А за надвор’ем на Алену таксама традыцыйна назіралі. Калі ў гэты дзень непагадзь, прыкмячалі нашыя продкі, дык і восень будзе непагодлівай. Ну, з такой вясной і такім пачаткам лета восень нас ужо дакладна нічым не здзівіць… Бо пакуль абяцаюць пацяпленне толькі да выхадных. І суцэльныя дажджы ў прагнозах. Вось і ратуй будучы ўраджай, як хочаш. Хіба ў дажджавіках ці пад парасонамі?!
І на зіму даўней прагнозы па Алене рабілі. Калі ў гэты дзень дождж з градам (хаця Градабоем называлі сераду наступную – 10 чэрвеня), дык трэцяга снежня – снег «крупкамі». О, а вось наконт снегу ў снежні мы і зусім не супраць, праўда?!
Прачытала дзве карысныя парады пра лён – і завісла, як той камп’ютар. Першая сведчыць: «Лён пасля дажджу не сеюць». Другая – «Лён у сухую зямлю пасееш – застанешся без пасеваў». Хм… І так дрэнна, і так… Ды дзе ж яго ўзяць, ідэальнае надвор’е?! Ды яшчэ ва ўмовах масавага засеву палёў сельгаспрадпрыемстваў і арганізацый. Вядома ж, сеяць стараюцца ў аптымальныя тэрміны… А там прырода і нябесная канцылярыя альбо дапамогуць, альбо не.
Памятаю, як колькі гадоў таму пры падрыхтоўцы рэкламнага матэрыялу пабыла з рэкламадаўцам на некалькіх палетках Мінскай вобласці, дзе прымяняўся яго прэпарат. І ведаеце, сапраўды, лён там адрозніваўся – апрацаваны ад неапрацаванага. І даволі значна. Нават няўзброеным вокам было бачна. А яшчэ спецыялісты распавялі пра розніцу…
І якое ж гэта хараство, калі лён цвіце! Як казалі нашыя продкі – «Лён два тыдні квітнее, чатыры тыдні спее, на сёмы – насенне ляціць». Так што за два тыдні можна ім налюбавацца напоўніцу!
А яшчэ ж ёсць лён дэкаратыўны. Спецыяльна для кветнікаў. Памятаю, адзін год вырошчвала з насення, а на другі ён сам узышоў.
«І што ж нам да таго лёну, што калісьці сеялі продкі?» – запытаецеся вы. Але ж яго і зараз сеюць – у прамысловых маштабах. Дык давайце ўзгадаем (альбо даведаемся) пра тую карысць, якую кожны з нас можа мець з лёну. І пачнем з ільняной вопраткі ды пасцельнай бялізны.
Ужо ніхто не спрачаецца з тым, што льняная тканіна мае бактэрыялагічныя ўласцівасці. На ёй не выжываюць ні бактэрыі, ні грыбкі. Вось чаму льняную бялізну і вопратку найперш раяць тым, хто церпіць ад захворванняў скуры.
Аматары льняной пасцельнай бялізны цэняць яе за добрую гіграскапічнасць. Такія ж уласцівасці мае і вопратка з лёну. Таму гэта проста знаходка для гарачых дзён лета, калі пот выдзяляецца з вялікай інтэнсіўнасцю.
Не любіце, калі вопратка «іскрыцца» і нават злёгку «б’ецца токам» пры здыманні?! Тады вам дакладна даспадобы будзе льняная: электрызуецца яна мінімальна. А спецыялісты кажуць, што нават 10% лёну ў тканіне будзе дастаткова, каб прыбраць «іскры». І, вядома ж, у льняной вопратцы не так горача. Яна прыемная для цела, бо натуральная і экалагічная. Своеасаблівы тэрмарэгулятар.
Спецыялісты нават сцвярджаюць, што вырабы з ільну змяншаюць стамляльнасць арганізма. А сон на льняной прасціне… умацоўвае імунітэт! Так што ў каго яшчэ няма рэчаў з ільну – наперад! 🙂
А таму, хто сочыць за здароўем, хоча схуднець, зменшыць узровень шкоднага халестэрыну, – шлях у аптэку (там надзейней купляць!), па насенне лёну.
Яно дапаможа пры запорах (толькі не ўжываць пры кішэчнай непраходнасці!), нармалізуе дзейнасць страўнікава-кішэчнага тракту, ачысціць яго ад шкодных рэчываў. У сеціве можна знайсці разнастайныя рэцэпты: пры болю ў страўніку, гастрыце, язве…
Таксама, па сведчанні спецыялістаў, лён дапамагае змагацца з ракавымі клеткамі. Таму яго насенне варта ўжываць для прафілактыкі раку малочных залозаў, тоўстай кішкі, прастаты.
А вось цяжарным жанчынам і тым, хто корміць дзіця, насенне лёну катэгарычна не рэкамендуецца! Астатнім трэба таксама ўважліва сачыць за рэакцыяй уласнага арганізма, каб не было алергіі.
Апрача прыгатавання адвараў, настояў ды іншага раяць ужываць і проста сухое насенне, але лепей здробненае. Яго можна дадаваць у розныя стравы.
Запыніўся позірк і на цікавым рэцэпце для пахудзення і нармалізацыі абмену рэчываў. Трэба замачыць 1 сталовую лыжку здробненага (!) насення лёну ў палове шклянкі кефіру на 30 хвілін. Усё, можна піць! 2 разы ў суткі: раніцай (лепей нашча) і ўвечары перад сном. Праз тры тыдні зрабіць тыднёвы перапынак.
Ёсць свае аматары ды прыхільнікі і ў ільнянога алею. Толькі ўжываць яго варта ў натуральным выглядзе: асобна альбо запраўляць салаты ды іншыя стравы. А смажыць на ім – нельга! Як і падаграваць іншым чынам. Не толькі ўсе карысныя ўласцівасці згубяцца, але і шкодныя рэчывы ўтворацца. Можна нават атруціцца…
Няма настрою? Апатыя, лянота?! Тады льняны алей – ваш прадукт! І пры стрэсе дапаможа. І жанчынам падчас менапаўзы. Кажуць, нават работа мозгу актывізуецца.
Вось такі гэта сінявокі цуд, які сёння сеяць трэба. А карыстацца вырабамі з яго можна ў любы час. І няхай усё ідзе выключна НА ЗДАРОЎЕ!
Падпісвайцеся на наш канал у Telegram, групы ў Facebook, «УКантакце», у «Аднакласніках» – і будзьце ў курсе свежых навінаў! Толькі цікавыя відэа на нашым канале YouTube, далучайцеся!
