Калі даўней дзяўчаты і маглі, круцячы носам, перабіраць жаніхоў, дык з прыходам гэтай даты ўжо спяшаліся вызначыцца. Бо Піліпаўскі пост, які распачынаецца напрыканцы лістапада, доўжыцца ажно да Раства Хрыстова ў праваслаўных. Не паспелі – быць не ў пАры. А, як вядома, «у Зміцераў дзень і верабей пад кустом піва варыць». Хацела б я паглядзець на таго вераб’я! 🙂 А вы?!
Па Змітраву дню не толькі меркавалі пра будучае надвор’е, але і казалі пра тое, што халодныя дні надыходзяць. І, мяркуючы па прагнозе сіноптыкаў, ужо з серады той самы холад нас і чакае. А чаго хацець?! Набліжаемся да сярэдзіны апошняга месяца восені…
«Зміцер зямлю выцер, на груды пабіў, каб ніхто не хадзіў», «Калі Змітра на снезе, то і Каляды на снезе, а вясна позняя», «Святы Зміцер грудамі гвоздзіць», «Зміцераў дзень – зіма вужо лезе на тын».
Чамусьці апошняе адразу прачытала – «вуж лезе на тын»! 🙂 Думаю: «Які вуж?! Змеі-то ўжо на Узвіжанне спаўзліся і спаць паклаліся»… Хіба толькі дзесьці вужыкі і жывуць у цёплым хляве, дзе харчуюцца каровіным малаком… Так што пры бліжэйшым расчытанні прыстаўное «в» мяне тут толькі пасмяшыла. 🙂
А мы працягваем знаёміцца з народнай мудрасцю ды назіраннямі, якія тычацца Змітравага дня: «Калі 8 лістапада холад і снег, вясна позняя і халодная, а калі адліга, зіма і вясна цёплыя». Ну, па праўдзе, абяцаныя плюс 10 на сёння холадам не палічыш, праўда?! Асабліва ў параўнанні з тымі плюс 1-3 на сераду, 11 лістапада. Дакладней – 11.11.2020. Гэта што тычыцца супадзенняў.
Зрэшты, толькі што зірнула ў прагноз надвор’я. Ужо плюс 3-5 абяцаюць у сераду. Накінулі пару градусаў, дзякуй! 🙂 А бліжэй да 11.11., глядзіш, і яшчэ зменіцца. Толькі ў які бок, невядома. Але калі меркаваць па даўнейшых прагнозах і браць плюс за адлігу, значыць, зіма і вясна цёплыя…
«На Зміцера рэкі замярзаюць». А ў нас вось ўжо не… «Да Дзмітраўскай суботы зіма не становіцца». І з гэтым не паспрачаешся… Толькі калі ўжо дужа рэдка, у выглядзе выключэння… У залежнасці ад надвор’я даўней выпас жывёлы мог заканчвацца на Пакроў, а мог і на Змітра: «Да Змітра пасуць, а па Змітры пільнуюць».
Але, як кажуць па-сучаснаму, не Змітрам адзіным… Сёння ёсць і яшчэ цікавыя святы. Не такія, вядома, народныя і душэўныя, але…
Самы найбліжэйшы па тэме – Дзень першых прыкметаў зімы. У чымсьці пераклікаецца са Змітравым днём, ці не так?! І, магчыма, дзесьці на Віцебшчыне тыя прыкметы сапраўды з’явяцца…
Яшчэ 8 лістапада – Дзень выканання жаданняў! Чароўнае свята! Прычым маецца на ўвазе не толькі тое, што вы загадалі жаданне і замерлі ў чаканні яго выканання. Гэтае свята чакае актыўнасці ад вас!
У тым сэнсе, што кожны можа паспрабаваць выканаць жаданне блізкага чалавека, сябра, знаёмага і нават незнаёмага! Кожны можа прымерыць на сябе ролю добрага чараўніка. Так што гэтае свята дорыць выдатныя магчымасці падараваць камусьці шчасце і радасць! Дык давайце скарыстаемся гэтым!
Ідзем далей. Міжнародны дзень КВЗ! Эх, як калісьці я была захоплена КВЗ! Але больш падабалася быць не ўдзельнікам, а гледачом (у школьныя і студэнцкія гады). А ўжо калі КВЗ паказвалі па тэлевізары…
Перачытала апошняе – і ўсміхнулася. Няўжо такое было?! Бо ад тэлевізара ў нашай сям’і свядома адмовіліся… Ну-у-у-у-у… Гадоў з 10 таму. А вы былі ўдзельнікам КВЗ?! Хаця б дзе-небудзь і калі-небудзь?!
Ці ёсць у вас, шаноўныя сябры, знаёмыя піяністы?! Прафесіяналы альбо аматары?! Тады віншуйце іх хутчэй! Як з чым?! З Міжнародным днём піяніста!
А ці любіце вы капучына так, як люблю яго я?! 🙂 Сёння – Сусветны дзень капучына. Калі ў мяне ёсць магчымасць выбару, якую каву заказаць, дык заўсёды аддаю перавагу капучына.Чаму?! А не ведаю. Люблю – і ўсё тут! 🙂
Дарэчы, піла і самы сапраўдны італьянскі напой. Так, у Італіі, падчас вандроўкі ў 2013-ым. Таксама не верыцца. І парыжская кава капучына была ў маім жыцці. Ажно ў далёкім 2006-ым. Калі падумаць, дык цэлая віртуальная калекцыя набярэцца…
А вось цяпер на прасторах інтэрнэту адшукала цікавы і нескладаны рэцэпт прыгатавання капучына. Ручны, так бы мовіць. Хачу паспрабаваць прыгатаваць. Хто са мной?! 🙂
Інгрэдыенты:
- ¼ кубка распушчальнай кавы
- ¼ шклянкі цукру
- 3 ст.л. вады
- малако (неабходную колькасць выбраць самім).
Прыгатаванне:
- У вялікай місцы змяшаць каву, ваду і цукар.
- Узбіць сумесь блэндэрам, міксерам альбо проста венчыкам. Яна павінна стаць светлай і аднастайнай, крэмавай.
- Бяром 1 шклянку малака (калі порцыя разлічаная на 1 чалавека), пераліваем у каструлю, ставім на слабы агонь і грэем, пастаянна памешваючы венчыкам, каб утварылася пена.
- У кубак змяшчаем 1 ст.л. кававай сумесі, заліваем малаком і акуратна перамешваем.
Аўтары рэцэпта сцвярджаюць, што калі кававай сумесі прыгатаваць пабольш, дык яе можна захоўваць у халадзільніку ў герметычным кантэйнеры на працягу тыдня. Смачна піць! 🙂
