Апошнім часам традыцыйны інстытут сям'і перажывае змены. Пары спрабуюць розныя варыянты. Акрамя даўно вядомага «грамадзянскага шлюбу», усё больш людзей, асабліва ў Мінску, выбіраюць такую форму пражывання, як гасцявы шлюб. Што гэта за з'ява? Пра што кажа яго папулярнасць? Разбіраемся разам з 24health.by.
Гасцявы шлюб – такая форма адносінаў, калі муж і жонка афіцыйна рэгіструюць свой статус, аднак пражываюць на розных тэрыторыях, не вядуць сумесную гаспадарку.
Хто выбірае такія адносіны? Часцей за ўсё гэта сталыя асобы ва ўзросце 30-40 гадоў, якія, як правіла, маюць сваё жыллё і звыклы ўклад жыцця, які і не жадаюць мяняць.
Першапачаткова мэтай гасцявога шлюбу заяўляецца імкненне мужа і жонкі захаваць свабоду, не адчуваць кайданоў побыту, пры гэтым маючы сталага партнёра і вечны «цукерачна-букетны» перыяд.
На Захадзе такая форма адносінаў вельмі папулярная. Двое фінансава незалежных людзей сыходзяцца, пры гэтым не асабліва змяняючы свой уклад жыцця.
Самая вядомая зорная пара, якая жыла ў гасцявым шлюбе 15 гадоў, – гарачая італьянская актрыса Моніка Белучы і харызматычны французскі акцёр Венсан Касель. Моніка магла жыць адначасова ў Рыме і Лондане, у той час як Венсан бавіў час у Парыжы. Прычым ініцыятарам такой формы адносінаў быў не раўнівец Касель, а свабодалюбівая Моніка.
Муж і жонка сустракаліся ў перапынках паміж здымкамі і толькі па агульным жаданні. У саюзе нарадзілася двое дачок. Па словах Монікі, толькі гасцявы шлюб і дапамог зрабіць іх адносіны такімі працяглымі па мерках акцёрскіх сем'яў. Праўда, з часам нават пры наяўнасці вольнага часу Моніка і Венсан не спяшаліся сустракацца, не ведалі сяброў і кола стасункаў адзін аднаго. Нямала было і скандалаў, звязаных з рэўнасцю і падазрэннямі ў здрадах.
Арыгінальны выхад захоўваць сваю асабістую прастору знайшлі і знакаміты рэжысёр Цім Бёртан і яго жонка, актрыса Хелена Бонэм Картэр. Некалькі гадоў яны жылі ў розных дамах, якія злучаў падземны тунэль.
Ці можа гасцявы шлюб трывала прыжыцца сярод беларусаў? І каму ён больш патрэбны, мужчынам ці жанчынам? Пра гэта мы запыталіся ў нашых экспертаў:
Меркаванні экспертаў – у нашым відэа.
Адказ на пытанне пра тое, ці заменіць гасцявы шлюб традыцыйны, для нашай краіны хутчэй будзе адмоўным. Але варта прызнаць, што сёння ў трэндзе – уменне быць незалежным і фінансава моцна стаяць на нагах. А гэта значыць, што такія павевы пакінуць свой адбітак і ў адносінах паміж мужчынамі і жанчынамі.
Відэа – Святлана Стахоўская, Генадзь Сукач.
І зноўку... Хочаш-не хочаш, а прымай той факт, што каляндарная восень ужо кіруецца на самым хуткасным электрасамакаце да нас. І застаецца толькі падпяваць Юрыю Шаўчуку і гурту «ДДТ»: «Што такое восень?..» І ў чарговы раз пераконвацца, што і Новы год ужо блізка... І што гэта зусім не жарт. Дакладней, не зусім жарт.
А што ж наша лета-2019? Тое, што «маленькае жыццё»? Было яно ці не было? Месяц засухі, месяц залеваў плюс месяц холаду з залевамі і засухамі...Э-э-эх!
Але я спадзяюся, што ў вас, шаноўныя сябры, усё ж ёсць што прыгадаць пра гэтае лета. І што ўспамінаў пра падзеі з разраду прыемных усё ж больш. Альбо яны больш важкія. Таму рыхтуемся прыгадваць іх падчас каляндарнай восені і... Пражываем яшчэ два дні лета ярка, выразна і запамінальна!
Тым больш, што апошні з іх прыпадае на выхадны.
Планы ёсць?! У мяне асабіста іх багата. Але ж памятаем: «Хочаш пасмяшыць Бога – распавядзі яму пра свае планы». Так што – цс-с-с-с-с-с!!! Кожны сам сабе. А вось пасля – можна і нават трэба.
А хто з якім настроем сустракае гэтую восень? Якая напачатку, будзем спадзявацца, сапраўды толькі каляндарная. Бо хочацца і далей, з разбегу, прама ў лета! Няхай сабе і бабіна... Галоўнае, каб было цёпла, камфортна... Асабліва для тых, у каго ў верасні – адпачынак. Я і сябе зараз маю на ўвазе!:)
Верасень-2019... Якім ён будзе?! Хочацца спадзявацца – грыбным і ягадным. Бо павінны ж выспець журавіны і нарасці баравікоў, чырвонагаловікаў, падасінавікаў, лісічак... Ды каб чыстых! Ну што, заказваем верасню, аматары ціхага палявання?!:)
І няхай бы яшчэ лістота на дрэвах не фарбавалася ў рознакаляровасць. Яно, вядома ж, прыгожа, але зарана. Мы ж лета збіраемся працягнуць, памятаеце?! Так што не спяшайся, Восень, даставаць свае фарбы і апранаць балахон мастачкі. Мы яшчэ палюбуемся зелянінай.
Палюбуемся крамянымі ранкамі і загадкавымі захадамі з чырванню. Гульнёй сонца ў кропельках расы. Пушыстымі астрамі, гладыёлусамі, аксаміткамі. Гульнёй гарэзлівых рыбак у сажалцы. Галоўнае – знайсці на ўсё гэта час.
Як і на тое, каб заняцца нарэшце сваім здароўем. Хаця пляжны сезон, здаецца, прайшоў, але падтрыманне фігуры на ўзроўні не пашкодзіць і ў іншыя поры года. Хаця б ранішняя гімнастыка! Не кажучы ўжо пра спажыванне садавіны ды гародніны. Назапашваем жывыя вітаміны ў арганізме!
Эх, якія ж зараз салодкія дыні! Такая смаката! А яшчэ ж і карысць...
У верасні ўжо не надта хочацца пакупнога чаю. Куды прыемней заварыць духмянай гарбаты і нетаропка піць яе, прыгадваючы пра прыемныя падзеі лета. Асабліва, калі насушылі свайго святаянніку, мяты, мелісы... І яшчэ не ўвесь выпіты ферментаваны, уласнаручна прыгатаваны пару гадоў таму па ўсіх правілах скрыпень (іван-чай).
Калі няма ўжо такога актыўнага шчыравання на летніку, дык вельмі прыемна прагуляцца па лесе, удыхаючы гаючы хваёвы водар. Асабліва, калі непадалёк, як у нас, знаходзіцца не проста лес, а лесапарк са сцежкай здароўя ў ім.
Праўда, апошнім часам гуляць там трэба, перыядычна азіраючыся, каб не трапіць пад колы аматараў ровараў, якія таксама ўпадабалі менавіта гэтыя мясціны. І нічога ж не скажаш і не зробіш, лесапарк – для ўсіх. Толькі вось выхаванне ў кожнага – сваё. Але нічога! Для прагулак можна выбіраць і тую частку мікрараёна, дзе няшмат ездзіць машын, асабліва ўвечары.
Так што, калі разабрацца, нічога асабліва крыўднага няма ў тым, што на парозе ўжо – восень. А хтосьці ж любіць яе яшчэ больш за лета. Па розных прычынах. Таму сустракайма паслязаўтра верасень з добрым настроем і спадзяёмся на розныя прыемнасці!
Калі размова ідзе пра здаровае харчаванне, у большасці людзей (і тычыцца гэта не толькі беларусаў) псуецца настрой. Яшчэ знакамітая Ранеўская казала: «Усё, што прыносіць сапраўднае задавальненне ў гэтым жыцці, альбо амаральна, альбо незаконна, альбо прыводзіць да атлусцення».
Здаровае харчаванне да атлусцення не прыводзіць, нават наадварот. Адпаведна, з сапраўдным задавальненнем у яго нічога агульнага? Адны жорсткія рамкі строгай дыеты, абмежаванні і забароны? Але калісьці людзі верылі, што зямлю трымаюць тры велізарныя чарапахі, а Капернік, Бруна і Галілей пацярпелі, сцвярджаючы, што «яна ўсё ж такі круціцца».
Здаровае харчаванне – гэта не дыета і не сістэма забаронаў і абмежаванняў. Гэта лад харчавання, індывідуальны для кожнага чалавека, у залежнасці ад яго ўзросту, росту, полу, ступені фізічнай і рухальнай актыўнасці, патрэбы ў энергіі.
Здаровай можа лічыцца любая сістэма харчавання, абы яна максімальна садзейнічала ўмацаванню здароўя чалавека. Пры наяўнасці захворванняў яна як мінімум не пагаршае іх цячэнне, максімум – памяншае праявы хваробы, спрыяе больш хуткаму акрыянню або стану ўстойлівай рэмісіі.
Іншымі словамі, хатдог, шаурма і бульба фры не зусім ужо ў чорным спісе. Але калі б ад фастфуду людзі здаравелі на вачах, дачныя градкі даўно зараслі б пустазеллем, капуста з морквай вырадзілася, а ў сажалкавых гаспадарках перавялася б уся рыба…
На думку галоўнага пазаштатнага дыетолага камітэта па ахове здароўя Мінгарвыканкама Марыны Паповай, у здаровага харчавання некалькі складнікаў:
Але гэта ўсё тэорыя, якая ўвогуле-то добра вядомая пераважнай большасці дарослых. І калі верыць сацыялагічным апытанням, дык 40% беларусаў упэўненыя, што вядуць здаровы лад жыцця, у тым ліку старанна працуюць над складаннем штодзённага меню.
Эксперты нагадалі пра здаровы рацыён і чым пагражае няправільнае харчаванне
Але яшчэ прыкладна 40% нашых суайчыннікаў адзначаюць: прынцыпаў здаровага харчавання не прытрымліваюцца. І прычынай называюць не недахоп фінансавых сродкаў на здаровыя прадукты, не прабел у ведах пра карысць і ўплыў іх на здароўе, а адсутнасць настойлівасці і матывацыі. Прасцей кажучы, добрая частка беларусаў жыве ў чаканні дня, калі «смажаны певень дзяўбне». Але тады, часцей за ўсё, адна толькі змена ладу харчавання ўжо нічога не вырашае, адзначаюць эксперты.
Ужо які год запар Мінскі занальны цэнтр гігіены і эпідэміялогіі праводзіць акцыі, прымеркаваныя да Дня здаровага харчавання, які адзначаецца ў жніўні. Мэта – папулярызацыя адказнага стаўлення да выбару ежы, што спажываецца, азнаямленне з лінейкамі прадуктаў, якія адпавядаюць прынцыпам здаровай дыетэтыкі і маюць непасрэдны ўплыў на фарміраванне і ўмацаванне здароўя.
Паўдзельнічаць у падобным мерапрыемстве – добрая магчымасць даведацца, у якім кірунку рухаецца наша харчовая прамысловасць і ў літаральным сэнсе пакаштаваць на смак здаровыя прадукты. Ці то арганізатары выбралі правільнае месца для правядзення акцыі (адзін з самых буйных гандлёвых комплексаў Мінска), ці то зацікаўленых у захаванні свайго здароўя з дапамогай правільнага харчавання сапраўды шмат, але на акцыйнай пляцоўцы яблыку не было дзе ўпасці. Людзі шчыльным колам абступілі столікі з выстаўленай для дэгустацыі прадукцыяй.
– Я нават не ведала, што ў нас такое прадаецца! – усплёсквае рукамі адна з наведвальніц стэнда, дзе выстаўлена лінейка раслінных алеяў.
Як вядома, беларусы грашаць тым, што спажываюць занадта шмат насычаных тлушчаў жывёльнага паходжання і мала раслінных. Каб нівеліраваць дысбаланс, айчынныя вытворцы паставілі на паток выпуск разнастайнай лінейкі раслінных алеяў.
Акрамя традыцыйных сланечнікавага, аліўкавага, рапсавага і льнянога, ёсць і даволі экзатычныя: кунжутны, кедравы, міндальны, гарбузовы, алей з грэцкага арэха... На любы густ! Наведвальнікі стэнда прыдзірліва разглядаюць піялкі з алеем, прынюхваюцца і, перш чым вынесці адабральны вердыкт, доўга смакуюць арыгінальны прадукт.
Прыкладна такі ж малюнак і каля стэнда з прадуктамі, вырабленымі на аснове казінага малака. Тут уласна само малако, ёгурт, тварог і тваражкі, разнастайныя сыры. «Смачна!» – усміхаецца маме 5-гадовая Даша і цягне ручку за яшчэ адным кавалачкам сыру.
– І карысна! – дадае Ірына Ціханава, якая прадстаўляе фермерскую гаспадарку з поўным цыклам вытворчасці казінага малака і прадуктаў з яго. – Казінае малако – у лідарах сярод прадуктаў з высокім утрыманнем бялку. Для людзей, якія абмяжоўваюць сябе ў спажыванні мяса, яно сапраўдная знаходка. Утрымлівае менш лактозы і засвойваецца арганізмам на 100%, не выклікае дыярэі і абсалютна гіпаалергеннае. Шчыра кажучы, сыр на аснове каровінага малака не ідзе ні ў якое параўнанне з казіным. Так, малако казы валодае спецыфічным смакам. Але я перакананая, што да добрага прадукту сябе трэба прывучаць. І добра б гэта рабіць з самага ранняга дзяцінства.
Дзеля справядлівасці, розніца паміж каровіным і казіным малаком не толькі ў смаку і карысці для здароўя, але і ў кошце прадукту. Кошт за 1 літр далікатэснага напою амаль утрая вышэйшы. Але тут, як той казаў, карысць вымяраць трэба не рублямі.
Арыенцір на прывучванне да правільных прадуктаў з ранняга ўзросту ўзялі таксама найбуйнейшае ў Беларусі прадпрыемства па вытворчасці печыва і мучных вырабаў і вытворцы фітагарбаты. Маленькія наведвальнікі акцыі з задавальненнем прысёрбвалі гарачы духмяны напой з шыпшынай і яблыкам ўпрыкуску з фігурным печывам.
– Рэцэптуру печыва, якое падыходзіць для харчавання дзяцей з 6 месяцаў, мы распрацоўвалі сумесна з навукова-практычным цэнтрам па харчаванні НАН. Яно выпускаецца выключна на сметанковым масле, з даданнем яблыка і гарбуза. Яго з задавальненнем ядуць і дзеці, і дарослыя, – кажа прадстаўнік вытворцы Таццяна Багіна. – Таксама мы выпускаем шырокі асартымент прадукцыі на фруктозе і сорбіце для людзей з цукровым дыябетам. Для тых, хто проста сочыць за сваім здароўем, ёсць печыва з даданнем арахісу, насення кунжуту і сланечніку. У бліжэйшых планах – выпуск безглютэнавай прадукцыі для дзяцей і дарослых з цэліякіяй і фенілкетанурыяй. Раней мы яе выраблялі выключна пад заказ.
Нахвальвае сваю прадукцыю і Яўгенія Сталярова, якая прадстаўляе кампанію па вытворчасці фітагарбаты:
– Ці ведаеце вы, што ў кіпрэі змяшчаецца ў 6 разоў больш вітаміну С, чым у лімоне? А тое, што Гіпакрат называў шалфей свяшчэннай травой? Ён незаменны для жанчын, бо змяшчае эстрагенападобныя рэчывы і выраўноўвае гарманальны фон. Фенхель – самая папулярная трава ў Еўропе. Пра рамонкавую гарбату і казаць няма чаго – яе наогул трэба піць усім! У яе складзе ўтрымліваюцца рэчывы апігеніны, якія амалоджваюць арганізм і служаць прафілактыкай анкалагічных захворванняў.
– Уся прадстаўленая прадукцыя – ні ў якім разе не рэклама, – зазначае загадчык аддзялення грамадскага здароўя Мінскага занальнага цэнтра гігіены і эпідэміялогіі Юлія Мітрайкіна. – Гэта спосаб звярнуць увагу людзей на тыя прадукты, якія могуць быць больш карыснымі для здароўя. На жаль і на шчасце, асартымент харчовых крамаў вельмі шырокі. На шчасце, бо разнастайнасць дае магчымасць выбару. На жаль, бо калі ўсяго шмат, лёгка разгубіцца. І большасць пакупнікоў не чытаюць склад прадуктаў, не задумваюцца, што прынясе іх здароўю большую карысць, а купляюць звыклы для іх тавар або тое, што бліжэй стаіць на прылаўку. Мэта нашых акцый – далучыць людзей да свядомага выбару карысных прадуктаў харчавання.
Калі здараюцца выкідышы альбо замірае цяжарнасць, часта ўсё спісваюць на слабае здароўе жанчыны. Але гэта не так. Эмбрыён можа не прыжыцца з-за генетычных дэфектаў сперматазоідаў. Па гэтай жа прычыне магчымае і мужчынскае бясплоддзе. Добрая навіна ў тым, што сёння такую «паломку» можна своечасова выявіць і спрыяльна паўплываць на сітуацыю.
Для гэтага ўрачы рэкамендуюць здаць аналіз на фрагментацыю ДНК сперматазоідаў. Каму варта прайсці гэтае даследаванне і як змяніць сваё жыццё, каб нарэшце стаць бацькамі, разбіраемся са Святланай Жукоўскай, асістэнтам кафедры акушэрства і гінекалогіі Белдзяржмедуніверсітэта, супрацоўнікам «Цэнтра рэпрадуктыўнай медыцыны».
— Стандартная спермаграма не паказвае генетычную паўнавартаснасць сперматазоідаў, таму яе можа быць недастаткова, каб разабрацца ў глыбінных прычынах праблемы. Аналіз паказвае, колькі працэнтаў сперматазоідаў маюць дэфектную ДНК. Лічыцца, што калі працэнт фрагментаванай ДНК меншы за 25, сперма фертыльная, значыць, усё добра. Калі паказчык перавышае 25%, ужо могуць быць праблемы з зачаццем і выношваннем. Чым паказчык фрагментацыі ніжэйшы, тым лепей. Але важна разумець, што не існуе мужчын з нулявой фрагментацыяй. Не трэба раней часу панікаваць, убачыўшы ў аналізе генетычныя «паломкі», вынікі павінен трактаваць урач.
Нагодай для даследавання могуць стаць:
Таксама нельга не ўлічваць уплыў фактараў рызыкі, удакладняе эксперт.
Сярод шкодных звычак асноўны фактар рызыкі – курэнне, бо ў тытунёвым дыме ўтрымліваюцца цяжкія металы, якія наўпрост руйнуюць якасць спермы.
Доўгае ўстрыманне таксама можа пагаршаць генетычную паўнавартаснасць сперматазоідаў. У 2017 годзе было праведзенае маштабнае даследаванне, якое даказала, што ўстрыманне больш за 5 дзён выклікае павышэнне фрагментацыі ДНК сперматазоідаў.
У Беларусі каля 20% параў сутыкаюцца з бясплоддзем. Штогод у больш за 5000 жанчын здараюцца выкідышы. Сучасныя даследаванні кажуць пра тое, што ў бясплоднасці мужчынскі фактар раўназначны жаночаму, таму абследавацца трэба дваім і адначасова.
Сярод іншых фактараў рызыкі атлусценне, цукровы дыябет, інфекцыйныя і анкалагічныя захворванні, прафесійныя шкоднасці – праца са свінцом, кадміем і іншымі таксінамі. А таксама пастаянны перагрэў. Таму нашэнне вузкай бялізны і абаграванне сядзення машыны таксама негатыўна ўплываюць на якасць сперматазоідаў.
Калі гэтыя рызыкі прысутнічаюць, лепей зрабіць аналіз загадзя, каб паспець адкарэктаваць лад жыцця і пазбегнуць праблем у будучым.
Адмовіцца ад курэння, нармалізаваць масу цела, пазбегнуць кантакту з таксінамі, харчовым пластыкам BPA, добра харчавацца, паўнавартасна спаць, весці рэгулярнае палавое жыццё – усё гэта ў сілах чалавека.
Для паляпшэння спермы ўрачы сёння актыўна прызначаюць антыаксідантныя комплексы: вітаміны А, С, Е, селен і інш. Але ў 2018 годзе Еўрапейскае таварыства рэпрадукцыі чалавека і эмбрыялогіі правяло вялікае даследаванне. І аказалася, што істотнай розніцы паміж антыаксідантамі і плацэба няма. Гэтыя комплексы не пашкодзяць, але значна палепшыць якасць спермы не змогуць, падкрэслівае эксперт.
— Гэты метад лячэння бясплоддзя дазваляе «злавіць» сперматазоід і змясціць яго прама ў цытаплазму яйцаклеткі. Таксама можна зрабіць тэстыкулярную біяпсію – забор сперматазоідаў непасрэдна з тканак яечка. У гэтым няма нічога страшнага, аперацыя робіцца пад наркозам і дазваляе атрымаць сперматазоіды лепшай якасці. Гэта прыносіць добрыя вынікі. Нядаўна ў нашым Цэнтры быў пацыент са зніжанай канцэнтрацыяй спермы і выяўленай ДНК-фрагментацыяй. Мы зрабілі яму тэстыкулярную біяпсію, атрымалі некалькі добрых якасных сперматазоідаў (хаця ў норме іх канцэнтрацыя павінна вымярацца ў мільёнах), выкарысталі іх для працэдуры ІКСІ і атрымалі доўгачаканы вынік. Хачу падкрэсліць для мужчын, што ДНК-фрагментацыя – гэта не прыроджаная паталогія. Гэта значыць, сперматазоіды выпрацоўваюцца якасныя, проста ў працэсе выспявання і транспарціроўкі яны могуць «ламацца». Але гэта папраўна!
Матэрыял здаецца дакладна гэтак жа, як пры стандартнай спермаграме – шляхам мастурбацыі ў стэрыльную ёмістасць. Гэта робіцца непасрэдна ў клініцы, бо важна захаванне тэмпературнага рэжыму і стэрыльнасці. У Цэнтры рэпрадуктыўнай медыцыны, да прыкладу, пакой для здачы аналізу напрамую злучаны акенцам з лабараторыяй.
Перад здачай аналізу мужчына павінен быць здаровым, не прымаць антыбактэрыяльныя і супрацьвірусныя прэпараты, на працягу тыдня не ўжываць спіртное, 1-2 дні захоўваць палавы спакой.
Аналіз на фрагментацыю ДНК сперматазоідаў робіцца некалькі працоўных дзён. Калі ёсць неабходнасць атрымаць вынікі максімальна хутка, гэта магчыма за некалькі гадзін. Усё залежыць ад мэты здачы.
Кошт аналізу ў Цэнтры рэпрадуктыўнай медыцыны – 110 рублёў.
Адмалку чалавек знаёміцца сам з сабой. Спачатку немаўля вучаць паказваць, дзе ў яго рукі, ногі, галава, нос… Дзіця расце, і вось яму ўжо цікава ведаць, як працуе імунная сістэма, асобная клетка, з чаго складаецца кроў…
Добрым падказчыкам і правадніком у свет анатоміі і фізіялогіі чалавека становяцца спецыялізаваныя кнігі для дзяцей, якіх зараз выдаецца вельмі шмат, на розныя ўзросты.
Адна з самых вядомых сярод іх – «Таямніцы анатоміі» («Тайны анатомии») амерыкай мастачкі Кэрал Донер.
Напрыканцы 1980-х кніга ўпершыню выйшла на рускай мове накладам у 200 тысяч і імгненна стала бестсэлерам!
Напісаная яна ў жанры захапляльнага трылера-падарожжа па чалавечым целе. Фантазія ў аўтаркі, канешне, агнявая! Дадумацца толькі: забраўшыся на гарышча падчас навальніцы, брат з сястрой пачынаюць гартаць анатамічны атлас – і раптоўна апынаюцца ў ротавай поласці, адкуль і пачынаецца іх падарожжа па ўсяму арганізму.
Гэтая кніга праз гады прызнаецца найлепшай сярод аналагічных, і не дзіва: шыкоўныя ілюстрацыі і захапляльны тэкст створаны мастачкай, якая да таго ж – доктарка! Вось дзе не паспрачаешся: праца зроблена густоўна і з веданнем справы.
А ў беларусаў, каб вы ведалі, таксама быў доктар, Генадзь Шэршань, які стварыў кнігу-праваднік па чалавечаму арганізму – «Навошта чалавеку галава», прызначаную школьнікам, а таксама настаўнікам для працы з дзецьмі.
Кніга напісаная жыва, у ёй шмат дыялогаў, гульнявых сітуацый. Складаецца яна з васьмі раздзелаў, у якіх распавядаецца, як працуюць нервовая, сардэчна-сасудзістая, дыхальная, стрававальная, апорна-рухальная сістэмы, кроў, ныркі, органы пачуццяў. Шмат звестак па гісторыі медыцыны, жыццёвых сітуацый. А падсумоўваючы, аўтар вяртаецца да пытання: дык навошта ж чалавеку галава?
…галава патрэбна чалавеку і для таго, каб лепш і больш спазнаць і зведаць асаблівасці свайго цела і ўсяго арганізма, як ён працуе, яго магчымасці і заганы... «Зведай самога сябе – і ты зведаеш увесь свет», – вучылі старажытныя ўсходнія мудрацы. Толькі так малады чалавек пачынае разумець, што добра і што дрэнна, улічваць інтарэсы не толькі родзічаў, але і суседзяў і ўвогуле людзей. Ён нарэшце ўсведамляе, чаму нельга крыўдзіць маленькіх, трэба паважаць старэйшых, дапамагаць старым, нядужым і слабым, клапаціцца пра ўсё жывое на зямлі і, урэшце, чаму ў народзе так цэняцца высакародныя ўчынкі ў дачыненні да розных людзей і да сваёй краіны», – піша аўтар.
Кніга Генадзя Шэршаня мае вельмі аўтарэтэтных рэцэнзентаў – Раманенку В. В., доктара медыцынскіх навук, на момант выхаду кнігі (2008 год) прафесара кафедры клінічнай фармакалогіі і тэрапіі БелМАПА, і настаўніцу біялогіі Марозаву Л.Ул.
Але, на вялікі жаль, выданне не праілюстраванае. А між тым, шукючы інфармацыю пра Генадзя Шэршаня, у нумары першым за 2016 год часопіса «Маладосць» я пабачыла публікацыю «Маё ваеннае дзяцінства» аўтара з яго дзіцячымі яшчэ малюнкамі, вельмі цікавымі! Эх, чаго не хапіла: адвагі, як амерыканцы Кэрал Донер, упэўненасці ў сваіх мастацкіх здольнасцях, каб доктар зрабіў і тэкст, і малюнкі сам, ці грамадскага ды кнігавыдавецкага запыту на такую працу? Мяркую, слушна апошняе. Але спытацца ўжо няма каго – Генадзя Шэршаня (1937 г.н.) не стала ў 2016 годзе…
Я бачыла яго пры жыцці двойчы і запомніла прыязным чалавекам – так пра яго адзываюцца ўсе, хто ведаў. Энергічны, рухавы, усмешлівы. Па выхадзе на пенсію пэўны час працаваў у выдавецтве «Беларусь» рэдактарам, быў укладальнікам шматлікіх кніг, апошняя з іх называлася «Когда нездоровится».
Шмат пісаў для рэспубліканскіх СМІ артыкулаў пра здаровы лад жыцця, за што вядомы беларускі паэт і краязнаўца Сяргей Панізнік (па першай сваёй адукацыі, дарэчы, таксама медык, фельчар) уславіў Генадзя Шэршаня прысвячэннем «Для гонару і годнасці». Вось колькі радкоў:
І зноўку Шэршэнь-Гіпакрат з рэцэптамі духоўнасці:
– Здароўю трэба напракат шчаслівы быт, разумны лад, струне ад нерва -- нападхват звон гонару і годнасці!
Кніга «Навошта чалавеку галава» ў маёй бібліятэцы з’явілася адразу ж па выхадзе, бо лічыла яе нараджэнне падзеяй – профільныя кнігі, напісаныя спецыялістамі, ды яшчэ для дзяцей – ва ўсім свеце з’ява. У яе сціплы наклад – усяго 1000 паасобнікаў, зусім няма ілюстрацый. Бюджэтны варыянт выдання.
Але гэта, трэба думаць, проста такая адметнасць часу: беларусы толькі вучацца любіць і цаніць сваё, толькі факусуюцца, каб разглядаць і не прагледзець сярод сваіх – не горшых за амерыканскіх – творцаў; вучацца даваць ім хаду і забяспечваць падтрымку.
Некалі – марыцца – кніга перавыдасца багата ілюстраванай, вялікім накладам, стане любімай у беларусаў і складзе канкурэнцыю найлепшым выданням у азначанай тэматыцы.
«У ложку ўзрост не важны». Гэтая фраза, якая стала афарызмам, належыць адной з самых яркіх галівудскіх зорак 90-х Мішэль Пфайфер. Кінадзіва, якая размяняла сёмы дзясятак, мабыць, дакладна ведае, пра што гаворыць. Але ёсць і альтэрнатыўнае меркаванне.
Менавіта ўзрост з'яўляецца адной з вядучых прычын эрэктыльнай дысфункцыі ў мужчын. Эпізадычнае або пастаяннае фіяска ў ложку адчувае кожны другі мужчына, якому за 50.
І ўсё ж, нягледзячы на тое, што з гадамі магчымасці і жаданні ўжо не тыя, што былі ў юнацтве, сэкс – не толькі для маладых. Падтрымліваць здаровае сэксуальнае жыццё цалкам магчыма нават у вельмі сталым узросце. Супрацоўнікі клінікі Меё, аднаго з самых вядомых і аўтарытэтных цэнтраў у галіне аховы здароўя і медыцынскіх даследаванняў, падрыхтавалі шэраг рэкамендацый, як захаваць мужчынскую сілу на доўгія гады.
Па меры старэння ў яго арганізме зніжаецца выпрацоўка тэстастэрону, адпаведна, фізіялагічныя змены сэксуальнай функцыі непазбежныя. Чым старэйшы мужчына, тым больш выяўленыя змены. Напрыклад:
Большасць мужчын вельмі трапятліва ставяцца да сваёй сэксуальнай функцыі, і любыя змены з яе боку выклікаюць апраўданы неспакой. Тут два выйсці:
Стан здароўя – гэта, між іншым, яшчэ адна галоўная прычына, чаму сэкс у 50+ ужо не той, што быў у 20.
Усё, што нажытае за доўгія гады: праблемы з сэрцам і сасудамі, цукровы дыябет, хранічны прастатыт, хваробы суставаў і многае іншае – само па сабе не робіць сэксуальнае жыццё прасцейшым і лепшым. Дык яшчэ і некаторыя лекавыя сродкі, якія нармалізуюць артэрыяльны ціск, сардэчны рытм, гарманальны фон ды іншае, маюць пабочныя эфекты, якія негатыўна ўплываюць на лібіда і патэнцыю.
Калі хочацца даўжэй заставацца ў страі і адчуваць жыццё ва ўсёй яго паўнаце, давядзецца размаўляць пра жаданне захаваць сэксуальную актыўнасць нават з няпрофільнымі спецыялістамі: кардыёлагам, эндакрынолагам, тэрапеўтам... Па-першае, так вы атрымаеце рэкамендацыі, як арганізаваць сэксуальнае жыццё на фоне стану вашага здароўя . Па-другое, ва ўрача будзе магчымасць прызначыць прэпараты без пабочнага ўплыву на палавую функцыю.
Стрэс, дрэнны настрой, фізічная стомленасць не спрыяюць сэксу ў любым узросце. АЛЕ ў кожнага ўзросту свае прычыны для эмацыянальных праблем.
З аднаго боку:
Дарэчы, большасць людзей шаноўнага ўзросту, якія захавалі інтымную блізкасць, прызнаюцца, што менавіта па гэтых прычынах атрымліваюць ад сэксу больш задавальнення.
З другога боку:
Калі дэпрэсія або хандра зрабіліся перашкодай для таго, каб заставацца сэксуальна актыўнымі, пагаварыце са сваім урачом. Ёсць мноства спосабаў (уключаючы лекавыя сродкі) вярнуць сабе душэўны спакой, а значыць, магчымасць атрымліваць радасць і задавальненне ад жыцця і ўсіх яго складнікаў.
Ну вось і адбылося вельмі важнае для многіх мерапрыемства, пра якое мы так шмат гаварылі і пісалі на нашым інфармацыйным партале. Першая Эстафета «У імя жыцця» для анкапацыентаў і іх блізкіх, па маіх адчуваннях, атрымалася камернай, душэўнай, хатняй. І дух аб’яднання лунаў у паветры цалкам адчувальна – здавалася, яго можна было пакратаць. І прыходзіла ўсведамленне, што мацнейшыя разам – гэта не проста прыгожыя словы, а самая аб’ектыўная рэальнасць.
Асабіста я рада, што паўдзельнічала ў Эстафеце, бо пачула і пабачыла шмат цікавага, што знайшло сваё месца ў душы і сэрцы. А думкі і пачуцці... Іх вельмі шмат, каб змясціцца ў гэтым допісе. І ўсё ж паспрабую ўзгадаць і акрэсліць уразлівыя моманты суботняга дня – не толькі падчас Эстафеты, але яшчэ да яе пачатку.
...Па сваёй звычцы нікуды не спазняцца прыехала раней за 40 хвілін да часу, у які наша маленькая каманда інфармацыйнага партала Здаровыя людзі дамовілася сустрэцца ля правага бакавога ўваходу Нацыянальнай бібліятэкі Беларусі. Менавіта там па задумцы арганізатараў – сацыяльна-асветніцкай установы «Цэнтр падтрымкі анкапацыентаў «У імя жыцця» пад кіраўніцтвам Ірыны Жыхар – павінна распачацца Эстафета.
А пакуль я падыходжу да вады з фантанамі. Мая слабасць! Люблю ваду ў любым яе праяўленні! І адтуль раблю фотаздымак Нацыянальнай бібліятэкі. Захацелася зазняць яе менавіта вось з гэтай сакавітай зелянінай, што акаляе падыходы. Ну прыгажосць жа!
Затым колькі дзясяткаў хвілін назіраю за фантанамі, узгадваючы пры гэтым чэшскі гейзер па назве Вржыдла, размешчаны ў Карлавых Варах. Таксама высокі! А калі да мяне далятаюць кропелькі вады... Узнімаюся з лаўкі, але не сыходжу зусім. Быццам чагосьці чакаю...
Так і ёсць! Дачакалася! Вясёлка! Якая ж цудоўная неспадзяванка! Лаўлю яе ў аб’ектыў і так, і гэтак, спадарожна назіраючы за катамаранам у выглядзе аўтамабільчыка.
На адным кадры здаецца, быццам вясёлка пачынаецца з яго боку!
– Мама, а як гэтыя машынкі плаваюць?! – здзіўлена пытаецца ў мамы маленькі хлопчык, якога яна фатаграфуе на фоне фантанаў.
– А гэта не сапраўдныя машынкі, – тлумачыць тая.
У мяне яшчэ застаецца колькі хвілін, каб прагуляцца па ажурнаму мосту, паглядзець, як сюды для фотасесіі накіроўваецца вяселле... Цёпла, сонечна, і ад гэтага прыемна на душы.
Нарэшце сустракаемся з калегамі, абмяркоўваем фота з вясёлкай. І вось ужо ў руках Ірыны Жыхар мікрафон, да яе падыходзіць харэограф, а ўдзельнікам Эстафеты прапануюць спусціцца на пляцоўку, каб разам станцаваць танец з сімвалічнай назвай «Раніца новага дня».
Як вядома, спецыяльна для яго музыку напісаў кампазітар Тэймур Пагасян, а харэограф Аляксандра Косціна, уласна кажучы, і стварыла сам танец. Відэа да яго было размешчана ў сеціве зараней, каб усе ахвотныя маглі развучыць немудрагелістыя рухі.
Ведаеце, я нават пашкадавала, што знаходжуся па іншы бок аб’ектыва фотаапарата. Гэта сапраўды было так ЗДОРАВА!!! Словамі не апішаш. Трэба было бачыць танец, чуць музыку... Пачатак Эстафеты сапраўды атрымаўся!
Ірына Жыхар патлумачыла, дзе і як будуць праходзіць актыўнасці Эстафеты і як карыстацца рознакаляровай праграмкай, суадносіць яе колеры з зонамі ў бібліятэцы.
Вельмі добра працавалі падчас Эстафеты валанцёры. Перад пачаткам яны суправаджалі людзей ад цэнтральнага ўваходу да бакавога, дзе мерапрыемства мелася распачацца. Гэтак жа праводзілі і па зонах. Ветлівыя, усмешлівыя, маладыя...
Арганізатараў адзначалі эфектныя сланечнікі. Іх за сімвалічны кошт можна было набыць тут жа... А яшчэ паглядзець на цудоўную фотавыставу «Са-тварэнне» і паразмаўляць з усімі тымі спікерамі і майстрамі, пра якіх мы распавядалі на нашым інфармацыйным партале. Многіх я адразу ж пазнавала ў твар!
Пазнаёміўшыся зараней з праграмай, паводле якой некалькі лекцый і практычных заняткаў ішлі паралельна, вызначыла найперш для сябе вось гэта: «Як паспяхова размаўляць з урачом». І.Малаш, псіхолаг, Цэнтр падтрымкі анкапацыентаў «У імя жыцця», М.Ёланта, Асацыяцыя Псіхасацыяльнай Анкалогіі, Вільнюскі хоспіс імя М.Сапоцькі (Літва) пры ўдзеле А.Собаль, псіхаанколага (Польшча)».
І хаця, як прызналіся напрыканцы выступоўцы, планавалася правесці сустрэчу крыху ў іншым фармаце, але яна сталася карыснай і ім, і тым, хто завітаў сюды. Бо пытанняў задавалі мора! Жывыя стасункі – гэта тое, чаго заўсёды чакаюць людзі ад урачоў. І тут гэта спраўдзілася.
Цікавымі падаліся і вось гэтыя 7 пытанняў, якія пацыенту прапануецца задаць свайму ўрачу...
Наступная мая асабістая цікавасць – гэта, вядома ж, майстар-клас «Як не патануць у моры інфармацыі. Інструкцыя для пацыента» ад кіраўніка нашага інфармацыйнага партала Здаровыя людзі, к.м.н., дацэнта кафедры анестэзіялогіі і рэаніматалогіі БелМАПА Вольгі Святліцкай.
Таксама пачула вельмі шмат карыснага для сябе. Парадавала неабыякавасць слухачоў. А яны, апрача іншага, атрымалі магчымасць задаць пытанне ўрачу, які знаходзіцца на баку пацыентаў, умее іх слухаць (а галоўнае – чуць!), размаўляе з імі...
Цікавіліся людзі і банерам нашага інфармацыйнага партала.
І няхай на гэтае мерапрыемства – першае ў такім маштабе, зладжанае пацыенцкай арганізацыяй, завіталі не тысячы, не дзясяткі тысяч людзей, тыя, хто прыйшлі, проста малайцы! Не пабаяліся, не засаромеліся... І я веру, што кожны ўзяў для сябе штосьці карыснае, займеў кантакты і, у рэшце рэшт, паверыў, што раніца кожнага новага дня будзе абавязкова добрай.
Віктар Малышчыц, астраном, фатограф, сябра Экспертнай групы па пасткросінгу і ўдзельнік фотавыставы «Са-тварэнне» ў рамках Эстафеты «У імя жыцця»
Віктар, раскажыце, якім быў ваш шлях да сямейных і нацыянальных каштоўнасцяў, зорак, фатаграфіі?
Насамрэч, ніякага адмысловага шляху і не было. Прынамсі, жыццёвых парад у стылі «рабі, як я», дакладна даць не змагу. Многія распавядаюць, як трэба змагацца на працягу ўсяго жыцця. Я ж хутчэй плыву па цячэнні. Ці, калі сказаць прыгожымі словамі, давяраю інтуіцыі і поклічу сэрца. У мяне заўсёды прынцып – калі не можаш зараз жа звярнуць горы, рабі штосьці маленькае. У рэшце рэшт, цячэнне, па якім я раю плыць, точыць камяні і з цягам часу разбурае цэлыя горы.
Захапленне зоркамі атрымалася выпадковым. У пятым класе ўсе школьнікі мараць пра космас, і мая мама проста здагадалася падарыць мне маю першую энцыклапедыю пра зоркі, якую я ледзьве не на памяць вывучыў. Да таго ж, у школе знайшоўся апантаны астраноміяй настаўнік, які здолеў гэтае захапленне падтрымаць.
Да нацыянальных каштоўнасцяў таксама асабліва прыходзіць не давялося. Я нарадзіўся ў Латвіі і бачыў, як латышы шануюць сваю краіну, мову і культуру. Калі мы пераехалі сюды, я вучыўся ў трох школах – усе яны былі беларускія, і ў мяне нават не ўзнікала пытання, у якой краіне я жыву і якая наша мова. Калі мне было гады 23, усе гэтыя дзіцячыя ўражанні ўсплылі ў памяці, таму я зрабіў ужо свядомы выбар: хачу жыць тут, хачу, каб мае дзеці любілі гэтае месца, і хачу, каб яны былі беларусамі.
З фатаграфіяй атрымалася яшчэ больш празаічна. Як і тысячы іншых людзей, я любіў штосьці здымаць. І гэта засталося б проста захапленнем, каб не неабходнасць пракарміць сям’ю.
Што вы лічыце сваім найбольшым дасягненнем, чым ганарыцеся?
Напэўна, сваю сям’ю. Многія дасягненні з цягам часу забываюцца, многія дасягнутыя вяршыні і рэкорды праз некаторы час застаюцца ў ценю перамог іншых людзей. А вось сям’я і дзеці заўсёды прыносяць шчасце, і кожны дзень з імі не засумуеш.
А ёсць тое, што не атрымалася? Што б вам хацелася ажыццявіць?
Ды проста мора ўсяго! Калі ў цябе процьма планаў, дык абавязкова многія з іх не змогуць ажыццявіцца – увесь час трэба будзе выбіраць, што табе больш важна. Па шчырасці, хацелася б зрабіць мноства сацыяльных праектаў, але сям’я забірае шмат часу і, на мой погляд, сярод прыярытэтаў яна павінна стаяць на першым месцы.
Як вы далучыліся да Эстафеты ў падтрымку анкапацыентаў? Чаму для вас гэта важна?
Мяне запрасіла Ірына Жыхар. Роля ў мяне зусім невялікая – усяго толькі быць адным з членаў журы фотаконкурсу і паўдзельнічаць у невялікай фотавыставе. Шчыра, я не ведаю, як правільна падтрымаць анкалагічных пацыентаў. Але ведаю, што стаю побач з вялікай і прафесійнай камандай, якая дакладна ведае, як гэта зрабіць. І шчаслівы, што крышачку магу ў гэтым паўдзельнічаць.
Ці ёсць у вас досвед стасункаў з анкапацыентамі? Некаторыя людзі адчуваюць страх камунікацыі з імі. Ці ёсць ён у вас?
Сярод блізкіх мне людзей не было анкапацыентаў, але не думаю, што павінен быць страх камунікацыі з імі. Вельмі вялікі працэнт анкалагічна хворых вылечваюцца і вяртаюцца да звычайнага жыцця, таму іх хвароба не адрозніваецца нічым ад іншых сур’ёзных, але вылечных захворванняў. Я толькі не ведаю, як размаўляць з людзьмі, у якіх рак ужо даўно перакрочыў 4-ю стадыю і якім застаецца не так шмат – у нас настолькі розныя каштоўнасці ў жыцці, што было б вельмі добра, каб хтосьці растлумачыў, як правільна сябе паводзіць з такімі людзьмі.
Маглі б вы адказаць, што для вас значыць – перамагчы рак?
Напэўна, гэта – вярнуцца да звычайнага жыцця, задумвацца, у першую чаргу, не пра сваю хваробу, а пра тое, пра што думаюць і ўсе астатнія людзі. Але, ведаеце, я не ўпэўнены, што рак да канца можна перамагчы. Нават у стане шматгадовай устойлівай рэмісіі, напэўна, ніколі ўжо не будзеш жыць па-ранейшаму.
Што б вы маглі параіць чалавеку, які знаходзіцца ў крызісе? Як яго падтрымаць, натхніць?
Шчыра кажучы, зусім не ведаю. На мой погляд, галоўнае – жыць сённяшнім днём. Нават калі здаровы і паспяховы чалавек пачне загадваць далёка на будучае, ён можа давесці сябе да дэпрэсіі: мы ж усе без выключэння ў рэшцэ рэшт памром. Таму трэба неяк растлумачыць чалавеку, што галоўная задача на сёння – плённа пражыць гэты дзень. Таксама, напэўна, любому чалавеку важна растлумачыць, што ён ужо зрабіў на гэтым свеце. А кожны штосьці добрае абавязкова ўжо зрабіў! Тады, нават калі сітуацыя сур’ёзная і жыццё можа скончыцца заўчасна, чалавек будзе ведаць, што ён пражыў яго не дарэмна.
Вось як падтрымаць цяжка хворых маленькіх дзетак – зусім не ведаю. Адчуваю ў гэтым пэўную вялікую сусветную несправядлівасць.
А што натхняе і падтрымлівае вас?
Думаю, што праца. Асабліва калі гэта хоць крышачку творчая праца. Калі планаў і задач процьма, заўсёды можна ўзяцца за штосьці цікавае. І атрыманы вынік абавязкова дасць штуршок рухацца далей.
Ці ёсць у вас жыццёвы дэвіз, творы мастацтва, якія надаюць сіл, а можа – чалавек, які з’яўляецца для вас прыкладам?
Пра дэвіз я ўжо казаў – не спяшайцеся рабіць планы на пяць гадоў, падумайце спачатку, як найбольш эфектыўна пражыць адзін сённяшні дзень. Калі кожны дзень пройдзе плённа, вы за пяць гоадоў зробіце нават нашмат больш, чым маглі б запланаваць.
З усіх мастацтваў, напэўна, найбольш сіл мне дае музыка. Прычым гэта не класічныя ўзнёслыя творы, якія, па логіцы, павінны акрыляць. А часцей гэта складаная дэпрэсіўная музыка з добрымі і сумнымі тэкстамі. Як ні парадаксальна, але дэпрэсіўная музыка зусім не прыводзіць да такога ж настрою. Можа, таму, што слухаеш і разумееш, што камусьці зараз яшчэ горш, чым табе?
А людзі? Так, я ведаю некалькі чалавек, з якіх проста выпраменьваецца пэўная шалёная энергія. З такіх хочацца браць прыклад, і я рэгулярна стараюся так рабіць. Гледзячы на іх, і сам запальваешся.
Дзякуем Віктару Малышчыцу за падтрымку Эстафеты «У імя жыцця»!
Да сустрэчы 24 жніўня 2019 у Мінску.
Эстафета «У імя жыцця» — гэта акцыя для анкапацыентаў і іх блізкіх. Будзем вучыцца граматна дапамагаць сабе і людзям, якія маюць у тым патрэбу.
Супраць раку мы мацнейшыя разам!
Вячаслаў Калацэй, кандыдат культуралогіі, выступоўца з інтэрактыўнай лекцыяй «Арт-тэрапія і беларускі фальклор» у рамках Эстафеты «У імя жыцця»
Вы – загадчык кафедры этналогіі і фальклору. Чым дакладна займаецеся?
– У нас два напрамкі дзейнасці. Першы – чытаем лекцыі па беларусазнаўстве, этнаграфіі, міфалогіі і фальклоры для ўсіх студэнтаў універсітэта культуры і мастацтваў. Другі – рыхтуем студэнтаў па спецыяльнасці «Народная творчасць (фальклор) », па спецыялізацыі «Этнафоназнаўства». Фактычна мы рыхтуем этнамузыколагаў, якія могуць фальклор даследаваць, пераймаць і выконваць.
І вы яшчэ з’яўляецеся ўдзельнікам гурта «Ветах»…
– Так. «Ветах» быў створаны ў 1997 годзе і існуе дагэтуль. З гуртом мы аб’ехалі амаль усю Еўропу. Некалькі апошніх нашых падзей: нядаўна вярнуліся з Кітая, дзе выступалі ў оперным тэатры Пекіна – на найбольш прэстыжнай канцэртнай пляцоўцы краіны. Яшчэ нядаўна выступалі ў штаб-кватэры ЮНЭСКА ў Жэневе.
Вы знаёміце замежных слухачоў з беларускім фальклорам?
– Сапраўды, але ж не толькі. У нас на кафедры на кожным курсе ёсць фальклорны калектыў – гэта калектыў «Этнасуполка», якім кіруе Таццяна Пладунова, «Страла» пад кіраўніцтвам Эвеліны Шчадрыной. Наталля Петухова кіруе гуртом «Агнявец», а я – гуртом «Аранія». А калі гэтыя калектывы збіраюцца разам, яны ствараюць фальклорны гурт «Талака».
Чаму вы вырашылі займацца менавіта гэтым?
– Так склалася, што я адвучыўся на музыку-інструменталіста. А потым вучыўся спяваць і трапіў на кафедру беларускай народна-песеннай творчасці і ў гурт «Грамніцы» да Уладзіміра Зяневіча. Фактычна гэта ён далучыў мяне да фальклору.
Як зараз складаецца сітуація з фальклорам? Ці дастаткова ён захаваўся? Ці знаходзіцца штосьці, раней невядомае?
– Справа ў тым, што ў адрозненне ад нашых суседзяў, у нас фальклорная традыцыя дагэтуль захавалася. Яна, канешне, знаходзіцца не ў тым стане, як у мінулым стагоддзі, але яна ёсць. Таму зараз шмат робіцца па яе перайманні, з’яўляюцца маладыя носьбіты, якія працягваюць гэтую справу. Раней такога не было, бо раней імкнуліся фальклор паляпшаць, тым самым «забіваючы» яго. А зараз навучыліся працаваць з ім больш тонка.
Новая інфармацыя з’яўляецца ўвесь час. Напрыклад, у Беларусі змаглі аднавіць дуду (беларускую валынку) – каранёвы музычны інструмент, які быў фактычна страчаны ў сярэдзіне дваццатага стагоддзя. Цяпер на ёй грае шмат людзей. Таму нават па дударстве з’яўляюцца, а таксама ўводзяцца ў навуковае абарачэнне відэа- і аўдыёматэрыялы з фальклорам, які раней не быў абнародаваны.
Дзякуючы гэтаму мы ведаем свае каранёвыя музычныя інструменты. Гэта шмат дае для таго, каб асэнсаваць прыроду беларускай музыкі, законы яе развіцця, фарміравання, каб разумець, як з ёй трэба працаваць, каб яна жыла.
Што вам у вашай працы больш падабаецца: знаходзіць штосьці ці распавядаць пра фальклор і спяваць?
– Фальклор жыве, пакуль ёсць людзі, якія ім займаюцца. Калі ён матэрыялізуецца, тады ён жыве. Да заканчэння дваццатага стагоддзя лічылася, што фальклор трэба запісаць, здаць у архіў і забыцца на яго. У лепшым выпадку – надрукаваць кніжкі і выпусціць пласцінкі. Зараз стаяць зусім іншыя задачы. Я знаёмы з вядомым маскоўскім музыкам Сяргеем Старасціным. Дык ён казаў: «Я не разумею, як можна ездзіць, запісваць, а потым не заспяваць і не зайграць гэта».
Мне здаецца, што будучае за людзьмі, якія працуюць над матэрыялізацыяй фальклору, над тым, каб ён існаваў у побыце, у святах, на канцэртных пляцоўках і ў СМІ, якія, на жаль, не ўмеюць працаваць з фальклорам і паказваюць самае непрэзентабельнае і мала цікавае.
Насамрэч гэта даволі высокая культура, і далёка не кожны чалавек можа да яе ўзняцца.
Вы лічыце, што гэтае няўменне разумець і працаваць з фальклорам звязана з неадукаванасцю? Ці адкуль яно ідзе?
– Так, яно ідзе ад неадукаванасці. Традыцыя можа перадавацца ці ў сям’і, ці ў школе. Сёння ні ў сям’і, ні ў школе гэтага няма. Ёсць толькі новыя ў рознай ступені экзатычныя праекты – фальклорныя гурты, студэнцкія этнаграфічныя таварыствы і наша кафедра, якія спрабуюць пэўным чынам яго даносіць да слухача і гледача. Здаецца, што як сістэма, як субкультура фальклор імкнецца сам сябе захаваць праз тое, што нечакана з’яўляюцца людзі, якія пачынаюць ім займацца.
Напрыклад, зараз у Верхнім горадзе апантаныя людзі наладжваюць побытавыя танцы. Раней такога не было. Ёсць фестывалі фальклорнага мастацтва «Берагіня», якія праходзілі на Гомельшчыне кожныя два гады, запачаткаваныя Міколам Козенкам і Святланай Беразоўскай. Фактычна, сёння – гэта шматступенная сістэма захавання рэгіянальнага фальклору на аснове побытавага танца. Але гэта – выключэнні.
Праз гэта Вы бачыце рост ці аднаўленне цікавасці беларусаў да сваёй музыкі і культуры ўвогуле?
– Так. Як кожны від культуры, фальклор мае патэнцыял да захавання, і па пэўных сваіх законах ён спрабуе застацца ў новым часе. Што няпроста, бо зараз бачная тэндэнцыя да глабалізацыі, уніфікацыі. А тое, што звязанае з захаваннем этнічнай ідэнтычнасці, спадзяецца на асабісты выбар чалавека.
Хаця іх страта небяспечная і можа скончыцца спачатку этнічнай, а потым нацыянальнай катастрофай.
Але калі развітыя краіны прайшлі этап глабалізацыі і зараз набірае ход вяртанне да нацыяналізму і большай закрытасці, дык беларусы ж не прайшлі яшчэ, здаецца, ні адзін з гэтых перыядаў. Бо мы яшчэ быццам бы шукаем у поцемках сваё адлюстраванне, каб убачыць, хто і што мы такое. Ці наблізіліся мы да пазнання і прыняцця сваіх каранёў, ці ёсць рух у гэтым напрамку?
– Пра гэта больш размаўляюць апошнім часам. Мы прайшлі некалькі хваляў беларусізацыі, апошняя з якіх прыйшлася на 1990-я. Зараз пад уплывам таго, што адбываецца ў суседніх краінах, і падзей ва Украіне на мяжы з Расіяй… Я спадзяюся, гэта станецца для нашых лідараў добрым стымулам для ўмацавання этнічнай культуры беларусаў. Бо, як я ўжо казаў, калі народ губляе сваю ідэнтычнасць і культуру, ён сыходзіць з гістарычнай арэны. І ў свеце была процьма такіх прыкладаў, пра гэта шмат пісаў Леў Гумілёў – сын Ганны Ахматавай і Мікалая Гумілёва.
24 жніўня Вы будзеце праводзіць інтэрактыўную лекцыю «Арт-тэрапія і беларускі фальклор». Як фальклор можа ўплываць на чалавека?
– Арганізатары папрасілі зрабіць інтэрактыў, далучыць слухачоў і гледачоў да працэсу выканання фальклору. Таму, акрамя таго, што я буду даваць агульную характарыстыку, што такое фальклор, музыка, вусныя традыцыі, разам з аўдыторыяй мы паспрабуем праспяваць некалькі песень. Хутчэй за ўсё, гэта будуць валачобныя песні. Гэта ўнікальны жанр. Іх яшчэ можна пачуць у побыце на Гродзеншчыне і на Віцебшчыне. Увогуле, яны існуюць толькі ў беларусаў і на беларускім памежжы Літвы. Лічыцца, што валачобныя песні – гэта маркеры беларусаў, то бок у месцах, дзе ёсць гэтыя песні, жывуць ці жылі беларусы.
Мне падаецца, што склад клетак чалавека – быццам добра прадуманы арнамент, а рак, анкалогія – парушэнне гэтага ўзору. Як вы ўспрымаеце анкалогію?
– У свой час мая знаёмая, дарэчы, даволі маладая, хварэла. Але ж яна не здалася і змагалася да апошняга. Было складана: хіміятэрапія, бальніца… Паралельна з барацьбой яна вяла фальклорны гурт. І нават перамагла са сваімі вучнямі на адным фестывалі. А пасля перамогі пайшла на папраўку. І калі мы размаўлялі, заўсёды падтрымлівалі яе, каб не здавалася, каб змагалася, бо яна маладая, здольная мабілізаваць схаваныя магчымасці арганізма, і павінна перамагчы гэтую хваробу. І я рады, што ў яе атрымалася.
Таму лічу, што трэба змагацца, заўсёды.
Ці ёсць у Вас дэвіз па жыцці?
– Крывая выведзе заўжды.
Што Вам дапамагае пераадольваць цяжкасці?
– Разумнае імкненне іх пераадолець. Спачатку трэба ўсё абдумаць, а потым прыступіць да ліквідацыі гэтых цяжкасцяў.
У вас ёсць улюбёная кніга, кінастужка, музыка?
– Кніга – «Майстар і Маргарыта» Міхаіла Булгакава, а фільм, напэўна, «Quo vadis» (па-руску – «Камо грядеши») паводле Генрыка Сянкевіча.
Які твор вы б парэкамендавалі чалавеку, што пражывае крызісную сітуацыю?
– Напэўна, трэба проста перачытаць сваю любімую кніжку. Трэба звярнуцца да таго, што выклікае станоўчыя эмоцыі, і пастарацца іх зафіксаваць, каб потым пачаць працаваць над ліквідацыяй крызісу.
Ці ёсць у вас герой з рэальных людзей?
– Шмат хто. Разумееце, я працую са студэнтамі, а ў іх шмат станоўчай энергіі, і ад іх можна пастаянна зараджацца.
Вы б прыпісалі сябе да пэўных грамадзянскіх плыняў?
– Як і ўсе, з’яўляюся карыстальнікам інтэрнету, тым больш, што мы вядзем старонкі нашай кафедры і студэнцкія суполкі ў сацыяльных сетках.
Што вас натхняе?
– Тое, што ёсць вакол нас. Як казаў Біл Гейтс, заснавальнік Microsoft, свет, які нас акаляе, настолькі прыгожы і непрадказальны, што зводзіць яго да механічнай камбінацыі верагоднасцяў і лічбаў нельга – у ім ёсць душа.
Дзякуем Вячаславу Калацэю за падтрымку Эстафеты «У імя жыцця»!
Да сустрэчы 24 жніўня 2019 у Мінску. Эстафета «У імя жыцця» – гэта акцыя для анкапацыентаў і іх блізкіх.
Будзем вучыцца граматна дапамагаць сабе і людзям, якія маюць у тым патрэбу. Супраць раку мы мацнейшыя разам!
Гэта зусім няпроста. Але вельмі трэба. Усім нам. І тым, хто сутыкнуўся з гэтай хваробай, і іх блізкім, і проста навакольным. Бо напачатку нават выгаварыць гэтыя словы страшна: «анкалогія», «рак»... І быццам сорамна, і…
Сапраўды, нікому не хочацца казаць пра такі дыягназ. Ну няма ў нас яшчэ культуры паводзінаў. Нягледзячы на тое, што колькасць хворых на рак расце з кожным днём. Калі, раптоўна даведаўшыся пра захворванне кагосьці, і не тыцкаюць услед пальцам, дык плётак-абгавораў сапраўды не абрацца! Асабліва ў невялікім населеным пункце…
Але штосьці ўсё ж зрушваецца з месца, штосьці мяняецца ў апошні час. І, хочацца верыць, будзе мяняцца яшчэ больш і актыўней – на карысць пацыентаў, вядома ж.
Думаю пра гэта даволі часта, а дзесьці і выказваюся ўслых, пішу… І вельмі паважаю тых людзей, якія наважыліся падзяліцца сваімі адчуваннямі, досведам, каб хаця б крыху дапамагчы іншым. Каб хтосьці змог прайсці праз непрыманне да разумення больш лёгкім шляхам, калі такі сапраўды існуе…
Ну, а падставай для гэтага роздуму стала сапраўды грандыёзнае мерапрыемства, якое пройдзе заўтра, 24 жніўня, у Мінску, у Нацыянальнай бібліятэцы Беларусі.
Хаця справа, на мой погляд, зусім не ў маштабнасці, а ў тым, што ці не ўпершыню пра анкалогію гавораць і пішуць так адкрыта ды шмат. І не проста, каб штосьці сказаць, адзначыцца, а каб (што неацэнна!) даць карысныя парады, усім разам выпрацаваць пэўныя крокі, падзяліцца досведам, падтрымаць іншых і адчуць іх падтрымку…
На Слушна і на партале нашага партнера Здаровыя людзі, таксама ёсць шэраг публікацый – уласных і ў партнёрстве з сацыяльна-асветніцкай установай «Цэнтр падтрымкі анкапацыентаў «У імя жыцця», якая і ладзіць гэтае мерапрыемства.
Да нядзелі, 25 жніўня, на галоўнай старонцы нашага партала вы можаце бачыць гэты банер:
Ён клікабельны, пры націсканні адкрываецца ўся падборка матэрыялаў па тэгу «У імя жыцця». Калі хтосьці патрапіў на наш партал упершыню альбо проста з-за занятасці не чытаў гэтых публікацый у дзень іх размяшчэння, можаце зрабіць гэта зараз. А ўвогуле, яны нікуды з партала не знікнуць і пасля правядзення акцыі для анкапацыентаў і іх блізкіх.
Асабліва раю прачытаць інтэрв’ю нашага журналіста Валянціны Мохар з анестэзіёлагам-рэаніматолагам, кандыдатам медыцынскіх навук, дацэнтам кафедры анестэзіялогіі і рэаніматалогіі БелМАПА, членам Прэзідыума Беларускага таварыства анестэзіёлагаў-рэаніматолагаў, Беларускай асацыяцыі ўрачоў і Еўрапейскай асацыяцыі клінічнага харчавання і метабалізму, кіраўніком партала Здаровыя людзі Вольгай Святліцкай.
І зусім не таму раю, што гэта наш кіраўнік. А таму, што Вольга Іванаўна прадстаўляе зусім іншы ўрачэбны (!!!) погляд на сітуацыю з анкахворымі. І тыя стасункі, тое стаўленне да працыентаў, якога, прабачце, практычна ні разу я не сустракала нават у спецыялізаваных цэнтрах.
Казала ўжо пра гэта не раз і яшчэ паўтаруся: усе разумеюць, што на прыёме – канвеер. І што нельга ўсім спачуваць, усё прапускаць праз сябе – адбудзецца тое самае прафесійнае выгаранне, пра якое таксама столькі кажуць апошнім часам.
І ўсё ж… Усё ж кожны з пацыентаў – чалавек, са сваімі эмоцыямі і пачуццямі, са сваім уласным (і найчасцей вялікім!!!) страхам. Падбадзёрыць, супакоіць падчас нават 5-10 хвіліннага прыёму – хіба гэта непад’ёмна цяжка для ўрача?!
А вось Дэпартамент аховы здароўя Цюменскай вобласці, між іншым, распрацаваў пэўныя камунікатыўныя стандарты для медыкаў (чытайце ў №34 газеты «Медыцынскі веснік»). І там рэкамендавана, што і як павінен гаварыць урач падчас знаёмства альбо чарговай сустрэчы з наведвальнікам установы, як мець стасункі па тэлефоне і нават як адмаўляць у просьбе. Слушны вопыт, які сапраўды варты пераймання… Даўно ўжо ў нас наспела неабходнасць у гэтым.
Хаця б крыху больш чалавечнасці адзін да аднаго ў стасунках – і наколькі лягчэй будзе ўсім! Здаецца, аксіёма… Але ж… Ніяк пакуль.
Дык давайце зробім першыя крокі насустрач адно аднаму заўтра, падчас эстафеты «У імя жыцця»! Пачатак – у 11.40 з танца «Раніца новага дня».
24 жніўня ў рамках эстафеты «У імя жыцця» для анкапацыентаў і іх блізкіх анестэзіёлаг-рэаніматолаг, кандыдат медыцынскіх навук, дацэнт кафедры анестэзіялогіі і рэаніматалогіі БелМАПА, член Прэзідыума Беларускага таварыства анестэзіёлагаў-рэаніматолагаў, Беларускай асацыяцыі ўрачоў і Еўрапейскай асацыяцыі клінічнага харчавання і метабалізму, кіраўнік партала Слушна Вольга Святліцкая прадставіць сваё пасланне «Як не патануць у моры інфармацыі. Інструкцыя для пацыента».
Маючы ў агульнай складанасці 20-гадовы вопыт практыкуючага ўрача, 17 гадоў Вольга Іванаўна працавала з пацыентамі аддзялення анестэзіялогіі і рэанімацыі Рэспубліканскага цэнтра гематалогіі і перасадкі касцявога мозгу на базе 9-й гарадской клінічнай бальніцы г.Мінска (цяпер – Мінскі НПЦ хірургіі, транспланталогіі і гематалогіі ).
Пад уплывам шматгадовай напружанай працы рэаніматолагам і вопыту чалавека, у чыім блізкім асяроддзі ёсць людзі з анкалогіяй, фарміраваўся яе ўласны погляд на праблемы і патрэбы анкапацыентаў.
Вольга Іванаўна, доўгія гады працы ў аддзяленні, дзе жыццё зусім не фігуральна мяжуе са смерцю, аказалі ўплыў на вас як на прафесіянала?
— У аддзяленне гематалагічнай рэанімацыі Рэспубліканскага цэнтра гематалогіі і трансплантацыі касцявога мозгу я патрапіла па размеркаванні пасля заканчэння Мінскага медінстытута. Сапраўды, мы вялі вельмі цяжкіх пацыентаў – з вострымі і хранічнымі лейкозамі, злаякаснымі лімфомамі, вялікімі пухлінамі, з рэцыдывамі, без перадумоў да рэмісіі з вялікай колькасцю ўскладненняў…
Прыйшоўшы туды маладым спецыялістам, я ўкладвала душу ў сваю працу. Але выгаранне наступіла праз 2 гады, калі я зразумела, што жыццё анкапацыентаў у рэанімацыі не заўсёды падпарадкоўваецца медыцынскім законам. Здаецца, усё робіш правільна, а рак усё роўна забірае гэтае жыццё.
Асабліва цяжка было змірыцца, калі гаворка ішла пра маладых людзей, якім па 25-35 гадоў. Зараз я больш працую з цяжкімі пацыентамі хірургічнага і тэрапеўтычнага профілю. Пры своечасовай дыягностыцы, граматным лячэнні большасць з іх гарантавана папраўляецца. У анкалогіі гэта не зусім так. Тут гарантый няма. Прагрэсія захворвання заўсёды надыходзіць у самы непадыходзячы момант.
Я ўзяла перадышку на год, пагрузілася ў вучобу ў клінічнай ардынатуры. Вярнулася, калі знайшла кропку апоры ў працы з анкагематалагічнымі пацыентамі. Яна да гэтага часу служыць для мяне магутным матыватарам: падоўжыць жыццё гэтак жа высакародна, як яго выратаваць.
Анкалагічны пацыент адрозніваецца ад іншых пацыентаў?
— Так, адрозніваецца. Тыя, хто доўга працуе ў медыцыне, вам пацвердзяць, што пацыенты, скажам, з рэўматычнымі захворваннямі і анкапацыенты – як неба і зямля.
Я схільная да таго меркавання, што анкалогія не проста фізічная хвароба, у ёй ёсць духоўны складнік. За час працы ў гематалагічнай рэанімацыі праз мае рукі прайшлі сотні людзей. Многія пацыенты з анкагематалагічнымі захворваннямі захоўвалі ясную памяць ажно да апошніх гадзін жыцця. І некаторыя, сыходзячы, былі вельмі адкрытыя. Ні адзін з іх не ўспамінаў працу, кар'еру, пэўныя матэрыяльныя даброты, якіх не атрымалася дасягнуць. Усе казалі пра тое, што недалюбілі, недаадчувалі, недажылі…
Чалавек сутыкаецца з рознымі хваробамі, але ні адна не мае нават блізка супастаўнага ўплыву на яго жыццё, як рак. Гэта свайго роду тумблер, пераключальнік: шчоўк – і жыццё пайшло па іншым сцэнары.
Усё, што магло ўяўляць цікавасць «да», сыходзіць на другі план альбо сыходзіць наогул: праца, кар'ерны рост, матэрыяльны дабрабыт, пэўныя бытавыя дробязі, якія здаваліся архіважнымі... Чалавек часцяком застаецца адзін у асяроддзі толькі тых нямногіх людзей, якія яго сапраўды любяць і шануюць. І ў рэанімацыі гэта бачна асабліва выразна.
Анкапацыенты адрозніваюцца не проста тым, што яны сур'ёзна захварэлі, а тым, што іх ранейшае жыццё разбураецца раптоўна. У іх ёсць страх, яны не разумеюць, як сабрацца, не ведаюць, што ім рабіць далей. Яны маюць вялікую патрэбу ў псіхаэмацыянальнай падтрымцы. Але праблема ў тым, што яе часцей за ўсё няма, няма каму выбудаваць вакол іх новае жыццё.
Хто павінен забяспечваць гэтую псіхаэмацыянальную падтрымку? Сябры, калегі і нават блізкія часцяком аддаляюцца менавіта таму, што не ведаюць, што казаць і як казаць, аддаюць перавагу трыманню на адлегласці.
— Гэта праблема беларусаў. Я бачыла гэтыя жыццёвыя катастрофы, калі чалавек захварэў – і вакол яго паступова фарміраваўся вакуум. Некаторыя казалі, што самае жудаснае – гэта цішыня, калі перастае званіць тэлефон. І вось гэты момант для іх таксама пераломны. Любая хвароба чысціць, а рак чысціць асабліва, паказваючы, што ў жыцці было сапраўдным, а што фальшывым, надуманым.
На мой погляд, у нас не выбудаваная сістэма псіхалагічнай дапамогі такім пацыентам. Прыйсці да чалавека ў той момант, калі яго жыццё ламаецца, і сказаць: ну, ты не хвалюйся, трымайся – гэтага мала.
Безумоўна, вельмі шмат залежыць ад урача, які першым дае інфармацыю пра хваробу. Трэба ведаць, як сказаць, якімі словамі, калі. Нас гэтаму не вучылі. 10 гадзін медыцынскай этыкі і дэанталогіі за курс медінстытута не лічацца. Што тычыцца мяне, я шмат чытала дадатковай літаратуры, назірала за пацыентамі і метадам спроб і памылак выбудоўвала камунікацыю з імі. У мяне была вострая патрэба ў гэтым. Я бачыла розных пацыентаў, і мне хацелася ім дапамагчы.
Маё цвёрдае перакананне, што ва ўрачоў і/або псіхолагаў, якія працуюць з групай анкапацыентаў, павінна быць спецпадрыхтоўка і дакладнае разуменне той бяды, якая прыйшла да чалавека. Момант прыняцця хваробы можа доўжыцца колькі заўгодна, але пакуль чалавек не прыме, ён не будзе ўцягнуты ў актыўнае лячэнне, не пачне папраўляцца.
Патрэбныя курсы і трэнінг і для практыкуючых урачоў у аддзяленнях. У нас жа ёсць дні інфармавання ідэалагічнай скіраванасці. Чаму нельга праводзіць такія трэнінгі, якія б навучалі ўрачоў гаварыць з пацыентамі і іх сваякамі? Хаця б 2-3 разы на год, але гэта, упэўненая, мела б эфект. Адзін ці два псіхолагі ў клініцы праблемы не вырашаюць.
Наогул, гутарка з урачом – гэта палова поспеху, на мой погляд. Урач словам лечыць не менш, чым лекавымі сродкамі. А ў анкалогіі гэтае правіла асабліва працуе. Гэтыя пацыенты вельмі адчувальныя да хлусні. Дзяжурныя фразы не дасягаюць мэты. Ёсць момант, калі трэба зразумець пацыента, не баяцца сустрэцца з ім позіркам.
Што для вас значыць перамагчы рак?
— Калі я толькі пачынала працаваць, мне здавалася, гэта значыць – паправіцца, увайсці ў стадыю ўстойлівай рэмісіі. Сёння я думаю інакш: перамагчы рак – значыць навучыцца жыць у адведзены час поўным жыццём.
Мы часта жывем па чыіхсьці шаблонах. Вучыліся там, дзе хацелі бацькі. Працавалі там, дзе больш плацілі. Рабілі так, каб не выклікаць незадаволеных поглядаў навакольных. А тыя людзі, якія ачунялі, вельмі часта кажуць, што, захварэўшы, нарэшце пачалі займацца тым, пра што марылі ўсё жыццё, але па пэўных прычынах не рашаліся. Не трэба лічыць, колькі адведзена: 20 гадоў, 10 ці 2 гады. Трэба жыць так, каб атрымліваць задавальненне ад кожнай хвіліны.
Чаму для вас важны ўдзел у эстафеце і ў чым заключаецца ваша пасланне?
— Так здарылася, што блізкія мне людзі захварэлі на рак. Сябар майго дзяцінства памёр ад лейкозу ў рэанімацыі, дзе я працавала. Анкалогія ў члена маёй сям'і. Той вопыт, які я атрымала ў анкагематалогіі, і бяда, якая закранула маіх блізкіх, дэманструюць, што нават пры вельмі добрым медыцынскім падыходзе з пункту гледжання дыягностыкі і лячэння, анкапацыенты абсалютна кінутыя ў сваім сацыяльным і бытавым жыцці.
Удзельнічаць у эстафеце мяне запрасіла кіраўнік Цэнтра падтрымкі анкапацыентаў «У імя жыцця» Ірына Жыхар. Яна папрасіла мяне як урача распавесці, як правільна шукаць інфармацыю ў інтэрнэце. Не сакрэт, што там вельмі шмат інфармацыйнага смецця, якое альбо не мае карысці, альбо нават шкодзіць (пацыенты перастаюць верыць урачу, кідаюцца з крайнасці ў крайнасць, адмаўляюцца ад лячэння). Вельмі мала рускамоўнага кантэнту, які з'яўляўся б правільным, праўдзівым і поўным пра жыццё гэтых людзей, іх патрэбы, бытавую і сацыяльную адаптацыю.
Маё пасланне заключаецца ў тым, каб навучыць людзей з анкалагічнымі захворваннямі і іх блізкіх крытэрыям ацэнкі ступені праўдзівасці знойдзенай інфармацыі, аналізаваць і рабіць высновы. Я назаву рэсурсы, якім варта давяраць.
Які ваш асабісты рэйтынг кампетэнтных крыніц для пацыента?
— Перш за ўсё гэта ўрач, які лечыць. У ідэале. На другое месца я б паставіла пацыенцкую арганізацыю. Я глыбока перакананая, што з такімі арганізацыямі павінны працаваць высокакваліфікаваныя ўрачы. І вельмі рада, што ёсць эстафета «У імя жыцця», у якой бяру ўдзел я і мае калегі. Гэта вельмі правільнае развіццё.
Увогуле, надышоў час ушчыльную працаваць з пацыенцкімі арганізацыямі, разбірацца, чаго не хапае пацыенту.
Наша сістэма аховы здароўя, сацыяльнай падтрымкі і занятасці цалкам справядліва можа лічыць, што пабудавала ідэальную сістэму медыцынскай дапамогі і сацыяльнай адаптацыі анкапацыентаў. Але мы не бачым яе вачыма самога пацыента і яго блізкіх, не разумеем, у якіх месцах сістэма дае збой. Каму пра гэта можа сказаць пацыент? Урачу, які лечыць? Але гэта не яго кампетэнцыя. Вось якраз пасрэднікам паміж сістэмай і чалавекам можа і павінна выступаць пацыенцкая арганізацыя.
Ці ёсць у вас мэта, якой вы хацелі б дасягнуць у будучым?
— Як кіраўнік партала Слушна, бачу адну з найважнейшых задач праекта ў тым, каб стварыць карысны, дакладны і актуальны кантэнт для анкапацыентаў у нашай краіне. Абавязкова з магчымасцю зваротнай сувязі. Мы ўжо працуем над гэтым. Праект носіць назву «Жыццё з анкалогіяй». Мы гатовыя працаваць у рэжыме анлайн, адказваць на пытанні пацыентаў, фарміраваць правільны пасыл па харчаванні, фізічнай актыўнасці, доглядзе сябе, суправаджэнні хіміятэрапіі, якая праводзіцца ў амбулаторных умовах, калі чалавек знаходзіцца дома.
Важна навучыць правільна арганізаваць сваё жыццё і сузалежным, гэта значыць, сям'і анкапацыента. Гэта таксама наша мэта, да якой мы планамерна і мэтанакіравана ідзем.
Акрамя таго, стварэнне адзінага вычарпальнага тэкставага, візуальнага, відэакантэнту будзе дапамагаць і маім калегам-урачам, якія працуюць на амбулаторным прыёме і не маюць магчымасці падоўгу размаўляць з пацыентамі.
Праз 2 гады пасля пачатку прафесійнай кар'еры вы сутыкнуліся з сіндромам эмацыянальнага выгарання, спрабуючы напоўніцу аддацца працы. Тым не менш, вы 20 гадоў у прафесіі, практыкуючы ўрач. Што дапамагае вам згараючы – не згарэць?
— Можа гэта банальна, але мне сумна без маёй працы. Урач інтэнсіўнай тэрапіі – гэта як пілот, як спецназ, у яго ёсць пастаянная патрэба ў адрэналіне: ісці ў аддзяленне, вырашаць складаныя пытанні, быць гатовым прымаць рашэнне, калі час ідзе на хвіліны і нават секунды.
Так, бывае і цяжка, і горка, і крыўдна. Раней я з'язджала на пару дзён на дачу, каб пабыць у адзіноце, у поўнай цішыні. А год таму адкрыла для сябе новую крыніцу перазагрузкі. Я пачала займацца боксам. Знясільваючыя фізічныя трэніроўкі – гэта як процівага эмацыянальным нагрузкам. Баланс вяртаецца.
Якое правіла вядзе вас па жыцці?
— Калі табе дастаўся лімон, зрабі з яго ліманад. Стараюся яго і прытрымлівацца.
Фота – Віталь Гіль.
Памятаеце такую мілую немудрагелістую загадку для дзяцей?! «Хто ў чырвоных ботах ходзіць па балотах?» Правільна, бусел! А што за трансфармацыя адбылася ў мяне? Ды проста сёлета буслоў бачыла ў колькасці, якая, відаць, пераўзышла ўжо і вераб’ёў, і галубоў. І найчасцей чамусьці – уздоўж дарог. Дакладна вартавыя!:)
І зусім не баяліся яны сёлета ні людзей, ні машын, ні самой шашы, якая пры вялікай загрузцы гудзела-свісцела. Часцяком з акна маршруткі я назірала малюнак, як буслы спаважна, па аднаму-два, шпацыравалі, ды па правілах дарожнага руху – насустрач транспарту, які рухаецца! J А на зваротным шляху абавязкова шукала позіркам птушку непадалёк ад завароту на вёску Ваўкавыск Чэрвеньскага раёна. І бусел там ці не месяц штовечар гуляў!
Пра розум гэтых птушак складзеныя цэлыя легенды. І пра навігатар у іх галовах, які дазваляе знайсці шлях у цёплыя краіны і дадому, і пра такую ж сямейную вернасць, як у лебедзяў… А яшчэ ж яны – адмысловыя будаўнікі. Такія буслянкі ладзяць з нуля!
Памятаю, як уразіла мяне колькі гадоў таму дарога праз адну з вёсак Старадарожчыны, дзе ледзь не на кожным слупе была буслянка з насельнікамі! Во гэта відовішча! Мабыць, шчасціць там людзям… Бо адно з народных уяўляенняў пра бусла – што ён нясе ў хату шчасце, згоду, лад, паразуменне і дабрабыт. Ну, і дзетак, вядома ж… 🙂
Самае цікавае, што народныя прыкметы наконт таго, што трэба рабіць, калі ўпершыню ў сезоне ўбачыш буслы, розняцца. Паводле адных, трэба адразу ж сесці на зямлю, бо інакш дабрабыту ў хаце не будзе і гаршкі будуць біцца.
Паводле другіх, добра згледзець першы раз бусла ў палёце ды яшчэ пры гэтым паскакаць ці прабегчы – тады ногі ўвесь год балець не будуць. Паводле іншых, трэба было… памыцца – тады будзеш здаровым. І яшчэ пры першай сустрэчы абавязкова сказаць: «На ціхае лета, на буйнае жыта, а нам на здароўе».
Лічылася, што прылятаюць буслы на Дабравешчанне (7 красавіка), а адлятаюць на Спас (часцей за ўсё – Яблычны, 19 жніўня). Называецца і дата 26 жніўня. Існуюць таксама народныя назіранні.
Калі птушкі адлятаюць да Спаса, значыць, чакаем раннюю марозную зіму (хацелася б! – усё роўна лета не было), калі пазней – зіма запозніцца, але восень чакаецца цёплай (!!!), а вясна будзе халоднай.
Зрэшты, апошнім часам штосьці такое ўтварылася і з надвор’ем, і з самой прыродай, што і не ведаеш, чаму верыць. Відаць, толькі таму, што зямны шар няправільна круціцца… Не так, як раней.
Два гады запар нашай сям’і нечакана пашчасціла назіраць, як буслы збіраюцца ў вырай. Аблюбавалі яны для месца сустрэчы чамусьці неба над пасёлкам Сельгастэхніка Чэрвеньскага раёна і прастору над нашай дачнай сядзібай (усё знаходзіцца побач).
Упершыню згледзеўшы вялікую іх колькасць, якая кружыла проста над дарогай, я так разгубілася, што нават не спыніла машыну, хаця магла б. Проста няўцямліва пазірала ў неба, не верачы сваім вачам! Але ж і фотаапарат быў з сабою… І не давялося зрабіць здымкі.
Затое на наступны год… Хаця і сталася такой жа неспадзяванкай, усё ж, утаропіўшыся ў нябесную блакітную бясконцасць, я лавіла тых прыгожых птушак у аб’ектыў.
Доўга… Так доўга яны кружылі над нашымі хатамі, то збіраючыся разам, то імкліва разлятаючыся! А то, здавалася, накіроўваючыся прама на сонца! І ці гэта танец іх быў такі, ці то настройка радараў-навігатараў… А можа, чакалі іншых. Бо падляталі ўсё новыя і новыя птушкі…
І ўсё ж праз дзень пасля адлёту я зноўку пабачыла іх на тэрыторыі нашага раёна. Сапраўднымі вартавымі дарог яны стаялі.. на скручаных цюках саломы! Па саміх палетках гуляла буслоў мала. А вось што яны там, на цюках, рабілі, чаго чакалі – таксама загадка.
Традыцыйна лічыцца, што парушыць буслянку, ссячы дрэва, на якой яна ўладкаваная, альбо забіць бусла – вялікі грэх, за які на таго, хто гэта зрабіў, і яго сям’ю абрынуцца страшныя пакаранні. Але хіба ж можна такое нават удумаць, гледзячы на гэтых дзівосных істотаў і прыгадваючы легенды-паданні, паводле якіх бусел даўным-даўно… таксама быў чалавекам!
One fine body…