Навошта дзяўчаты і жанчыны (а зрэдку нават мужчыны) фарбуюць валасы? Знойдзецца тысяча прычынаў для пераўтварэння. Камусьці важна напоўніць колерам цьмянае і непрыкметнае адценне натуральных валасоў. Кімсьці рухае запал да пастаяннай змены іміджу. Для кагосьці гэта вымушаная неабходнасць, каб схаваць сівізну. Ёсць і тыя, каму проста падабаецца, наколькі дагледжаным, бліскучым і здаровым выглядае волас пасля ўдалага афарбоўвання. Зрэшты, гэты момант даволі спрэчны, а вынік шмат у чым залежыць ад таго, якая фарба была выкарыстаная.
Трэндам апошніх гадоў з'яўляюцца фарбавальнікі, якія не ўтрымліваюць аміяк. Ім прыпісваюць уласцівасці не толькі афарбоўваць валасы без пашкоджання, але і сілкаваць іх, даглядаць, аздараўляць. Ці так гэта на самай справе? Або безаміячныя фарбы – усяго толькі маркетынгавы ход, выбудаваны на супрацьпастаўленні безумоўна агрэсіўнаму ўздзеянню аміяку на валасы?
Пра плюсы і мінусы безаміячных фарбаў журналіст Слушна распыталася ў Анатоля Лазарава, крэатыўнага дырэктара салона прыгажосці бізнес-класа LSTUDIO и Школы стылю Лазарава.
Плюсы фарбаў для валасоў без аміяку
1. Не парушаюць структуру валасоў
Гэта сапраўды так. Але каб зразумець гэта, трэба разабрацца, як працуе аміяк.
Яго роля пры афарбоўванні простая – забяспечыць максімальнае пранікненне пігмента, што фарбуе, углыб воласа. Як? Руйнуючы яго структуру. Паверхня воласа не бездакорна гладкая. Яна складаецца з мноства лускавінак, бы напластаваных адна на адну. Дзеянне аміяку заключаецца ў тым, што ён адкрывае лускавінкі, забяспечваючы глыбокае пранікненне фарбавальніка.
Пры гэтым перакіс вадароду, пастаянны спадарожнік аміяку ў фарбах для валасоў, разбурае натуральны пігмент. Вынік узаемадзеяння аміяку і перакісу вадароду – устойлівы колер надоўга разам з пашкоджаннем воласа, якое ўзмацняецца пры кожным наступным афарбоўванні аміячным фарбавальнікам.
2. Падыходзяць для адчувальнай скуры галавы
Аміяк – наймагутнейшы раздражняльнік. Яго рэзкі спецыфічны пах «раз'ядае» вочы, выклікае пяршэнне ў горле і кашаль, а працэс афарбоўвання можа суправаджацца паленнем і свербам. Фарбы без аміяку пазбаўленыя такіх пабочных эфектаў. Таму яны ідэальна падыходзяць для людзей з адчувальнай скурай і схільнасцю да алергічных рэакцый. Праўда, пры афарбоўванні валасоў у хатніх умовах тэстам на адчувальнасць лепей усё ж такі не грэбаваць. Індывідуальную рэакцыю на любы кампанент фарбы (не толькі на аміяк) ніхто не адмяняў.
3. Забяспечваюць догляд і сілкаванне валасоў
Усё часцей вытворцы сучасных фарбаў для валасоў, асабліва прафесійных брэндаў бізнес-класа, распрацоўваючы склад прадукту, уводзяць у яго алеі і іншыя інгрэдыенты, якія змякчаюць хімічную рэакцыю пры афарбоўванні. Валасы набываюць роўнае насычанае адценне, пры гэтым застаюцца мяккімі і паслухмянымі.
4. Лёгка пазбавіцца ад штучнага пігменту, які надакучыў
За кошт паніжанага ўтрымання перакісу вадароду і адсутнасці аміяку штучны пігмент не пранікае глыбока ўнутр, і пры неабходнасці даволі проста вярнуць валасам натуральны колер. Безаміячныя фарбы з часам вымываюцца. А калі няма часу чакаць – лёгка выдаляюцца пры дапамозе адпаведнай салоннай працэдуры.
Мінусы безаміячных фарбаў для валасоў
1. Адсутнасць устойлівага афарбоўвання
Сапраўды, у параўнанні з фарбамі, якія змяшчаюць агрэсіўны аміяк, ашчаджальныя фарбавальнікі не забяспечваюць устойлівага доўгачасовага афарбоўвання. Штучны пігмент паступова сыходзіць сам пры кожным мыцці валасоў. З асветленых валасоў безаміячны пігмент знікае яшчэ хутчэй. Зрэшты, мінімальнае адценне можа ўсё ж такі захавацца.
Як шмат часу спатрэбіцца, каб змыць безаміячную фарбу, залежыць ад індывідуальных асаблівасцяў валасоў, структуры і ступені іх пашкоджання. Калі валасы ад прыроды здаровыя, моцныя і ні разу да гэтага не падвяргаліся афарбоўванню, нават безаміячны фарбавальнік будзе трымацца на іх добра і даволі доўга. А вось каб падтрымліваць упадабанае адценне на пашкоджаных, аслабленых валасах, прафесіяналы рэкамендуюць паўторнае афарбоўванне не радзей за раз у адзін-паўтара месяца.
