Кантралюй радыяцыю

Спецыялісты сцвярджаюць, што больш за 70% натуральнай радыяцыі, назапашанай чалавекам, прыпадае на прадукты харчавання і ваду.  Органы і ўстановы дзяржаўнага санітарнага нагляду адсочваюць якасць прадуктаў, якія ўжываюць жыхары рэспублікі і правяраюць іх на ўтрыманне радыенуклідаў.

Дзе праверыць дарункі прыроды? І як набыць незабруджаныя ягады, грыбы на кірмашы?

Радыяцыйны кантроль прадуктаў

Пасля чарнобыльскай катастрофы ў рэспубліцы створана сістэма радыяцыйнага кантролю, што ўключае:

• дзяржаўны кантроль;
• ведамасны кантроль (лабараторыі міністэрстваў сельскай гаспадаркі і харчавання, аховы здароўя, лясной гаспадаркі);
• грамадскі кантроль (мясцовыя цэнтры радыяцыйнага кантролю).

Дзякуючы працы каля 1 000 лабараторый радыяцыйнага кантролю цалкам выключаная пастаўка для гандлю прадуктаў, што утрымліваюць радыенукліды звыш дапушчальных узроўняў.

Дзе вызначыць забруджванне прадукцыі:

• у цэнтрах гігіены і эпідэміялогіі;
• лабараторыях радыяцыйнага кантролю лясгасаў, размешчаных на забруджаных радыенуклідамі тэрыторыях, што займаюцца вымярэннем утрымання радыенуклідаў у лясной прадукцыі;
• лабараторыях радыяцыйнага кантролю, размешчаных
  на кірмашах;
• мясцовых цэнтрах радыяцыйнага кантролю.

Правілы набыцця на кірмашы

• Пераканайцеся, што ў прадаўца ёсць сертыфікат на прадукцыю, выдадзены лабараторыяй радыяцыйнага кантролю кірмашу.
• Не набывайце прадукцыю (асабліва дары лесу) на стыхійных кірмашах альбо ўздоўж трас (ніхто не дасць гарантыю, што ўтрыманне радыенуклідаў будзе ў дапушчальных межах).
• Пры набыцці ў прадаўцоў, якія не маюць сертыфіката, самі праверце прадукты ў бліжэйшай лабараторыі радыяцыйнага кантролю.

Аўтар: Валерыя Самкова, урач-гігіеніст аддзялення радыяцыйнай
гігіены і бяспекі РЦГЭіГЗ.