У гарачае надвор'е многія, прыслухоўваючыся да свайго арганізму, пачынаюць змяняць рацыён харчавання і адмаўляцца ад наварыстых баршчоў на карысць лёгкіх, вітамінных халодных летніх супоў. А тут ужо дарэчы можа быць усё, што пад руку трапіць. Сярод асноўных прадстаўнікоў летніх супоў халаднік (бурачнік), бацвінне, гаспача. Хоць разнастайнасць у сусветным маштабе ўражвае нават самых патрабавальных гурманаў.
Карысць летніх халодных супоў
Спалучэнне прастаты гатавання, велізарнай колькасці варыяцый, нізкай каларыйнасці і пры гэтым высокага ўтрымання вітамінаў, макра-і мікраэлементаў у гатовых стравах – бясспрэчныя вартасці халодных супоў у летні перыяд.
За кошт таго, што пры падрыхтоўцы такіх супоў выкарыстоўваюць свежыя прадукты, якія не прайшлі тэрмічную апрацоўку, што зніжае колькасць вітамінаў, яны захоўваюць карысныя ўласцівасці.
Акрамя таго, рэцэпты летніх супоў не патрабуюць смажання агародніны, што дадае гатовай страве каларыйнасці.
Шкода халодных супоў
Пры падрыхтоўцы летніх халодных супоў важна не перастарацца з тэмпературай стравы. Так, у спякотны летні дзень яна выдатна дапаможа асвяжыцца, але не трэба забываць, што пры нізкай тэмпературы ежы паскараецца яе эвакуацыя з страўніка, у сувязі з чым яна ў недастаткова апрацаваным выглядзе паступае ў тонкі кішэчнік. У сувязі з гэтым не толькі арганізм недаатрымлівае неабходныя пажыўныя рэчывы, але і ўзнікае рызыка развіцця колікаў. Аптымальнай з'яўляецца тэмпература, блізкая да пакаёвай, таму не астуджайце летнія супы ніжэй за 20оС.
Асцярожнымі таксама варта быць з колькасцю спецый. Рэцэптура некаторых халодных супоў прадугледжвае даданне чырвонага перцу чылі або молатага чорнага. Памятайце, што ў вялікіх колькасцях яны шкодныя для страўнікава-кішачнага тракта, асабліва калі ёсць схільнасць да захворванняў гэтай сістэмы.
Як прыгатаваць летні халодны суп?
Халаднік
Традыцыйная страва для Беларусі, якую любяць у многіх сем'ях. Гатуецца лёгка, пры гэтым вельмі смачная і карысная. Як і любая страва, за час свайго існавання рэцэпт халадніку перажываў змены і мадыфікаваўся. Ёсць шмат варыянтаў вадкай асновы гэтага супу, але асноўныя інгрэдыенты, як правіла, не змяняюцца.
Інгрэдыенты
- Вада або кефір (а можна і тое, і тое ў прапорцыі 1:1) – 2 л;
- Адварныя буракі – 300 г;
- Свежы агурок – 300 г;
- Зеляніна;
- Адварныя курыныя ці перапёлчыны яйкі – палова на адну порцыю;
- Соль і цукар;
- Смятана для запраўкі;
- Гарнір (адварная бульба, тосты, пампушкі).
Прыгатаванне
Нацерці звараныя буракі, агурок, усё скласці ў рондаль.
Здрабніць зеляніну (кроп, цыбулю). Адварныя яйкі таксама можна нарэзаць дробным кубікам і дадаць да агародніны. Па жаданні можна дадаць 1 ст. лыжку воцату або лімонную кіслату. Заліць усе інгрэдыенты астуджанай кіпячонай вадой альбо кефірам.
Астудзіць суп на працягу 30 хвілін у халадзільніку і падаваць з адварной бульбай. Гатовую страву можна ўпрыгожыць галінкай кропу.
Гаспача
Яркі не толькі па колеры, але і смакавых якасцях суп з сонечнай Іспаніі, які з'яўляецца выдатнай альтэрнатывай цяжкай ежы ў гарачае надвор'е. Ён не толькі асвяжае, але і зараджае арганізм энергіяй.
Інгрэдыенты
- Саспелыя памідоры – 1 кг;
- Чырвоны балгарскі перац – 2 шт;
- Агурок – 1 шт;
- Салодкая чырвоная цыбуля – ½ цыбуліны;
- Часнок – 2 зубчыкі;
- Чырвоны вінны воцат – 1-1,5 ст.л.;
- Лімонны сок – 1 ст. л.;
- Белы хлеб без скарыначкі – 1 лустачка;
- Цукар – ½ ч.л.;
- Соль;
- Аліўкавы алей – 1-2 ст. л.
Прыгатаванне
З памідораў зняць скурку. Для гэтага неабходна зрабіць на іх крыжападобны надрэз з боку пладаножкі, апусціць на 1-2 хвіліны ў кіпень, а затым у халодную ваду. Скурачка здымецца без асаблівых праблем. Затым разрэзаць іх, у залежнасці ад памеру, на 2 або 4 часткі і вынуць пладаножкі.
Балгарскі перац ачысціць ад зернеткаў, выдаліць пладаножку і нарэзаць кубікам.
Вычышчаны ад скуркі свежы агурок таксама нарэзаць кубікам.
Часнок ачысціць і раздушыць нажом.
Усю агародніну неабходна скласці ў блендар і здрабніць да стану пюрэ.
Кавалачак белага хлеба разламаць на некалькі частак і дадаць да атрыманай масы і пакінуць на 5-7 хвілін, каб ён стаў мяккім. Затым яшчэ раз уключыць блендар і здрабніць усё да аднастайнай масы.
Дадаць соль, цукар, вінны воцат, сок лімона і соус «Табаска» на ўласны густ.
Атрыманую сумесь працерці праз сіта ад зернеткаў памідора, дадаць аліўкавы алей і паставіць у халадзільнік на 3-4 гадзіны.
Выдатным дадаткам да гаспача стануць грэнкі з белага хлеба. Для гэтага трэба нарэзаць яго дробнымі кубікамі і абсмажыць на аліўкавым алеі да залацістага колеру.
У астуджаны суп можна пакласці дробна нарэзаную чырвоную цыбулю і зялёны балгарскі перац.
Джаджык
Лёгкі ёгуртавы суп родам з Турцыі, які падаюць у гэтай краіне і як самастойную страву, і як закуску.
Інгрэдыенты
- Ёгурт (можна замяніць кефірам або айранам) – 1 л;
- Свежыя агуркі – 7-8 шт;
- Зеляніна (кроп, пятрушка, мята, пёркі зялёнай цыбулі);
- Часнок – 2-3 долькі;
- Аліўкавы алей – 1 ст. л.;
- Соль, чорны молаты перац;
- Вада (пры выкарыстанні ёгурта) – 5-6 ст. л.
Прыгатаванне
Агуркі нарэзаць дробным кубікам альбо пацерці на тарцы (будзьце гатовыя да таго, што ў гэтым выпадку яны дадуць сок), скласці ў рондаль. Туды ж дадаць прапушчаны праз прэс часнок, ёгурт, ваду (альбо кефір, айран), пасаліць і старанна перамяшаць усе інгрэдыенты. Гатовую страву астуджаць у халадзільніку да падачы на стол.
Рэцэпты прыгатавання летніх халодных супоў простыя, нізкакаларыйныя і не патрабуюць вялікіх выдаткаў. І што самае цудоўнае – любы рэцэпт можа быць дапоўнены і мадыфікаваны ў залежнасці ад наяўных у вашым халадзільніку прадуктаў і ўласнага густу.
