Як перажыць навагодняе застолле без шкоды для арганізма. Парады ўрача

• Салаты, запраўленыя маянэзам, тыя ж традыцыйныя «аліўе» і «селядзец пад футрам», лепей з'есці ў самым пачатку вечара, але невялікую порцыю. Непажадана іх даядаць на наступны дзень. Такія стравы хутка псуюцца, а значыць, высокая рызыка атрымаць банальнае атручванне.

Пасля салатаў з маянэзам, як правіла, надыходзіць чарга гарачых страў. Не варта забывацца, што ўначы арганізм зусім не настроены на ежу, асабліва на прыём ежы гарачай і тлустай. Таму на гарачае лепей выбіраць нятлустае мяса альбо рыбу.

Падчас святочнага застолля не варта ўжываць вялікую колькасць пакетаваных сокаў, салодкіх газаваных напояў, у тым ліку і шампанскага.

• Не забывайцеся на пітны рэжым.

Па-першае, алкагольныя напоі валодаюць мачагонным эфектам. З-за гэтага арганізм губляе вадкасць, кроў гусцее, узрастае нагрузка на сэрца. Па-другое, пакутуе печань, бо ёй даводзіцца працаваць з падвойнай сілай – нейтралізоўваць таксіны, якія паступаюць у арганізм, у прыватнасці, алкаголь. Каб паменшыць інтаксікацыю арганізма, не забывайцеся на правіла: адна порцыя алкаголю – дзве порцыі негазаванай вады.

• Навагодняе застолле лепей расцягваць. Не варта ўвесь час сядзець за сталом.

Правіла ўставаць з-за стала крыху галодным дзейнічае і падчас святочнага застолля. Пачуццё сытасці заўсёды спазняецца.

Калі ўсё ж такі вы адчуваеце, што пераелі, можна прыняць прэпараты, якія ўтрымліваюць стрававальныя ферменты.

• 1 студзеня лепей зрабіць разгрузачны дзень. Гэта могуць быць гародніна, рыба альбо невялікі кавалачак нятлустага мяса. На працягу дня трэба таксама піць дастатковую колькасць вады.

Наступствы пераядання

Безумоўна, багацце страў на святочным стале рэдка каго пакіне абыякавым. Хочацца пакаштаваць усё і адразу. Аднак наступствы бурнага святкавання не заўсёды заканчваюцца толькі галаўным болем раніцай.

Калі было з'едзена занадта шмат, можа ўзнікнуць уздуцце (метэарызм), з'яўляецца адрыжка, часам нават ваніты і дыярэя.