Як злавіць «гарачы тур»

Сёння ёсць добрая магчымасць зэканоміць на адпачынку. Выдатнай прапановай ад турыстычных кампаній з'яўляюцца пуцёўкі, якія «гараць». Яны з'яўляюцца непасрэдна перад датай адпраўлення рэйса: у бязвізавыя краіны за тыдзень; у краіны, дзе неабходная віза, за 10 дзён. Такую пуцёўку можна набыць з вялікай зніжкай (часам больш за 50%), прычым чым бліжэй дата вылету, тым з большай зніжкай турыстычная кампанія будзе прадаваць пуцёўку.

У Беларусі многія турагенцтвы арганізуюць адпачынак па «гарачых турах». Яны публікуюць прапановы на сваіх сайтах (штодня абнаўляюцца). Верагоднасць знайсці «гарачы тур» з авіяпералётам з гарадоў з вялікім турыстычным патокам (Масква, Варшава або Кіеў) значна вышэйшая, чым з Мінска.

Асаблівасці падарожжа па «гарачых турах»

• Нізкі кошт. Набыўшы пуцёўку, якая «гарыць», вы адчувальна эканоміце. Пры гэтым будзеце адпачываць з тым жа камфортам, як і іншыя пастаяльцы гатэля, якія заплацілі на парадак больш.
• Бонусы. Прадаючы пуцёўку, якая «гарыць», турыстычныя кампаніі часцяком прапануюць дадатковыя бонусы падчас падарожжа: вячэру ў дарагім рэстаране, наведванне SPA-салона, аглядную экскурсію.
• Нечаканасці. Падарожнічаючы па пуцёўцы, якая «гарыць», вам, магчыма, давядзецца ахвяраваць некаторым камфортам. Якасць паслуг падчас адпачынку часам можа быць ніжэйшая за заяўленую, бо пуцёўкі, якія «гараць», выпадаюць звычайна на адпачынак у гатэлях, што па пэўных прычынах засталіся незапоўненымі. Але могуць трапляцца «гарачыя туры» і ў прэстыжныя замежныя гасцініцы.

Як злавіць «гарачы тур»

Крок 1. Перш чым лавіць «гарачыя туры», азнаёмцеся з рэкамендацыямі МЗС РБ пры выездзе за мяжу і праверце свае дакументы. Многія дзяржавы прад'яўляюць пры ўездзе ў краіну асаблівыя патрабаванні да пашпарта, а таксама іншыя дадатковыя ўмовы.

Крок 2. Вызначыцеся з пералікам краін, у якіх вы хацелі б адпачыць, з узроўнем камфорту пражывання і харчавання.

Крок 3. Пазначце арыенціровачную дату ад'езду і суму, якую можаце дазволіць сабе выдаткаваць на пуцёўку.

Крок 4. Маніторце самастойна прапанаваныя варыянты пуцёвак, якія «гараць», у краіны, што вас цікавяць, на сайтах турыстычных кампаній.

Крок 5. Абярыце некалькі турфірмаў, якія прапануюць пуцёўкі, што «гараць». Каб не патрапіць у рукі ашуканцаў, папярэдне вывучыце памятку для турыстаў пры звароце ў турыстычныя кампаніі, створаную Дэпартаментам па турызму Міністэрства спорту і турызму.

Крок 6. Звяжыцеся з менэджэрамі выбраных турыстычных кампаній па тэлефоне або з дапамогай анлайн-чату і пацікаўцеся наяўнасцю варыянтаў пуцёвак, якія «гараць». Спецыялісты турфірмаў аператыўна дашлюць спіс прапаноў, з якіх вы зможаце выбраць упадабаны «гарачы» тур.

Крок 7. Браніруйце анлайн альбо ўнясіце заклад турыстычнай кампаніі і чакайце пацверджання ад гатэля па наяўнасці месцаў, а ад авіякампаніі – па наяўнасці білетаў. Паколькі пуцёўкі, якія «гараць», раскупляюцца вельмі хутка, дзейнічайце аператыўна.

У камплект «гарачага» турпакета абавязкова ўваходзяць медыцынская страхоўка, праезд або авіяпералёт з трансферам, пражыванне ў гатэлі.

Падарожнічайце з камфортам і атрымлівайце асалоду ад выдатнага адпачынку па выгодным кошце!