, дзе гатуюць з арганічных прадуктаў, вырашчаных сваімі рукамі.
да зместуМагілёўскі заасад
вул. Арлоўскага, в. Буйнічы, Магілёўскі раён
Заасад у прыгарадзе Магілёва — не толькі адна з найцікавейшых славутасцяў рэгіёну, але і па-свойму ўнікальны парк жывёл на тэрыторыі Беларусі. Ён адкрыўся ў 2005 годзе як навучальная лабараторыя Магілёўскага агралесатэхнічнага каледжа імя Арлоўскага. Па задумцы, якую яшчэ з 1990-х выношваў яго дырэктар Георгій Маліноўскі, менавіта тут будучыя леснікі і егеры атрымалі магчымасць вывучаць звычкі жывёл, даглядаць іх, вучыцца шанаваць і берагчы прыроду.
Сёння на плошчы каля 160 гектараў у натуральных умовах вялікіх вальераў жывуць зубры, алені, лані, казулі, ласі, у малых вальерах — рысь, тыгр, мядзведзь, ваўкі, лісы, янотападобныя сабакі... Усяго тут больш за 300 асобін.
Акрамя таго, найважнейшая задача Магілёўскага заасада — рэабілітацыя жывёл, якія хворыя альбо трапілі ў бяду.
Візітка заасада — падарожжа на міні-цягніку па чыгунцы. Сафары-маршрут за некалькі кіламетраў пралягае ўздоўж вялікіх вальераў, дзе на волі жывуць буйныя лясныя насельнікі. Таксама пасажыры могуць палюбавацца цудоўнымі краявідамі і ўбачыць разгалінаваную сістэму каньёнаў, якія з'явіліся на гэтай тэрыторыі яшчэ падчас ледніковага перыяду. Частка аднаго з іх пераўтворана ў маляўнічы вадаём, які насяляюць прадстаўнікі вадаплаўнай фауны.
Таксама ў Магілёўскім заасадзе створаны кантактны заапарк, насельнікаў якога дазволена карміць садавінай і агароднінай, гладзіць і нават браць на рукі.
