«У ложку ўзрост не важны». Гэтая фраза, якая стала афарызмам, належыць адной з самых яркіх галівудскіх зорак 90-х Мішэль Пфайфер. Кінадзіва, якая размяняла сёмы дзясятак, мабыць, дакладна ведае, пра што гаворыць. Але ёсць і альтэрнатыўнае меркаванне.
Менавіта ўзрост з'яўляецца адной з вядучых прычын эрэктыльнай дысфункцыі ў мужчын. Эпізадычнае або пастаяннае фіяска ў ложку адчувае кожны другі мужчына, якому за 50.
І ўсё ж, нягледзячы на тое, што з гадамі магчымасці і жаданні ўжо не тыя, што былі ў юнацтве, сэкс – не толькі для маладых. Падтрымліваць здаровае сэксуальнае жыццё цалкам магчыма нават у вельмі сталым узросце. Супрацоўнікі клінікі Меё, аднаго з самых вядомых і аўтарытэтных цэнтраў у галіне аховы здароўя і медыцынскіх даследаванняў, падрыхтавалі шэраг рэкамендацый, як захаваць мужчынскую сілу на доўгія гады.
Што змяняецца з узростам мужчыны?
Па меры старэння ў яго арганізме зніжаецца выпрацоўка тэстастэрону, адпаведна, фізіялагічныя змены сэксуальнай функцыі непазбежныя. Чым старэйшы мужчына, тым больш выяўленыя змены. Напрыклад:
- патрабуецца больш намаганняў для дасягнення і падтрымання эрэкцыі і аргазму;
- інтэнсіўнасць семявывяржэння зніжаецца;
- памяншаецца аб'ём эякулята;
- для дасягнення чарговай эрэкцыі пасля аргазму неабходны больш працяглы перапынак.
Большасць мужчын вельмі трапятліва ставяцца да сваёй сэксуальнай функцыі, і любыя змены з яе боку выклікаюць апраўданы неспакой. Тут два выйсці:
- звярнуцца па кансультацыю да ўролага-андролага;
- адаптаваць сваё сэксуальнае жыццё з улікам зменаў: лепей меней ды лепш – якраз пра гэта. Магчыма, ёсць сэнс звярнуцца і да дадатковых спосабаў стымуляцыі.
Сэкс і праблемы са здароўем
Стан здароўя – гэта, між іншым, яшчэ адна галоўная прычына, чаму сэкс у 50+ ужо не той, што быў у 20.
Усё, што нажытае за доўгія гады: праблемы з сэрцам і сасудамі, цукровы дыябет, хранічны прастатыт, хваробы суставаў і многае іншае – само па сабе не робіць сэксуальнае жыццё прасцейшым і лепшым. Дык яшчэ і некаторыя лекавыя сродкі, якія нармалізуюць артэрыяльны ціск, сардэчны рытм, гарманальны фон ды іншае, маюць пабочныя эфекты, якія негатыўна ўплываюць на лібіда і патэнцыю.
Калі хочацца даўжэй заставацца ў страі і адчуваць жыццё ва ўсёй яго паўнаце, давядзецца размаўляць пра жаданне захаваць сэксуальную актыўнасць нават з няпрофільнымі спецыялістамі: кардыёлагам, эндакрынолагам, тэрапеўтам... Па-першае, так вы атрымаеце рэкамендацыі, як арганізаваць сэксуальнае жыццё на фоне стану вашага здароўя . Па-другое, ва ўрача будзе магчымасць прызначыць прэпараты без пабочнага ўплыву на палавую функцыю.
Сэкс і эмацыянальныя праблемы сталага ўзросту
Стрэс, дрэнны настрой, фізічная стомленасць не спрыяюць сэксу ў любым узросце. АЛЕ ў кожнага ўзросту свае прычыны для эмацыянальных праблем.
З аднаго боку:
- у сталых пар больш часу, што называецца, «для сябе»;
- няма страху перад незапланаванай цяжарнасцю;
- меней фактараў, якія адцягваюць увагу (напрыклад, маленькія дзеці, праблемы, звязаныя з працай, і г.д.).
Дарэчы, большасць людзей шаноўнага ўзросту, якія захавалі інтымную блізкасць, прызнаюцца, што менавіта па гэтых прычынах атрымліваюць ад сэксу больш задавальнення.
З другога боку:
- не ўсе сталыя людзі гатовыя заставацца ўраўнаважанымі і спакойнымі з-за праблем са здароўем;
- часам стан стрэсу абумоўлены зменамі ў ладзе жыцця, фінансавым становішчы і г.д.
Калі дэпрэсія або хандра зрабіліся перашкодай для таго, каб заставацца сэксуальна актыўнымі, пагаварыце са сваім урачом. Ёсць мноства спосабаў (уключаючы лекавыя сродкі) вярнуць сабе душэўны спакой, а значыць, магчымасць атрымліваць радасць і задавальненне ад жыцця і ўсіх яго складнікаў.
Як захаваць сэксуальную актыўнасць. Парады на кожны дзень
- Не бойцеся размаўляць. Гэта нармальна, калі з узростам змяняюцца сэксуальныя патрэбы. Будзьце ўпэўненыя, гэта тычыцца вашага партнёра ў не меншай ступені, чым вас. Нават калі цяжка казаць пра сэкс, адкрыты абмен патрэбамі і жаданнямі – ключ да таго, каб працягваць атрымліваць асалоду ад сэксу і блізкасці.
- Рэгулярна наведвайце доктара. Калі ў вас ёсць хранічныя захворванні, урач дапаможа трымаць хваробу пад кантролем і адкарэктуе тэрапію такім чынам, каб яна не ўплывала на ваша сексуальнае жыццё. Калі ўзніклі праблемы з падтрыманнем эрэкцыі, звярніцеся да ўролага-андролага. Эрэктыльная дысфункцыя ў пераважнай большасці выпадкаў паддаецца лячэнню.
- Сэксалогія – цэлая навука. Сэксолаг – кваліфікаваны спецыяліст, задача якога – дапамагаць вырашаць канкрэтныя праблемы сэксуальнага жыцця. Не варта яго пазбягаць, калі хочаце заставацца сэксуальна актыўным як мага даўжэй.
- Будзьце гнуткімі, навучыцеся не падладжвацца пад новыя ўмовы, а падбудоўваць іх пад сябе. Напрыклад, раніца – лепшы час для блізкасці. Бо вы поўныя сіл і энергіі, адчуваеце сябе адпачыўшым у адрозненне ад таго, як вы можаце сябе адчуваць напрыканцы доўгага дня.
- Не адмаўляйцеся ад рамантыкі. Палавы акт – толькі адзін са спосабаў паўнавартаснага сэксуальнага жыцця. Дотыкі, ласкі, пацалункі, пяшчота таксама з'яўляюцца складнікамі інтымнай блізкасці. Якога б сталага ўзросту ні дасягнулі вы ці ваш партнёр, ніхто не перарастае патрэбу ў эмацыянальнай блізкасці. І часцяком яна важнейшая за фізічны кантакт.
- Калі вы пачынаеце інтымныя адносіны з новым партнёрам, выкарыстоўвайце прэзерватыў. Узрост не абараняе ад рызыкі інфекцый, што перадаюцца палавым шляхам.
- Беражыце сябе і заставайцеся здаровымі, наколькі гэта магчыма. Бо здаровае сэксуальнае жыццё не толькі прыносіць задавальненне. Яно карыснае для іншых аспектаў вашага жыцця, уключаючы фізічнае здароўе і пачуццё ўласнай годнасці.
