Штогод з 1988 па ініцыятыве Сусветнай арганізацыі аховы здароўя 31 мая адзначаецца Сусветны дзень без тытуню. Сёлета мерапрыемствы і ініцыятывы дня накіраваныя на супрацьдзеянне маркетынгавым хітрыкам тытунёвых кампаній, якія яны выкарыстоўваюць для ўключэння маладога пакалення ва ўжыванне тытунёвай і нікацінавай прадукцыі.
Пра тое, колькі людзей паляць у нашай краіне, якія меры прымаюцца для таго, каб знізіць колькасць курцоў, як рэгулюецца продаж цыгарэт, у тым ліку электронных, напярэдадні Сусветнага дня супраць тытуню распавяла загадчыца аддзялення грамадскага здароўя Рэспубліканскага цэнтра гігіены, эпідэміялогіі і грамадскага здароўя Вольга Бартман.
Спажыванне тытуню, паводле інфармацыі СААЗ, штогод з'яўляецца прычынай смерці каля 7 млн чалавек ва ўсім свеце. Калі ж не рабіць ніякіх захадаў па стрымліванні курэння, гэтая лічба можа дасягнуць 8 млн у год.
Кожны год СААЗ вызначае тэму Сусветнага дня без тытуню. На гэты раз у цэнтры ўвагі – маркетынгавыя хады, якія выкарыстоўваюць тытунёвыя кампаніі, каб уцягнуць моладзь у тытунекурэнне. «Ужо шмат дзесяцігоддзяў тытунёвыя кампаніі ўжываюць вытанчаныя і цынічныя метады ўключэння моладзі ва ўжыванне тытунёвай і нікацінавай прадукцыі і выдаткоўваюць на гэта значныя рэсурсы. З унутранай дакументацыі такіх кампаній можна даведацца пра тое, што яны вярбуюць новае пакаленне аматараў тытуню пры дапамозе цэлага шэрагу ўсебакова вывучаных і старанна вывераных прыёмаў, ад дызайну прадукцыі да маркетынгавых кампаній, закліканых забяспечыць прыток новых, маладых спажыўцоў на змену мільёнам людзей, якія штогод паміраюць ад звязаных з тытунём хваробаў», – гаворыцца на сайце СААЗ.
Якія ж хітрыкі выкарыстоўваюць тытунёвыя кампаніі, каб павялічыць колькасць спажыўцоў тытуню, у прыватнасці, за кошт маладога пакалення? Вольга Бартман распавяла пра самыя папулярныя.
Па словах Вольгі Бартман, у нашай краіне па дадзеных СТЕПС-даследавання, якое прайшло ў 2016-2017 гадах, паляць 29,6% насельніцтва. Пры гэтым доля мужчын складае 48,2%, жанчын – 12,8%. Большасць тых, хто паліць, адзначана ва ўзросце 30-44 гады (32,3%). А вось былых курцоў больш за ўсё зафіксавана сярод насельніцтва ва ўзросце 60-69 гадоў.
Як правіла, маладыя людзі пачынаюць паліць у 16-17 гадоў, дзяўчыны – на год пазней. Сярод тых, хто паліць, больш распаўсюджаныя фабрычныя цыгарэты, доля тых, хто выкарыстоўвае іншыя віды тытунёвых вырабаў, складае каля 1%.
Кожны пяты рэспандэнт, паводле даследавання, падвяргаецца пасіўнаму курэнню дома альбо на працы.
Першы глабальны дакумент (Дэкрэт Прэзідэнта РБ «Аб дзяржаўным рэгуляванні вытворчасці, абароту і спажывання тытунёвай сыравіны і тытунёвых вырабаў») быў прыняты ў нашай краіне ў 2002 годзе, яшчэ да таго, як Беларусь далучылася і ратыфікавала Рамачную канвенцыю СААЗ па барацьбе супраць тытуню.
На працягу гэтых гадоў у Дэкрэт Прэзідэнта неаднаразова ўносіліся змены і дапаўненні, якія былі накіраваныя на ўзмацненне жорсткасці мераў супраць тытунекурэння. У прыватнасці, забароненая адкрытая выкладка тытунёвых вырабаў у гандлёвых арганізацыях, а год таму ў дакуменце былі прапісаныя меры, якія тычацца рэгулявання спажывання таксама электронных сістэмаў для курэння і іншых сістэмаў для спажывання тытуню.
Пашыраны таксама шэраг грамадскіх месцаў, дзе курэнне забароненае (пад'езды, ліфты, закрытыя працоўныя памяшканні, аздараўленчыя спартыўныя лагеры, прыпынкі транспарту, метрапалітэн і г.д.). Нельга паліць і ў салоне аўтамабіля ў прысутнасці дзяцей, маладзейшых за 14 гадоў.
Наша краіна таксама выконвае шэраг міжнародных абавязацельстваў, у прыватнасці – патрабаванні да ўпакоўкі тытунёвых вырабаў. Яна павінна быць аформленая папераджальным надпісам у выглядзе карцінкі, утрымліваць інфармацыю, да чаго можа прывесці курэнне. На ўпакоўцы тытунёвых вырабаў таксама паказваецца, што яны ўтрымліваюць мутагенныя і канцэрагенныя рэчывы.
Электронныя сістэмы для курэння, распавяла эксперт, незалежна ад таго, утрымлівае вадкасць для запраўкі картрыджа нікацін ці не, аднолькава шкодныя. Розныя араматызатары могуць валодаць алергенным і нават канцэрагенным дзеяннем. Акрамя гэтага, часцей за ўсё электронныя цыгарэты выкарыстоўвае моладзь, да чаго таксама прыкладаюць намаганні тытунёвыя кампаніі, робячы акцэнт на тым, што гэта модна і прэстыжна, сказала Вольга Бартман.
Такія лічбы прывяла ў прыклад спецыяліст, распавядаючы пра шкоду курэння. Спажыванне тытуню прыводзіць да развіцця многіх сардэчна-сасудзістых і анкалагічных захворванняў. Робіцца прычынай абвастрэння хранічных паталогій, прычым часцяком менавіта з-за курэння яны і развіваюцца.
Курэнне негатыўна адбіваецца на жаночым здароўі. Цяжарныя, якія не ў сілах развітацца з гэтай звычкай, наносяць вялікую шкоду свайму будучаму дзіцяці: высокая верагоднасць нараджэння дзіцяці неданошаным, з нізкай масай цела, з затрымкай развіцця.
У людзей, якія палілі непрацяглы час, а затым кінулі, адзначыла Вольга Бартман, на працягу прыкладна 1-1,5 года аднаўляюцца функцыі дыхання і значна зніжаюцца рызыкі анкалагічных захворванняў.
Упэўненая Вольга Бартман. Дарэчы, у параўнанні з 2001 годам і перыядам, калі праводзілася СТЕПС-даследаванне, колькасць курцоў знізілася на 12%.
Калі кінуць паліць:
Падпісвайцеся на наш канал у Telegram, групы ў Facebook, «УКантакце», у «Аднакласніках» – і будзьце ў курсе свежых навінаў! Толькі цікавыя відэа на нашым канале YouTube, далучайцеся!
Магчыма, калісьці гэта было модным і крутым… Прыгожа зацягвацца цыгарэтай, прыгожа выпускаць дым… І нічога незвычайнага мы не бачылі ў тым, што ў нашых любімых кінафільмах галоўныя героі паляць не проста дома, побач з каханымі жанчынамі і ўласнымі дзецьмі, а нават у ложку… Уяўляеце сабе, колькі парушэнняў адразу ўбачылі б розныя службы ў наш час?!
Але часы змяняюцца, мода праходзіць… А шкодная звычка, на жаль, застаецца. Да таго ж, нават маленькія дзеці так і цягнуцца да цыгарэты: паспрабаваць. Бо тата ці мама, а то і абое, без цыгарэты, атрымліваецца, жыць не могуць… Як чалавек, далёкі ад практычна любой залежнасці… Вось шчыра: не разумею… Нават не так… НЕ РАЗУМЕЮ!!!!!!!
Не разумею, як можа дзяўчына, жанчына ў невялікім гарадку адкрыта паліць на вуліцы… Фырканне і пагардлівыя позіркі з майго боку забяспечаныя стопрацэнтна. Яшчэ і паўшчуваць магу… Праўда, у адказ таксама «прылятала»… Так што асабліва не выступаю…
А вось міма школьнікаў, якія ўсё ж па-ранейшаму хаваюцца за сценамі школы, міма моўчкі не прайду… Пачнуць агрызацца – яшчэ тон павышу. Навошта мне, спытаецеся. Так, перавыхавання не атрымаецца, на жаль. Ну… Проста не магу прайсці абыякава.
Адзінае, больш-менш прыемнае ў цяперашняй сітуацыі, – гэта тое, што рэдка куды-небудзь выходжу. Толькі калі дужа трэба. Таму ўсё меней шанцаў зрабіцца пасіўным курцом. Але ж усё роўна ў будучым зноў чакаюць натоўпы ў Мінску ля метро… І аматарам шкоднай звычкі ўсё роўна, што на прыпынках курыць забаронена… І ў чаканні маршруткі ў Чэрвені курцы ўсё роўна будуць абдымліваць іншых…
Год таму я пісала, што чакаю, калі ўступіць у сілу антытытунёвы Дэкрэт №2. І мне па-ранейшаму цікава, каго ў нас пакаралі ўжо за курэнне ў забароненым месцы. Ну хоць бы якую статыстыку надрукавалі… Хоць бы як падзейнічала тая забарона…
Цікава, ці будуць сёлета падчас пандэміі каранавіруса ладзіць разнастайныя акцыі супраць курэння?! Напрыклад, абмяняць цыгарэту на цукерку… З аднаго боку – гульня дзіцячая. Наўрад ці хто пасля гэтага кіне паліць. А з іншага – на адну цыгарэту меней…
І яшчэ я часта думаю: пры якіх умовах можа знікнуць гэтая залежнасць (чытай – шкодная звычка, распуста і г.д.)?! Калі людзі свядома і масава будуць адмаўляцца ад цыгарэт? Выбіраць чыстыя лёгкія і сасуды? Не спрабаваць паліць і нават думкі такой не дапускаць? Як вы мяркуеце? Можа калі-небудзь надысці такі час?!
Як часта мне даводзілася чуць ад тых, з кім сустракалася як журналіст, асабліва ад начальнікаў: «Ну можна я ўжо закуру? Вушы пухнуць…» Але нічога… Не спухлі за гадзіну-другую… Значыць, можна перацярпець?! Можна…
А колькі даводзілася чуць пра тое, як кідалі курыць… А пасля… «Ай, раззлавалі мяне…» І зноўку – цап за цыгарэту!
Таму, вядома ж, радуюць іншыя гісторыі. І такіх людзей вакол таксама нямала. Якія калісьці кінулі паліць – і ўсё. Дзесяць гадоў прамінула… Дваццаць… І нідзе. Ніколі. Ні разу. Як бы ні злавалі… Вось такім сапраўды – рэспект і ўважуха!
А камусьці ж… Кажы – не кажы… Прасі – не прасі… Марна. Таму і кінула ўжо гэтую справу. Але не-не ды думка ўзнікне: а раптам да чалавека дойдзе? Альбо штосьці перамкне ў галаве – і паліць больш не захочацца? Здараецца ж усялякае…
Эх, хачу тэрыторыю, вольную ад курэння… Толькі… у межах усёй Беларусі!
«Маё дзіця адсадзілі на заднюю парту і не звяртаюць на яго ўвагі на занятках», «Сына выганяюць за дзверы падчас урокаў ні за што». «Кожную раніцу ў дзіцяці істэрыка перад школай, ён не хоча туды ісці», «У маёй дачкі зусім няма сяброў, яна замкнулася ў сабе, сэрца баліць глядзець на гэта»... Такімі гісторыямі беларускіх бацькоў мільгаюць каментары пад допісамі пра дыслексію. Для таго, каб школьнае жыццё маленькага чалавечка не пераўтварылася ў пекла, бацькам неабходна рыхтавацца да школьных будняў загадзя, старанна падбіраючы настаўніка (на вакацыях – самы час). Як гэта зрабіць, распавяла Ганна Давідовіч, клінічны псіхолаг, спецыяліст у галіне нейрапсіхалогіі, кандыдат псіхалагічных навук. Анлайн-лекцыю арганізавала ініцыятыва Dyslexia Belarus.
Дыслексія – распаўсюджаная праблема навучання, у свеце ад яе пакутуе ў той ці іншай форме кожны 10-ы чалавек. Выяўляецца яна спецыфічным расстройствам чытання, пры якім церпіць і ўспрыманне інфармацыі. 90% дзяцей пры ранняй дыягностыцы і своечасовай карэкцыі могуць працягваць навучанне ў звычайным асяроддзі.
Дыслексія і падобныя дыягназы не звязаныя з узроўнем інтэлекту, гэта асаблівасць нейрафізіялагічнага развіцця. Дзеці-дыслексікі апісваюць, што літары перад імі літаральна «скачуць» на радках, куляюцца, раскладваюцца ў розныя камбінацыі. Зразумець напісанае надзвычай складана. Менавіта таму дыслексік не можа хутка чытаць і зразумець прачытанае. Гэта выклікае кпіны ў аднакласнікаў, прыводзіць да сацыяльнай ізаляцыі дзіцяці...
Акрамя таго, дыслексікі часта дрэнна арыентуюцца ў прасторы, у іх парушаная каардынацыя рухаў (няўклюдныя), маюць праблемы з падтрыманнем увагі. «Лунае ў аблоках» на ўроку – гэта пра іх.
Нягледзячы на такія відавочныя цяжкасці, дыслексікаў часта адрознівае нестандартны падыход да вырашэння сітуацый. А сярод людзей, якія пакутавалі ад такой праблемы, шмат па-сапраўднаму таленавітых. Уолт Дысней, Агата Крысці, Том Круз, Квенцін Таранціна, Ганс Хрысціян Андэрсан, Біл Гейтс. Усе гэтыя людзі дасягнулі поспеху насуперак складанасцям з навучаннем!
Шмат у чым лёс такіх дзяцей залежыць ад стаўлення і паводзінаў бацькоў. Што ж раіць мамам і татам такіх дзяцей псіхолаг?
Дыслексія робіцца частай праблемай ва ўсім свеце. Распаўсюджванне інфармацыі пра асаблівасці навучання і ўзаемадзеяння з такімі дзецьмі – важны крок дапамогі і бацькам, і педагогам. А галоўнае – самім дзецям, якія атрымліваюць шанц на шчаслівае дзяцінства без ярлыкоў.
Падпісвайцеся на наш канал у Telegram, групы ў Facebook, «УКантакце», у «Аднакласніках» – і будзьце ў курсе свежых навінаў! Толькі цікавыя відэа на нашым канале YouTube, далучайцеся!
Пераддыябет – гэта стан арганізма, пры якім нашы тканкі губляюць адчувальнасць да павышанай колькасці інсуліну ў крыві. З-за гэтага пажыўныя рэчывы не могуць трапіць у клеткі, што прыводзіць да іх галадання.
Зніжэнне адчувальнасці тканак да інсуліну называюць інсулінарэзістэнтнасцю. Калі своечасова заўважыць гэты стан, можна пазбегнуць цукровага дыябету. Што ж гэта за прыкметы?
Гэтай тэме прысвяціў ролік папулярны медыцынскі блогер, урач агульнай практыкі Андрэй Ягораў.
Відэа набрала ўжо 281 тысячу праглядаў і больш за 2 тысячы каментароў, мяркуючы па якіх, людзі мала ведаюць пра інсулінарэзістэнтнасць і магчымасці ўплываць на гэты працэс. Сам урач адзначае, што нашы пратаколы больш заточаныя на выяўленне дыябету, а не пераддыябетнага стану. Таму гэтая інфармацыя такая важная.
Доктар Ягораў выдзяляе 16 прыкметаў пераддыябету. Насцярожыцца варта ў тым выпадку, калі выявіцца тры і больш прыкметаў інсулінарэзістэнтнасці, адзначае ўрач.
1. Лішняя вага. Самая відавочная прыкмета. Калі ў целе больш за 20% тлушчу (для мужчын) і больш за 30% (для жанчын), хутчэй за ўсё, ужо маецца пэўная ступень інсулінарэзістэнтнасці.
2. Аднак худым і стройным таксама не варта расслабляцца. Бо існуе індывідуальная адчувальнасць да інсуліну. Дыябетыкі могуць быць худымі, а людзі з вагой у 150 кг не мець цукровага дыябету, бо ў іх вельмі высокая адчувальнасць да інсуліну па жыцці. Таму гэты індывідуальны фактар трэба ўлічваць, сачыць за сабой і не спадзявацца толькі на кантроль вагі, упэўнены ўрач.
3. Дрымотнасць пасля прыёму ежы, асабліва пасля абеду. Калі пасля ежы адчуваецца не прыліў сіл, а стомленасць, гэта сведчыць пра тое, што падчас прыёму ежы адбыўся вялікі рост інсуліну і глюкозы.
4. Прышчы (на твары, ягадзіцах, спіне) у дарослых. Падлеткавыя прышчы таксама часткова звязаныя з інсулінарэзістэнтнасцю, таму тынэйджары і налягаюць на салодкае. Але ў гэтым узросце прышчы можна абгрунтаваць і ўсплескам палавых гармонаў, а вось устойлівыя высыпанні ў дарослых людзей адназначна кажуць пра павышаны інсулін.
5. Тлустыя скура твару і валасы. Сальнасць, бляск скуры ў дарослага палаваспелага чалавека таксама паказваюць на павышаны інсулін і перабор вугляводаў у рацыёне.
6. Перхаць на галаве альбо бровах. Калі себарэйны дэрматыт не лечыцца спецыяльнымі шампунямі і прэпаратамі, гэта таксама нагода задумацца пра цукар у крыві. Варта абмежаваць салодкае і вугляводы ў рацыёне, і перхаць сыдзе на працягу месяца, упэўнены Андрэй Ягораў.
7. Розныя дэрматыты і іх рэцыдывы.
8. Алергіі і іх рэцыдывы. Алергія на асобны алерген можа быць самастойным захворваннем. Але калі з часам дадаюцца новыя алергены, не дапамагае лячэнне гарманальнымі прэпаратамі, варта больш пільна прааналізаваць сваё харчаванне і змяніць яго. Зараз алергій, бранхіяльных астмаў, псарыязаў, экзэмаў стала больш, чым 20 гадоў таму, што звязанае з павелічэннем цукру, вугляводаў у харчаванні, лічыць доктар.
9. Выпнуты жывот (быццам барабан на фоне агульнай худзізны і стройнасці). Такі жывот – прыкмета вісцаральнага атлусцення, пры якім асноўныя назапашванні тлушчу адкладаюцца вакол унутраных органаў. Гэта цягне за сабой парушэнні абмену вугляводаў, тлушчаў, гарманальнага фону і як вынік – цукровы дыябет 2-га тыпу.
10. Павышаны артэрыяльны ціск.
11. Папіламатоз і рост ангіёмаў. Калі на целе назіраецца рост утварэнняў, як правіла, колеру скуры (папіломаў), і чырвоных кропак (ангіёмаў), гэта прыкмета інсулінарэзістэнтнасці.
12. Сіндром полікістозных яечнікаў у жанчын.
13. Пастаяннае пачуццё голаду альбо яго хуткае надыходжанне пасля ежы. Гэта сведчыць пра тое, што арганізм не можа пераключыцца на выкарыстанне тлушчаў для атрымання энергіі, тлумачыць урач.
14. Цяга да салодкага. У чалавека з гнуткім метабалізмам няма цягі да ласункаў, бо арганізм лёгка пераключаецца з тлушчаў на глюкозу і назад. А вось тыя, чый арганізм ужо прывык працаваць выключна на глюкозе, якраз не могуць без салодкага. Таму пастаянныя думкі накшталт «У мяне разумовая праца і таму неабходна з'есці шакаладку з кавай» – гэта праблемны сігнал, падкрэслівае ўрач.
15. Мышачная слабасць, дрэнны рост мышцаў. Тут важна не перашчыраваць з трэніроўкамі па наборы мышачнай масы, бо ў пэўны момант колькасць тлушчу пачынае апярэджваць рост мышцаў. Чым больш тлушчу, тым горш працуюць і сілкуюцца нашыя мышцы. Фізічныя нагрузкі вельмі важныя, але яны павінны суправаджацца правільным харчаваннем. Не трэба займацца «тлушчабілдынгам», спажываючы шмат вугляводаў, папярэджвае ўрач. Важна ведаць, што з узростам адчувальнасць да інсуліну падае. Таму чым чалавек старэйшы, тым лепей трымаць «сухую» форму цела, сачыць за вагой.
16. Дрэнная праца імунітэту. Гэта можа выяўляцца ў частых прастудах і ВРВІ, рэцыдывах герпесу і грыбка на нагах.
Чым далей органы і тканкі ад умоўнага цэнтра арганізма (сэрца), тым горш іх кровазабеспячэнне. Пры павышаным інсуліне такія тканкі пакутуюць у першую чаргу. Таму, да прыкладу, пры запушчаным дыябеце развіваецца дыябетычная ступня – гнойна-некратычны працэс, які ў запушчаных выпадках прыводзіць да ампутацыі канечнасці, тлумачыць Андрэй Ягораў.
https://bel.24health.by/karysnyya-parady-dlya-znizhennya-uzrounyu-cukru-u-kryvi/
Асаблівае значэнне ў перыяд пандэміі COVID-19 мае лячэнне хранічных захворванняў, у прыватнасці – цукровага дыябету. Як атрымаць дапамогу, калі наведванне медустановы лепей адкласці? Распавяла галоўны ўрач Гарадскога эндакрыналагічнага дыспансера г.Мінска, галоўны пазаштатны эндакрынолаг камітэта па ахове здароўя Мінгарвыканкама Алена Юрэня.
У цяперашняй сітуацыі дыспансер рэкамендуе пацыентам, асабліва сталым, цяжарным, перанесці наведванне альбо пракансультавацца па тэлефоне.
Загадчыкі эндакрыналагічных аддзяленняў дыспансера штодня праводзяць прамыя тэлефонныя лініі – па дзве гадзіны ў першую і другую змены. Пацыенты могуць даведацца пра вынікі аналізаў, задаць пытанні пра лячэнне, у прыватнасці – пра карэкцыю інсулінатэрапіі, прыём гарманальных прэпаратаў.
Няцотныя дні – 8:30-10:30, цотныя дні – 17:00-19:00 – загадчыца эндакрыналагічнага аддзялення №1 Святлана Чаранкевіч – 354-74-07.
Няцотныя дні – 17:00-19:00, цотныя дні – 8:30-10:30 – загадчыца эндакрыналагічнага аддзялення №2 Жанна Кірыленка – 355-74-06.
Графік можна ўдакладніць на галоўнай старонцы сайта ўстановы.
Таксама на сайце дыспансера ў раздзеле «Звароты» для пацыентаў арганізаваная рубрыка «Пытанне-адказ».
Лекавае забеспячэнне (за поўны кошт) пацыентаў з хранічнымі захворваннямі вырашаецца з дапамогай электроннага рэцэпту. Урач выпісвае прэпараты, узгадніўшы дадзенае пытанне па тэлефоне. Электронны рэцэпт перадаецца ў аптэчную сетку без дублявання папяровага варыянту.
А калі ў пацыента няма электроннай карты? У такім выпадку яна афармляецца ў паліклініцы і дастаўляецца на дом сярэднім медработнікам альбо валанцёрам Чырвонага Крыжа ці БРСМ.
– Шырокае ўкараненне электроннага рэцэпту стрымлівала неабходнасць завяраць яго электронным лічбавым подпісам (ЭЛП) урача, – адзначае Алена Юрэня. – На час неспрыяльнай эпідабстаноўкі Міністэрства аховы здароўя дазволіла выпісваць рэцэпты на прэпараты за поўны кошт без ЭЛП (на тэрмін да 6 месяцаў).
Ільготныя рэцэпты на прэпараты, якія зніжаюць цукар, у таблетках, і інсуліны людзям, старэйшым за 60 гадоў, выпісваюць дома.
– Нашыя дыспансерныя пацыенты на сайце ўстановы праз рубрыку «Пытанне-адказ» могуць аформіць заяўку на выпіску як ільготных рэцэптаў, так і за поўны кошт. Рэцэпт можа забраць давераная асоба, прад'явіўшы дакумент, які сведчыць асобу заяўніка, – удакладняе Алена Васільеўна.
На сайце ў раздзеле «Адмена запісу на прыём» можна адмяніць кансультацыю, УГД-даследаванне, лабараторныя аналізы. Атрымаўшы такую заяўку, медрэгістратар стэлефаноўваецца з пацыентам і пераносіць наведванне на іншы час.
– У рэспубліканскія цэнтры зараз накіроўваем толькі людзей са злаякаснымі новаўтварэннямі для планавых аперацый. Экстранных пацыентаў з цукровым дыябетам шпіталізуюць у «чыстае» эндакрыналагічнае аддзяленне на базе 1-й ГКБ г.Мінска, – тлумачыць Алена Юрэня.
У дыспансеры прыпынілі працу амбулаторных школ цукровага дыябету, але лекцыі размяшчаюць на сваім сайце http://www.endominsk.by/part/shkola-diabeta.
Фота эксперта – Віталь Гіль.
Падпісвайцеся на наш канал у Telegram, групы ў Facebook, «УКантакце», у «Аднакласніках» – і будзьце ў курсе свежых навінаў! Толькі цікавыя відэа на нашым канале YouTube, далучайцеся!
Ці сапраўды шкодныя стрынгі і штодзённыя пракладкі? Чаму ў сем'ях саромеюцца размаўляць пра інтымную гігіену? Калі ў дзяўчынкі павінны пачаць расці грудзі і чаму гэта так часта палохае бацькоў? З якой перыядычнасцю трэба наведваць дзіцячага гінеколага? Як зразумець, што месячныя нерэгулярныя, калі цыкл яшчэ не ўсталяваўся?
Падрабязна пра тое, што важна для кожнай дзяўчынкі і яе бацькоў, распавяла на Марафоне жаночага здароўя Лілія Сухаверка, галоўны пазаштатны дзіцячы гінеколаг камітэта па ахове здароўя Мінгарвыканкама. Мерапрыемства прайшло ў рэжыме «анлайн».
Перыяд выспявання пачынаецца ў 8-9 гадоў. Гэта нармальны ўзрост. Больш ранні пачатак лічыцца заўчасным і патрабуе карэкцыі.
Стадыя 1. Рост малочных залозаў.
Стадыя 2. З'яўленне палавога аваласення.
Стадыя 3. З'яўленне менструацый (першая менструацыя – менархе).
Калі казаць пра дзяўчынак-дашкольніц, дык пазапланавы візіт да ўрача неабходны, калі:
Многія дзяўчыны выдатна ведаюць пра тое, што трэба старанна мыць рукі пасля вуліцы ці прыбіральні, а вось правілам інтымнай гігіены не навучаныя. У сем'ях часта саромеюцца казаць пра гэта ці лічаць гэтае пытанне нязначным. Тым не менш, для захавання здароўя дзяўчынкі выкананне правілаў інтымнай гігіены вельмі важнае. Якія ж яны?
Падчас менструацыі дзяўчына-падлетак можа выкарыстоўваць пракладкі, тампоны або менструальную чашу.
Прырода так уладкавала, што для таго, каб у будучым стаць мамай, клапаціцца пра сваё здароўе дзяўчынка павінна з самага ранняга ўзросту. Навыкі інтымнай гігіены і ўважлівага стаўлення да свайго цела закладваюцца ў сям'і. А пры ўдзеле дзіцячага гінеколага можна захаваць і падтрымаць здароўе дзяўчынкі і пазбегнуць мноства праблемаў у будучым.
Падпісвайцеся на наш канал у Telegram, групы ў Facebook, «УКантакце», у «Аднакласніках» – і будзьце ў курсе свежых навінаў! Толькі цікавыя відэа на нашым канале YouTube, далучайцеся!
Між іншым, першапачаткова, кажуць, варажылі зусім не на рамонках, а на… маргарытках! Дакладна вядома пра Германію і Францыю. Хм… Маргарыткі і зараз у нас на дачнай сядзібе цвітуць напоўніцу. Прычым там, дзе самі хочуць… Рассеяліся па ўчастку… І далібог на іх глядзець прыемней, чым на тыя ж дзьмухаўцы… Я маю на ўвазе – менавіта на ўчастку.
Вось маргарыткі мне не хочацца «выкарчоўваць», нават калі яны і замінаюць… Гэта ж такія мілыя кветачкі… І пялёсткаў у іх пабольш, чым у рамонкаў. Толькі ж і больш дробныя яны. Мусіць, не так зручна варажыць. Не спрабавалі?! А праверце!
Раней мы іх нават спецыяльна сеялі і вырошчвалі на дачы пад акном нашага дома. Цяпер у гэтым няма патрэбы: як ужо зазначыла, самі рассейваюцца. А вы любіце маргарыткі?! А рамонкі?!
Калісьці мы яшчэ і рамонкі вырошчвалі. Розныя. Напачатку – для прыгажосці. Тыя, што вялікія, дэкаратыўныя. Але яны дужа разрасталіся. Таму былі перасаджаныя ў аддаленае месца. А потым і зусім звяліся. Але зараз я не супраць пасадзіць іх зноў! Ужо засумавала…
Некалькі гадоў вырошчвалі і рамонак аптэчны. Затым збіралі, сушылі на печцы і выкарыстоўвалі ў лекавых мэтах, пра якія абавязкова напішу крыху пазней.
Калі я ў сезон бачу жытняе поле з валошкамі і рамонкамі, дык мяне найперш прыцягваюць валошкі. Яны проста скараюць сэрца! І калі збіраць у букет, дык толькі іх. А вось сэрца маёй меншай пляменніцы Юлі аддадзенае рамонкам!
Памятаю, як аднойчы са сваім братам і ёй, яго меншай дачкой, я паехала на радзіму таты, да цёткі, яго сястры, у госці. Па дарозе туды, у вёску Мрочкі Уздзенскага раёна, пляменніца нагледзела сабе рамонкаў, якія вырашыла сабраць на зваротным шляху. А на шляху зваротным…
Нас накрыла хмара, і такі дождж паліў… І што вы думаеце?! Юля ўсё роўна папрасіла тату спыніцца ля поля і пад дажджом пабегла рваць сабе рамонкі! Вярнулася абсалютна мокрая, але шчаслівая. Во гэта любоў да сціплых кветачак! 🙂
Але вернемся да варажбы. Ведаеце, нават карысныя парады ёсць для яе! Праўда, цікава?! І вось некалькі з іх.
Іншыя ж раяць паваражыць на гарбаце з рамонку, як на гушчы з кавы. А вось гэта ўжо да нас бліжэй! Бо гарбата гэтая сапраўды лекавая і вельмі цэніцца ў народнай медыцыне!
Мая любімая мамачка практычна ўвесь час піла яе па сваіх паказаннях… Найчасцей – пакупную. І калі яе ўнучкі, а мае пляменніцы, адпачывалі на поўдні, дык прывезлі адтуль у падарунак рассыпны рамонак для заварвання. Многа… Мамачка вельмі яго любіла… І калі ў мяне раптам (хаця і вельмі рэдка) прыхопліваў страўнік, яна гатавала для мяне рамонак лекавы…
У нас не так шмат месцаў, дзе расце ён, натуральны… Прывучаная бацькамі з дзяцінства, я таксама няблага навучылася разбірацца ў лекавых раслінах. І вось менавіта патрэбны гатунак рамонку таксама ўмею адрозніваць ад іншых… Але вырошчваць на ўласным участку, вядома ж, прасцей… Трэба будзе зноўку заняцца… Калі змагу…
А прымяняюць рамонак унутр у выглядзе настою, адвару ці гарбаты пры спазмах страўніка, хваробах печані, гастрыце, каліце, энтэрыце, хваравітых месячных, узбуджальнасці, бяссонніцы і (увага!) рэспіраторных інфекцыях. Зразумела, пералік далёка не поўны…
Таму сёння, выехаўшы-выбегшы на поле, паваражыўшы на рамонках, беражліва збіраем патрэбныя, лекавыя. Альбо набываем у аптэцы засушаныя. Ці ў крамах гатовую гарбату з дадаткамі. І няхай гэты дзень стане не толькі Днём варажбы на рамонках, але і Днём любові да рамонкаў лекавых!
Падпісвайцеся на наш канал у Telegram, групы ў Facebook, «УКантакце», у «Аднакласніках» – і будзьце ў курсе свежых навінаў! Толькі цікавыя відэа на нашым канале YouTube, далучайцеся!
Якія асаблівасці інтымнай гігіены, калі ёсць швы ў вобласці пахвіны? Калі скончацца пасляродавыя выдзяленні? Калі прыйдзе малако? Праз які тэрмін можна пачынаць займацца аднаўленнем фігуры? Ці трэба засцерагацца мамам, якія кормяць? Калі можна вяртацца да інтымнага жыцця? Як прадухіліць развіццё пасляродавай дэпрэсіі? Па прызнанні акушэраў-гінеколагаў, гэтыя пытанні хвалююць абсалютна ўсіх жанчын, якія толькі сталі мамамі ці рыхтуюцца да гэтай падзеі ў найбліжэйшым будучым.
Пра асаблівасці пасляродавага перыяду распавяла падчас анлайн-марафону жаночага здароўя Святлана Стасевіч, загадчыца акушэрска-абсервацыйнага аддзялення 1-й ГКБ г.Мінска, акушэр-гінеколаг вышэйшай кваліфікацыйнай катэгорыі. Мерапрыемства было арганізаванае па ініцыятыве камітэта па ахове здароўя Мінгарвыканкама.
Пасляродавы перыяд пачынаецца адразу пасля заканчэння родаў і доўжыцца 6-8 тыдняў. У ім адрозніваюць ранні пасляродавы перыяд (першыя 24 гадзіны) і позні. Пасляродавыя выдзяленні называюцца лохіі. Іх з'яўленне абсалютна нармальнае.
На працягу 6-8 тыдняў пасля родаў памеры маткі памяншаюцца, яе маса зніжаецца з 1000 г да 60-70 г. Паступова вяртаюцца да працы ў ранейшым рэжыме ўсе органы, якія неслі падчас цяжарнасці двайную нагрузку (ныркі, печань, сэрца, лёгкія і інш.).
Усё больш жанчын арыентаваныя на тое, каб арганізаваць для свайго малога грудное выкормліванне. Спрыяе гэтаму і палітыка сумеснага знаходжання маці і дзіцяці ў радзільным доме.
Інстаграм-мамы дражняць публіку, з'яўляючыся з ідэальнымі фігурамі ўжо праз 7-10 дзён пасля родаў. У рэальным жа жыцці без фоташопу і фільтраў з пачаткам заняткаў фізкультурай часцяком трэба пачакаць.
Разрывы і разрэзы падчас натуральных родаў – частая з'ява. Такія швы патрабуюць стараннага выканання правілаў інтымнай гігіены.
Аднаўленне пасля кесарава сячэння пачынаецца з догляду швоў. У першыя дні пасля аперацыі апрацоўку праводзіць медыцынскі персанал. На 5-я суткі пасля аперацыі швы здымаюць.
Рэкамендуецца ўстрымацца ад палавой блізкасці на працягу 6-8 тыдняў пасля родаў. Чаму?
Лактацыйная аменарэя доўжыцца прыкладна 6 месяцаў пасля родаў. Некаторыя жанчыны ўскладаюць надзею на перыяд груднога выкормлівання, лічачы, што рызыкі зацяжарыць у гэты перыяд няма. Ці так гэта?
Тэрмін «пасляродавая дэпрэсія» знаёмы ў наш час усім. Прычынаў для таго мноства: сучаснае жыццё поўнае стрэсаў. У выпадках, калі стан цяжкі, не абысціся без дапамогі спецыяліста. Але ў многіх выпадках досыць уважлівага і беражлівага стаўлення сям'і.
Пасляродавы перыяд – асаблівы час знаёмства з самым маленечкім сямейнікам, прыняццем новых роляў і клопатаў. Звычка, якая сфармавалася за час цяжарнасці, – чуйна рэагаваць на стан свайго цела – і некалькі важных правілаў дазволяць жанчыне прайсці гэты этап максімальна спакойна і без узрушэнняў. Гледзячы на немаўля, якое спіць, можна з упэўненасцю сказаць: гэта таго вартае!
Падпісвайцеся на наш канал у Telegram, групы ў Facebook, «УКантакце», у «Аднакласніках» – і будзьце ў курсе свежых навінаў! Толькі цікавыя відэа на нашым канале YouTube, далучайцеся!
Святы бываюць розныя. Не абавязкова вясёлыя. Некаторыя толькі намінальна можна назваць святамі. А ўвогуле, гэта – адметныя дні, якія павінны прыцягнуць увагу да пэўнай хваробы альбо праблемы. Напрыклад, сёння, 27 мая, у апошнюю сераду гэтага месяца – Міжнародны (Сусветны) дзень рассеянага склерозу.
Вы ж памятаеце?! Рассеяны склероз – гэта аўтаімуннае захворванне, якое ніяк не адпавядае ўяўленням пра склероз старэчы і не мае з ім нічога агульнага. Яно пашкоджвае нервовую сістэму, закранаючы галаўны і спінны мозг.
На рассеяны склероз часцей за ўсё хварэюць маладыя. І прадбачыць, чаму і калі гэта можа здарыцца, проста немагчыма… Само ж слова «рассеяны» паказвае не на праблемы з увагай і кацэнтрацыяй (хаця штосьці і ў гэтым ёсць), а на тое, што ачагі захворвання рассеяныя па спінным і галаўным мозгу.
Часцей за ўсё гэтае захворванне прыводзіць да іваліднасці, калі людзі вымушаныя перасоўвацца ў інвалідных калясках. Праўдзівую гісторыю аднаго нашага чытача, Віталя Рабецкага, распавяла журналіст Слушна Святлана Стахоўская. З таго часу я і ведаю дакладна, як гэта можа быць…
І колькі ж мужнасці, сілы волі, цярплівасці патрэбна тым, хто захварэў, каб прыняць сябе, новага (новую) ў хваробе. Не зламацца, не апусціць рукі, а змагацца за жыццё і літаральна за сваё месца ў грамадстве. Як патрэбная ім падтрымка блізкіх, знаёмых і нават незнаёмых…
А яшчэ – удзел у вось такіх мерапрыемствах, на адным з якіх пабыла ў свой час і наш журналіст Вольга Стружынская.
Падтрымка патрэбная ўсім. Асабліва тым, хто трапіў у цяжкую жыццёвую сітуацыю. Захварэў. Невылечна. А рассеяны склероз, на жаль, вылечыць немагчыма. Толькі падтрымліваць арганізм прэпаратамі… І чакаць, калі пагаршэнне зменіцца на паляпшэнне.
Калі варта насцярожыцца і звярнуцца да ўрача? На жаль, такіх праяў, якія б на сто працэнтаў і з першага разу дазволілі б дыягнаставаць менавіта гэтае захворванне, няма, кажуць спецыялісты. Хаця саму хваробу вывучалі яшчэ ў сярэдзіне 19 стагоддзя. З тыповых адзначаюць парушэнні зроку, каардынацыі рухаў, слабасць у мышцах, зблытанасць маўлення, галавакружэнне альбо галаўны боль…
Ды, зрэшты, любое парушэнне, якое пагаршае якасць жыцця, ужо з’яўляецца падставай звярнуцца да спецыялістаў, ці не так?! Іншая справа, што пандэмія каранавіруса ўнесла свае карэктывы і зменшыла наведванні ўрачоў, так бы мовіць, па паказаннях. Але калі блага… Лепей усё ж такі не адкладваць візіт у паліклініку. Па магчымасці…
Больш грунтоўна пачытаць пра рассеяны склероз можна на нашым інфармацыйным партале. Гэта, безумоўна, будзе карысным як для людзей з такім захворваннем, так і для іх сямейнікаў, знаёмых... А ў Беларусі, па прыкладных падліках, жывуць больш за 4 тысячы захварэлых.
Вядома ж, можна спачуваць і суперажываць ім на адлегласці. А можна рэальна дапамагчы, падтрымаць. Хаця б сяброўскімі стасункамі… Бо не так-то проста многім з іх выбрацца з дому, каб хаця б падыхаць свежым паветрам. Перашкодай робяцца высокія паверхі, адсутнасць безбар’ернага асяроддзя, элементарных памочнікаў, якія б дапамаглі спусціцца ў калясцы…
І добра, калі ў людзей з рассеяным склерозам ёсць магчымасць стасункаў у сеціве. Усё ж не так сумотна жыць… Ды і патрэбную інфармацыю можна адшукаць… Каб па магчымасці палепшыць якасць свайго жыцця.
Дык давайце не адварочвацца ад тых, хто побач з намі, каму сёння нашмат цяжэй. Нават проста падтрымаць іх добрым словам – гэта ўжо дапамога. Для гэтага ж не патрэбныя вялікія намаганні… Проста падзяліцца цеплынёй свайго сэрца…
Пандэмія пандэміяй, а кляшчы таксама не спяць і ўжо на ўсю моц кусаюць людзей. Ды і рызыка захварэць на іншыя хваробы нікуды не сышла. Прайдзіце тэст – і даведайцеся, як падрыхтавацца да сезону кляшчоў і будучых нападаў ВРВІ, кантраляваць свой ціск і цукар у крыві, а таксама пазбегнуць распаўсюджанага і небяспечнага раку кішэчніка. Інфекцыяністы, анкапрактолаг, эндакрынолаг і кардыёлаг далі слушныя парады.
1. Ці праўда, што прышчэпка супраць пнеўмакока абараняе ад пнеўманіі?
А. Не, яна абараняе толькі ад атыту.
Б. Так, пнеўмакок выклікае пнеўманію вельмі часта.
В. Ад пнеўманіі выратуе звычайная прышчэпка ад грыпу.
Адказ: Б.
Вакцына ад пнеўмакока абараняе ад атыту, пнеўманіі, у тым ліку цяжкай, гнойнага менінгіту, сэпсісу. Прышчэпка прыкладна ў два разы знізіць частату звычайных атытаў і пнеўманій, і ў 97% – цяжкіх пнеўманій. Прышчэпка ад грыпу таксама дапамагае пазбегнуць ускладненняў у выглядзе бактэрыяльнай пнеўманіі, але не заўсёды. Больш падрабязна пра вакцыну ад пнеўмакока, каму і калі яе варта рабіць – тут.
2. Ці праўда, што чым большыя ў чалавека лёгкія, тым меней ён хварэе на вострыя рэспіраторныя вірусныя інфекцыі (ВРВІ)?
А. Не, для віруса ўсё роўна, які аб'ём лёгкіх.
Б. Не, наадварот, чым больш лёгкія, тым больш вірусаў там асядзе.
В. Здаровыя вялікія лёгкія – залог добрага здароўя і трывалага арганізма, а значыць, сувязь ёсць.
Адказ: В.
Прамой залежнасці паміж устойлівасцю да вірусных інфекцый і вялікім аб'ёмам лёгкіх няма. Але ёсць ускосная: вялікія лёгкія маюць людзі з добрым станам ахоўных сіл арганізма, нармальным дрэнажом у лёгкіх – выпадковыя вірусы там не затрымліваюцца. Павялічыць свой жыццёвы аб'ём лёгкіх можа кожны. Як гэта зрабіць – тут.
3. Ці праўда, што калі пасля ўкусу кляшча праз пару гадзін прыняць душ, гэта знізіць рызыку перадачы хваробы Лайма ад насякомага да чалавека?
А. Не, вада ніяк не абароніць ад інфекцыі. Толькі антыбіётык.
Б. Вядома ж, бо зараза вымыецца са свежай ранкі і не паспее патрапіць у кроў.
В. Ад перадачы хваробы Лайма душ дапаможа, але не ад клешчавога энцэфаліту.
Адказ: А.
Звычайны душ не дазваляе пазбавіцца ад кляшчоў, якія ўжо прысмакталіся, і інфекцыі. Таму рэкамендуецца на працягу 72 гадзін пасля ўкусу прымаць антыбіётык. Пакуль гэта адзіная гарантыя не падхапіць хваробу Лайма. А вось ад клешчавога энцэфаліту антыбіётыкі не дапамогуць, бо гэта віруснае захворванне. Эфектыўная прафілактыка клешчавога энцэфаліту – вакцынацыя. Яе ў Беларусі робяць людзям з групаў рызыкі. Хто туды ўваходзіць і як абараніць сябе ад укусу кляшча – тут.
4. Ці праўда, што гемарой можа прывесці да раку тоўстай кішкі?
А. Не, гэта ніяк не звязана. Але лепей праверыцца.
Б. Вядома ж. Любое запаленчае захворванне можа ператварыцца ў рак.
В. Гемарой можа прывесці да язваў, але не да раку.
Адказ: А.
Гемарой не прыводзіць да раку тоўстай кішкі. Але часам пад яго сімптомамі – сверб, боль, смыленне ў заднім праходзе, кроў у стуле – можа хавацца пухліна прамой кішкі. У цэлым, каб не прапусціць рак кішэчніка, пажадана ў 45 гадоў прайсці каланаскапію і тэст на схаваную кроў у кале. Часам трэба прайсці гэтыя дзве працэдуры ў больш маладым узросце. Каму менавіта і чаму – падрабязней тут.
5. Ці праўда, што для прафілактыкі дыябету нельга есці бульбу?
А. Праўда, у ёй шмат крухмалу, а крухмал павышае ўзровень цукру ў крыві.
Б. Не. Бульбу можна есці, але не больш за 3 разы на тыдзень.
В. Няпраўда, бульба – гэта гародніна, а гародніну якраз рэкамендуюць для кантролю цукру.
Адказ: Б.
Гародніна ўтрымлівае клятчатку, якая рэгулюе страваванне, таму практычна ўсю гародніну можна ўжываць без абмежаванняў, акрамя бульбы, бо ў ёй шмат крухмалу. Бульбу ўрачы рэкамендуюць ужываць не больш за 2-3 разы на тыдзень. Памяншэнне цукру і крухмалу з ежай стабілізуе ўзровень інсуліну ў крыві. Спіс прадуктаў, якія варта дадаць/выключыць для прафілактыкі і лячэння цукровага дыябету, – тут.
6. Ці праўда, што калі паменшыць соль у харчаванні, можна нармалізаваць ціск?
А. Няпраўда, ціск ніяк не залежыць ад прадуктаў харчавання і спецый.
Б. Праўда, бо соль затрымлівае ваду ў арганізме, адсюль і павышэнне ціску.
В. Праўда, соль наогул не патрэбная, гэта белы яд.
Адказ: Б.
Залішняе спажыванне солі прыводзіць да таго, што ў арганізме затрымліваецца вадкасць, ад гэтага сэрца працуе больш інтэнсіўна, «напружваюцца» ныркі, што і прыводзіць да павышэння артэрыяльнага ціску. Дзённая норма спажывання солі – 1 ч.л. Пра DASH-дыету для нармалізацыі артэрыяльнага ціску і іншых спосабах кантролю – тут.
Падпісвайцеся на наш канал у Telegram, групы ў Facebook, «УКантакце», у «Аднакласніках» – і будзьце ў курсе свежых навінаў! Толькі цікавыя відэа на нашым канале YouTube, далучайцеся!
Галаўны боль, бяссонніца, пачашчанае сэрцабіцце, патлівасць, хуткая стамляльнасць, адставанне ў росце, недахоп ці лішак масы цела ў дзіцяці могуць сігналізаваць аб праблемах у працы шчытападобнай залозы.
У Беларусі такія хваробы займаюць першае месца па распаўсюджанасці і складаюць 70% ад усёй эндакрыннай паталогіі дзіцячага ўзросту. На пачатак 2020 года ў структуры хваробаў шчытападобнай залозы ў дзяцей пераважаў эндэмічны дыфузны валляк (просты нетаксічны валляк). Як распазнаць праблемы са шчытавідкай у дзіцяці і што рабіць для прафілактыкі?
Захворванні шчытападобнай залозы можна падзяліць на тыя, якія працякаюць з парушэннем яе структуры ў выглядзе дыфузных альбо ачаговых змяненняў (кісты, вузлы), і тыя, якія суправаджаюцца змяненнем структуры і функцыі залозы (зніжаная – гіпатэрыёз, павышаная – гіпертэрыёз, або тэрыятаксікоз).
У нашай краіне паспяхова рэалізаваная Нацыянальная праграма па ліквідацыі ёдадэфіцытных станаў. Асноўным харчовым прадуктам, які ўзбагачаецца ёдам, абраная соль, бо яна рэгулярна спажываецца ўсім насельніцтвам краіны на працягу жыцця.
Ёдаванне солі, праверка якасці яе насычанасці ёдам тэхнічна лёгка здзяйсняльныя. Дзякуючы такому простаму рашэнню, да 2013 года дэфіцыт ёду ў Беларусі быў цалкам ліквідаваны.
Важны вынік правядзення Нацыянальнай праграмы ліквідацыі ёднай недастатковасці – паступовае зніжэнне паказчыка першасных захворванняў на эндэмічны валляк на 100 000 дзіцячага насельніцтва (з 195,33 у 2015 годзе да 158,76 у 2019 годзе).
Яшчэ адным крытэрыем, які пацвярджае добрую забяспечанасць ёдам, з'яўляецца памяншэнне частаты сустракальнасці прыроджанага гіпатэрыёзу – захворвання, якое паспяхова дыягнастуюць пры скрынінгу ўсіх нованароджаных. За апошнія гады ў нашай краіне адзначанае зніжэнне першасных захворванняў на прыроджаны гіпатэрыёз на 100 тысяч дзіцячага насельніцтва (з 1,41 у 2015 годзе да 1,13 у 2019 годзе).
Недахоп ёду і выкліканы гэтым недахоп гармонаў шчытападобнай залозы ўжо з першых тыдняў унутрычэраўнага развіцця могуць прыводзіць да сур'ёзных парушэнняў закладкі галаўнога мозгу, фарміравання і выспявання нервовай сістэмы плода.
У норме прадукцыя гармонаў шчытападобнай залозы падчас цяжарнасці ў жанчыны павялічваецца на 30-50%, і плацэнта пранікальная для іх пераходу да будучага дзіцяці. З другой паловы цяжарнасці шчытападобная залоза плода пачынае выпрацоўваць уласныя гармоны, аднак матчыны не губляюць сваёй ролі.
Напрыклад, пад уплывам гармонаў шчытападобнай залозы цяжарнай адбываецца развіццё ўсіх сістэмаў і органаў у дзіцяці з прыроджанай аплазіяй (адсутнасцю) шчытападобнай залозы. Але відавочныя прыкметы зніжанай функцыі шчытападобнай залозы адсутнічаюць у 90% такіх дзяцей. Толькі праз некалькі дзён пасля нараджэння ўзровень матчыных гармонаў у крыві дзіцяці падае, і калі не будзе прызначанае замяшчальнае гарманальнае лячэнне, у дзіцяці разаўецца цяжкі малюнак прыроджанага гіпатэрыёзу.
Яшчэ адна сур'ёзная прычына зніжэння разумовага развіцця дзіцяці – дэфіцыт гармонаў шчытападобнай залозы ў раннім дзіцячым узросце. Гэты стан з'яўляецца незваротным і дрэнна паддаецца рэабілітацыі. Таму групамі павышанай рызыкі развіцця ёднага дэфіцыту з'яўляюцца жанчыны ў перыяд цяжарнасці і груднога выкормлівання, дзеці ад 0 да 3 гадоў.
Шчытападобная залоза аказвае важны ўплыў на рост, выспяванне касцявога шкілета і палавой сістэмы, станаўленне рэпрадуктыўнай функцыі дзіцяці. У падлеткавы перыяд функцыя шчытападобнай залозы адаптуецца да хуткага (скачка) росту і палавога развіцця: павялічваецца ўзровень тэрыятропнага гармону (гармону, які выпрацоўваецца гіпофізам) з наступным павышэннем канцэнтрацыі ў крыві гармону шчытападобнай залозы – тыраксіну.
Гэтыя змены фізіялагічныя і накіраваныя на падтрыманне высокага ўзроўню абмену рэчываў у падлеткаў. Рост аб'ёму шчытападобнай залозы ў гэтым узросце звязаны не толькі са стымулюючым уплывам тэрыятропнага гармону, але і іншымі фактарамі.
Так, недастатковае паступленне ёду ў арганізм павышае адчувальнасць клетак шчытападобнай залозы (тэрацытаў) да кампенсатарнага павышэння прадукцыі тэрыятропнага гармону з развіццём струмагеннага эфекту – павялічваюцца памеры шчытападобнай залозы за кошт узрастання колькасці «працуючых» клетак (ёдадэфіцытны валляк).
Недахоп бялку і дысбаланс мікраэлементаў можа ўзмацняць клінічныя праявы недахопу ёду. Недахоп у харчаванні дзіцяці цынку, марганцу, селену, малібдэну, кобальту, медзі і лішак кальцыю адыгрываюць важную ролю ў фарміраванні ёдадэфіцытнага валляка і апасродкуюцца праз парушэнні ўтварэння і актыўнасці каферментаў, ферментаў, вітамінаў і іншых біялагічна актыўных злучэнняў.
Сёння актыўна абмяркоўваецца дзеянне эндакрынных дызраптараў на стан шчытападобнай залозы. Ёсць меркаванне, што гэтыя рэчывы ўплываюць на развіццё злаякасных пухлінаў шчытападобнай залозы ў дзяцей. Зараз Рэспубліка Беларусь ўключаная ў праект Сусветнай арганізацыі аховы здароўя, мэта якога – вызначыць уплыў эндакрынных дызраптараў на здароўе дзіцяці, у тым ліку на эндакрынную функцыю.
Яшчэ адна з прычынаў парушэння працы шчытападобнай залозы – курэнне, у тым ліку пасіўнае. Даказана, што рэчывы, якія змяшчаюцца ў тытунёвым дыме (перхлараты) блакуюць ферментную сістэму залозы.
Паколькі гармоны шчытападобнай залозы прама ці ўскосна ўплываюць на ўсе працэсы ў арганізме дзіцяці, клінічныя праявы парушэння яе працы разнастайныя. Нярэдка паталогія шчытападобнай залозы можа маскіравацца пад іншыя захворванні. Зніжэнне функцыі залозы ў дзіцячым узросце праяўляецца нематываваным наборам масы цела, слабасцю, дрымотнасцю, павышанай стамляльнасцю, прыгнечаным эмацыянальным станам, ацёкамі, сухасцю скуры, ломкасцю пазногцяў, запорамі.
Пры залішняй прадукцыі тэрыёідных гармонаў адзначаюцца скаргі на дрэннае самаадчуванне, раздражняльнасць, змяненне паводзінаў і паспяховасці ў школе, бяссонніцу, патлівасць, трэмар, пачашчанае сэрцабіцце, галаўны боль, парушэнне зроку, пахуданне.
Калі дзіця адстае ў росце, у яго недахоп ці лішак масы цела, калі ў дзяўчынкі нерэгулярны менструальны цыкл; калі хтосьці ў сям'і быў прааперыраваны з нагоды раку шчытападобнай залозы або мае парушэнне функцыі (гіпатэрыёз ці гіпертэрыёз), ёсць сэнс прайсці абследаванне.
Для пацверджання дыягназу парушэння функцыі шчытападобнай залозы алгарытм абследавання дзіцяці ўключае ўльтрагукавое даследаванне, вызначэнне ўзроўню гармонаў шчытападобнай залозы, кансультацыю эндакрынолага.
Што ж можна зрабіць, каб падтрымаць працу шчытападобнай залозы ў дзіцяці? Прафілактыка пачынаецца з вядзення здаровага ладу жыцця (рацыянальнага харчавання і адэкватнай фізічнай нагрузкі). Паколькі ў склад гармонаў шчытападобнай залозы ўваходзяць малекулы ёду, які ў асноўным паступае з ежай, варта не забывацца пра ўжыванне ёдаванай солі.
Дадаткова можна ўключыць у рацыён дзіцяці марскую рыбу, марскую капусту. Яны ўтрымліваюць найбольшую колькасць гэтага мікраэлемента (каля 800-1000 мкг/кг).
Значная колькасць мікраэлемента выяўляецца ў рыбіным тлушчы. У лыжцы рыбінага тлушчу змяшчаецца сутачная доза ёду. Гародніна, садавіна не валодаюць здольнасцю канцэнтраваць ёд, таму яго ўтрыманне ў іх цалкам залежыць ад мікраэлементнага складу глебы.
Падпісвайцеся на наш канал у Telegram, групы ў Facebook, «УКантакце», у «Аднакласніках» – і будзьце ў курсе свежых навінаў! Толькі цікавыя відэа на нашым канале YouTube, далучайцеся!
Такім чынам, застаўся ўсяго тыдзень да заканчэння навучальнага года. Самага няпростага ў найноўшай гісторыі нацыянальнай адукацыі. Апошняя чвэрць пайшла не па звыклым сцэнары: дыстанцыйнае навучанне набыло масавы характар, а школьныя ўрокі наведваюць менш за палову вучняў. Але як бы там ні было, вучняў 9-х і 11-х класаў чакаюць абавязковыя выпускныя экзамены.
Як правільна і эфектыўна рыхтавацца да іспытаў, знаходзячыся на самаізаляцыі? Як размеркаваць час і рэсурсы на самастойную падрыхтоўку? Якімі крыніцамі карыстацца для праверкі і замацавання ведаў? Якую дапамогу выпускніку могуць аказаць бацькі? Таццяна Скачынская, сябра Беларускага таварыства псіхолагаў, псіхолаг у сферы пазітыўнай і кагнітыўна-паводніцкай псіхатэрапіі, дапамагла вызначыць 7 крокаў на шляху да паспяховай здачы школьных экзаменаў.
Для таго, каб правільна арганізаваць самастойную падрыхтоўку да школьных іспытаў, важна правільна абуладкаваць працоўнае месца школьніка. Аптымальна, калі ў дзіцяці ёсць магчымасць займацца ў асобным пакоі, там яму будзе лягчэй засяродзіцца на вучобе. Пажадана, каб стол быў ля акна, добра асвятляўся, а пад рукой мелася ўсё неабходнае для заняткаў: навучальныя дапаможнікі і канцылярскія прыналежнасці. А вось гаджаты лепей наогул прыбраць з вачэй, калі ў іх няма вострай неабходнасці, напрыклад, каб карыстацца інтэрнэт-рэсурсамі для самападрыхтоўкі. Эксперыментальна даказана, што засваяльнасць навучальнага матэрыялу, запамінальнасць і выніковасць работы ў цэлым павышаецца ў разы, калі смартфон вучня знаходзіцца не пад рукой, а ў суседнім памяшканні.
Прынцыпова важна, лічыць эксперт, выконваць вучэбныя заданні менавіта за сталом, нягледзячы на тое, што хатняя абстаноўка дазваляе рабіць гэта на канапе ці нават у ложку. Вольнасці не спрыяюць працоўнаму настрою і зніжаюць эфектыўнасць навучання. Таму неабходна выразна размяжоўваць хатнюю прастору на месцы для вучобы, для адпачынку і сну.
Нягледзячы на тое, што часу да экзаменаў засталося зусім няшмат, не варта зубрыць з раніцы да вечара. Ператамленне, нервовае напружанне, празмернасць інфармацыі прынясуць зваротны эфект: сіл на сам экзамен можа і не застацца. Таму прасачыце, каб ваш школьнік прытрымліваўся рэжыму вучобы і адпачынку.
Заняткі лепей планаваць на першую палову дня. Вучонымі ўстаноўлена, што пік працаздольнасці прыпадае на прамежак з 6 да 15 гадзін. Не варта будзіць школьніка на світанні. Але і дазваляць валяцца ў ложку да апоўдня – таксама не варыянт.
Разумна запланаваць вучэбны час, арыентуючыся на школьны расклад. У тым ліку з захаваннем перапынкаў на адпачынак. 45 хвілін узмоцненага мазгавога штурму – 10-15 хвілін адпачынку. Але не з гаджатамі, гэта важна!
Навуковыя даследаванні паказваюць, што нават пасля кароткага «завісання» ў гаджатах мозгу дзіцяці неабходна каля 25 хвілін, каб уключыцца ў працу. Выкарыстоўваючы смартфоны і планшэты «для адпачынку», можна ў прамым сэнсе аказаць сабе мядзведжую паслугу: знізіць мазгавую дзейнасць і выбіцца з графіка.
Лепей падчас перапынку выканаць гімнастыку для вачэй або проста паляжаць, вызваліўшы галаву ад любых думак.
Каб максімальна захаваць зону камфорту для вучня, не прымушайце яго займацца ў выхадныя дні. На тое яны і выхадныя.
Ёсць розныя меркаванні спецыялістаў адносна таго, з якой тэмы пачынаць падрыхтоўку да іспыту. Адны за складаную, маўляў, на свежую галаву лягчэй зразумець і засвоіць цяжкі матэрыял. Іншыя – за простую, каб разгайдаць працаздольнасць і настроіцца на сур'ёзны мазгавы штурм.
Як бы там ні было, не цісніце на школьніка. Дайце яму магчымасць выбраць той варыянт, які яму бліжэй. Будзьце прынцыповымі ў іншым: не дазваляйце адкладаць самыя важныя і цяжкія тэмы на апошні дзень. Больш непрадуктыўнага спосабу падрыхтавацца да экзаменаў не прыдумаеш. У лепшым выпадку веды застануцца ў галаве роўна да моманту заканчэння іспыту. У горшым – у галаве будзе поўная «каша», якая пазбавіць шанцаў на паспяховы вынік.
Не кантралюйце школьніка без лішняй патрэбы, не пазбаўляйце яго самастойнасці. У той жа час заўсёды будзьце гатовыя адгукнуцца на яго просьбу аб дапамозе. Новая ці складаная інфармацыя лепей за ўсё засвойваецца, калі праходзіць праз тры сістэмы ўспрымання: візуальную, аўдыяльную і маторна-адчувальную.
Складана даецца тэма? Прагаварыце яе з дзіцем, дапамажыце падабраць вобразы, якія будуць спрыяць лепшаму запамінанню; запішыце на паперы асноўныя тэзісы, такім чынам зафіксаваўшы іх у памяці.
І, вядома, не забывайцеся, што паўтарэнне – маці вучэння. Прачытаўшы матэрыял, чалавек запамінае 70% інфармацыі, праз некалькі гадзін у памяці застаецца толькі 50%, а на наступны дзень без намаганняў можна ўзгадаць толькі 20% з прачытанага напярэдадні. Таму пэўны час трэба адвесці на тое, каб штодня паўтараць асноўныя правілы па кожным экзаменацыйным прадмеце.
Гэта вельмі важны момант, каб паспяхова здаць любы экзамен.
«Рэпеціруйце» дыктоўкі і пераказы. Тэкст можа быць любы, але абавязкова потым трэба разам зрабіць разбор дапушчаных памылак. Памятаеце: аўдыяльнае і візуальнае ўспрыманне паляпшаюць запамінанне? Дык вось гэта той самы выпадак, калі на памылках вучацца.
Рэпетыцыя вуснага экзамену таксама можа быць. Тут важна, каб на пытанні школьнік адказваў, як «каля дошкі», а не разваліўшыся ў мяккім крэсле. Зусім хутка вы заўважыце, наколькі больш упэўнена будзе адказваць і адчуваць сябе дзіця. А ўпэўнены на экзамене школьнік – ужо палова поспеху. Прапануйце сыну або дачцэ рэпеціраваць вусныя адказы і без вашага ўдзелу, напрыклад, стоячы ля люстэрка.
5-разовае харчаванне і паўнавартасны начны сон (працягласцю не меней за 7 гадзін) – абавязковы складнік эфектыўнай падрыхтоўкі да школьных іспытаў.
Рацыён школьніка ў перыяд павышаных разумовых і эмацыянальных нагрузак павінен быць разнастайным, збалансаваным і паўнавартасным. Сачыце, каб штодзённае меню дзіцяці ўключала зерневыя кашы, гародніну, садавіну, малочныя і мясныя прадукты, багатыя на вітаміны і пажыўныя рэчывы.
Паўнавартасны сон дапамагае аднавіць сілы, а мозгу – «перазагрузіцца». Таму як бы ні зацягнулася вучоба, сачыце, каб яна заканчвалася да 22 гадзін.
Добры настрой – гэта істотная дапамога перад іспытам. Паспрабуйце засцерагчы школьніка ад лішніх стрэсаў, яму дастаткова тых, што звязаныя з маючым адбыцца выпрабаваннем. Для падтрымання стабільнага псіхаэмацыянальнага стану не забараняйце яму стасункі з аднагодкамі, нават калі вам здаецца, што вучоба цяпер важнейшая. Сацыяльная ізаляцыя павышае градус стрэсу, зніжае настрой і, адпаведна, памяншае выніковасць у вучобе.
Перад іспытам дапамажыце дзіцяці настроіцца на перамогу, а не паражэнне. Пры гэтым дайце зразумець, што бал, атрыманы на экзамене, – гэта не адзнака асобы дзіцяці або яго перспектыў на дарослае жыццё. Нават калі вынік будзе горшым за чаканы, гэта ніяк не будзе характарызаваць яго як няўдачніка.
Не апошняя справа ў правільнай падрыхтоўцы да школьных іспытаў – правільныя інтэрнэт-рэсурсы, дзе сабраная і сістэматызаваная інфармацыя па ўсёй вучэбнай праграме за 9 і 11 класы, ёсць спасылкі на практычныя і дадатковыя матэрыялы. Сярод карысных крыніц будучым выпускнікам дакладна спатрэбіцца Нацыянальны адукацыйны партал, дзе размешчаныя нарматыўныя прававыя дакументы, экзаменацыйныя білеты, дадатковыя матэрыялы для падрыхтоўкі і правядзення выпускных школьных экзаменаў, а таксама ўступных іспытаў у вышэйшыя і сярэднія спецыяльныя навучальныя ўстановы.
Нагадаем: нягледзячы на пандэмію каранавіруса, беларускія школы і гімназіі працуюць у штатным рэжыме. Разам з тым, бацькі мае права вырашаць, адпраўляць дзіця на ўрокі або пакінуць дома для самастойнага вывучэння вучэбнай праграмы. Што тычыцца пераліку і правілаў правядзення выпускных экзаменаў, дык зменаў пакуль што няма.
Па словах начальніка аддзела дашкольнай, агульнай сярэдняй і спецыяльнай адукацыі камітэта па адукацыі Мінгарвыканкама Марыі Ілюшчэні, падрыхтоўка і правядзенне школьных экзаменаў зараз рэгламентуюцца двума асноўнымі дакументамі: пастановай Міністэрства адукацыі Рэспублікі Беларусь ад 10.07.2019 года №105 аб пераліку прадметаў, па якіх праводзяцца выпускныя іспыты ў 2019/2020 навучальным годзе, і лістом Міністэрства адукацыі аб завяршэнні 2019/2020 навучальнага года і тэрмінах правядзення выпускных экзаменаў.
Паводле дакументаў, выпускнікам 9-х класаў трэба здаць 3 экзамены:
Выпрабаванні пройдуць у пісьмовай форме 2, 4 і 9 чэрвеня адпаведна.
Для выпускнікоў 11-х класаў вызначаныя наступныя прадметы, па якіх будуць здавацца экзамены:
Даты пісьмовых экзаменаў вызначаныя на 1, 3 і 5 чэрвеня.
Марыя Ілюшчэня, начальнік аддзела дашкольнай, агульнай сярэдняй і спецыяльнай адукацыі камітэта па адукацыі Мінгарвыканкама:
– На сёння змяненняў у парадку і датах правядзення экзаменаў няма. Аднак, будуць прад'яўляцца дадатковыя патрабаванні да пытанняў бяспекі, у прыватнасці, арганізацыя правядзення экзаменаў у вялікіх аўдыторыях (рэкрэацыях, холах, актавых залах), каб захаваць бяспечную дыстанцыю паміж вучнямі.
Падпісвайцеся на наш канал у Telegram, групы ў Facebook, «УКантакце», у «Аднакласніках» – і будзьце ў курсе свежых навінаў! Толькі цікавыя відэа на нашым канале YouTube, далучайцеся!
One fine body…