Міжнародны фестываль мастацтваў «Славянскі базар у Віцебску» — адна з буйнейшых культурных падзей у Беларусі і ва ўсёй Усходняй Еўропе. Ён праводзіцца штогод у горадзе Віцебску, прываблівае тысячы турыстаў з усяго свету і сёння з'яўляецца найбуйнейшым святам мастацтваў і музыкі ў краіне.
Першы фестываль «Славянскі базар» адбыўся ў 1992 годзе і быў прымеркаваны да Дня Незалежнасці Беларусі. З тых часоў ён стаў традыцыйнай і важнай падзеяй для многіх людзей. На працягу некалькіх дзён на вуліцах Віцебска праходзяць канцэрты, выстаўкі, тэатральныя паказы і іншыя мерапрыемствы.
да зместуКрыху гісторыі
Асноўны акцэнт фестывалю робіцца на музыку, мастацтва і культуру славянскіх народаў. На сцэнах выступаюць вядомыя артысты з розных краін, і афіша «Славянскага базару» з году ў год радуе гасцей і жыхароў Віцебска сваёй разнастайнасцю. Акрамя таго, на фестывалі можна ўбачыць выстаўкі работ мастакоў, майстар-класы па народных рамёствах і іншыя цікавыя мерапрыемствы.
Адной з галоўных асаблівасцей фестывалю з'яўляецца яго каларыт. Усе госці могуць пагрузіцца ва ўнікальную атмасферу славянскай культуры і атрымаць асалоду ад яе прыгажосці.
Кожны год фестываль становіцца ўсё больш папулярным, ён прыцягвае новых удзельнікаў і гледачоў.
У 2003 годзе ў межах «Славянскага базару» ўпершыню пачалі праводзіць конкурс дзіцячых выканаўцаў, мэта якога выяўляць і падтрымліваць творча адораных дзяцей і таленавітую моладзь. Дзякуючы конкурсу маладыя таленты могуць развіваць свае творчыя здольнасці і павышаць узровень майстэрства. І, вядома ж, ён таксама садзейнічае развіццю і ўмацаванню міжнародных культурных сувязей, абмену духоўнымі і культурнымі каштоўнасцямі.
Фестываль «Славянскі базар у Віцебску» — яскравы прыклад таго, як культура можа аб'ядноўваць людзей з розных краін і нацыянальнасцей. Ён працягвае натхняць сваіх наведвальнікаў кожны год, дорачы ім незабыўныя ўражанні і эмоцыі.
да зместуАсаблівасці канцэртнай праграмы
Фестываль сёлета расчыніць свае дзверы з 9 па 15 ліпеня для аматараў музыкі, танцаў, тэатра і іншых відаў мастацтваў, таму надышоў час вывучаць афішу і праграму будучых мерапрыемстваў і выбіраць канцэрт,спектакль альбо іншую імпрэзу, каб паспець купіць білеты, пакуль яны яшчэ ў продажы.
У 2024 годзе «Славянскі базар» у Віцебску пройдзе 33-і раз у сваёй гісторыі і традыцыйна парадуе гледачоў вялікай разнастайнасцю святочных мерапрыемстваў, канцэртаў і паказаў. Госці і жыхары Віцебска змогуць змогуць наведаць канцэрты рознай тэматыкі ў стылі рок, поп, джаз, шансон, акунуцца ў атмасферу міжнароднага танцавальнага конкурсу, дзіцячага музычнага конкурсу. Таксама афіша фестывалю ўключае ў сябе спектаклі, КВЗ-гульні, канцэрты ў рамках Дзён Саюзнай дзяржавы і, вядома ж, любімы многімі канцэртны праект «Залаты хіт», які з года ў год збірае на сцэне зорак 90-х і 2000-х.
— Падчас складання праграмы форуму мы ўлічвалі, каб фестываль мог заставацца модным, сучасным, але пры гэтым захаваў галоўнае — сваю душу, — адзначае дырэктар Цэнтра культуры «Віцебск», кіраўнік Міжнароднага фестывалю мастацтваў «Славянскі базар» Глеб Лапіцкі. Акрамя традыцыйных мерапрыемстваў гледачы змогуць ацаніць і новы праект «Госці з будучыні», які збярэ каля 3000 чалавек: дзяцей, моладзь, блогераў, ціктокераў. Назва ў кропку, бо менавіта дзеці — будучыня нашага «Славянскага базару».
Сёлета спраўдзіцца запаветная мара ўдзельнікаў дзіцячага конкурсу: усім ім дадуць магчымасць выйсці на сцэну Летняга амфітэатра. Да гэтага на ёй выступалі толькі ўладальнікі Гран-пры.
Добрая навіна і ў тым, што ў Летні амфітэатр вяртаецца рок. Курс — на лепшыя сусветныя хіты. У час вялікай рок-панарамы ўпершыню выступіць сімфанічны аркестр Нацыянальнай дзяржаўнай тэлерадыёкампаніі. Акрамя беларускага гурта SkyNet, на сцэну выйдзе спецыяльны госць — праект «Гаршанёў» музыкі Аляксея Гаршэнёва, роднага брата лідэра гурта «Кароль і Блазан», а з Расіі прывязуць афіцыйны трыб'ют гурта Scorpions, тым самым паказаўшы, што рок не мае межаў.
Урачыстае адкрыццё «Славянскага базару» адбудзецца 11 ліпеня. Наступным днём афіцыйна дадуць старт мерапрыемствам Дня Саюзнай дзяржавы. У Летнім амфітэатры пройдзе гала-канцэрт «Саюзная дзяржава запрашае...», які аб'ядноўвае на адной сцэне вядучых майстроў мастацтваў Беларусі і Расіі.
Праграма Віцебскай абласной філармоніі будзе джазавай. Упершыню падчас фестывалю джаз прагучыць на аргане ў суправаджэнні ўдарных інструментаў. На сёлетнім свяце закладуць і новую традыцыю — фестываляў-пабрацімаў, падзяліўся Глеб Лапіцкі:
— Тры гады таму ў Нальчыку з'явіўся Міжнародны музычны фестываль Kavkaz Music Fest. З яго арганізатарамі мы настолькі пасябравалі, што вырашылі запрасіць гэты этнічны форум да нас у Віцебск.
На сцэну Віцебска выйдуць самыя папулярныя артысты каўказскай эстрады з Адыгеі, Дагестана, Кабардзіна-Балкарыі, Карачаева-Чаркесіі, Паўночнай Асеціі, Чачні. Сярод іх: народны артыст Расійскай Федэрацыі Заур Тутаў, народны артыст Паўночнай Асеціі Фелікс Царыкаці, народны артыст Кабардзіна-Балкарскай Рэспублікі Чэрым Нахушаў, народны артыст Кабардзіна-Балкарскай Рэспублікі Амур Цекуеў, а таксама Дзяржаўны акадэмічны ансамбль танца «Кабардынка» — найстарэйшы харэаграфічны калектыў Паўночнага Каўказа, якому сёлета спаўняецца 90 гадоў, і многія іншыя.
Адзін з самых любімых і чаканых гледачамі праектаў — «Залаты хіт» — пройдзе ў Летнім амфітэатры ў ноч з 12 на 13 ліпеня. Тон рэтравечарынцы зададуць «Самацветы», Ірына Забіяка (група «Чылі»), «Вінтаж», «Дыскамафія», «Вірус», «Султан Ураган», Ілона Бранявіцкая, Baccara (Іспанія), DoReDos (Малдова).
На конкурсе маладых выканаўцаў эстраднай песні вакалісты выканаюць славянскія хіты разам з Прэзідэнцкім аркестрам Рэспублікі Беларусь.
А ў другім аддзяленні выступіць даўні сябар фестывалю — арт-гурт «Хор Турэцкага».
Не абыдзецца без канцэрта «Шансон», КВЗ-гульні, а тым, хто хоча падоўжыць свята да світання, прапануюць дэбютную танцавальную пляцоўку з «Душэўным радыё» перад канцэртнай залай «Віцебск». Акрамя зорак, тут зможа выступіць гурт, які стане пераможцам новага конкурсу фэсту кавер-бэндаў. Заяўкі на яго ад беларускіх і расійскіх канкурсантаў не прымусілі сябе чакаць.
Праграма абноўленай канцэртнай залы «Віцебск» насычаная. У ёй шмат сольнікаў: Алег Газманаў, Любоў Успенская, Вікторыя Алешка, Яраслаў Сумішаўскі, Ані Лорак. Яркай уверцюрай фестывальным мерапрыемствам у КЗ «Віцебск» стане міжнародны танцавальны праект Dream Dance Fest.
да зместуДля тэатралаў
На любы густ і тэатральная праграма. У ёй — пастаноўкі расійскіх тэатраў імя Уладзіміра Маякоўскага, «На Васільеўскім», «Тэатра на Паўднёвым Захадзе», а таксама Купалаўскага і Коласаўскага. У Нацыянальным акадэмічным драматычным тэатры Якуба Коласа адбудзецца важная прэм'ера. Прафесар ГІТІСу Аляксандр Бармак прывязе ў Віцебск шэкспіраўскага «Гамлета» на беларускай мове.
З прадчуваннем у горадзе над Дзвіной чакаюць і музычна-паэтычнае шоу «Людміла Зыкіна. Споведзь. 17 гадоў таямніцы», прымеркаванае да 95‑годдзя рускай спявачкі.
Для зручнасці ўдзельнікаў і гасцей на фестывалі задзейнічаюць максімальную колькасць плошчаў.
У Свята-Успенскім кафедральным саборы пяты раз пройдзе свята харавой музыкі «Славянскі благавест», фестываль аўтагуку і фарбаў Холі прыме парк імя Савецкай Арміі ў Мазурына. Вядома, застаюцца ўжо знакамітыя гледачам Фэст вулічнага мастацтва «На сямі вятрах» і «Лялечны квартал». У межах Дзён Саюзнай дзяржавы разгорнецца open-air «Гуляй народ». Сёлета на яго запрасілі не толькі прыгранічныя рэгіёны, але і гасцей з Ленінградскай вобласці.
да зместуАдукацыйныя аспекты
Пашыраецца і адукацыйны вектар «Славянскага базару». Тэатральную і вакальную лабараторыю дапоўніць інструментальная. Яна будзе рэалізавана разам з Расійскай акадэміяй музыкі імя Гнесіных на базе Віцебскага музычнага каледжа імя І. І. Салярцінскага і пабудавана на двух нацыянальных народных інструментах — рускай балалайцы і беларускай домры.
Музей Марка Шагала ў Віцебску таксама рыхтуецца да фэсту. Тут для жыхароў і гасцей горада ёсць унікальная магчымасць пазнаёміцца блізка з творчасцю знакамітага мастака і даведацца самыя важныя і цікавыя факты з жыцця майстра.
Больш падрабязна пра мерапрыемствы «Славянскага базару» можна даведацца на афіцыйным сайце фестывалю.
